Вы тут

Спецыялісты для «разумнага горада» і «зялёнай эканомікі»


Брэсцкі дзяржаўны ўніверсітэт імя А. С. Пушкіна адкрывае набор на новую спецыяльнасць — «Урбаналогія і сіці-менеджмент».


Першы набор складзе 20 студэнтаў: сямнаццаць з іх будуць навучацца за бюжэтныя сродкі, а трое — на платнай форме навучання. Для паступлення трэба будзе здаць тры экзамены ў форме ЦТ: геаграфію, матэматыку і беларускую (рускую) мову. Працягласць навучання складзе чатыры гады. Выпускнікі новай спецыяльнасці атрымаюць дыплом аб вышэйшай адукацыі з кваліфікацыяй «Урбанолаг. Менеджар». Рыхтаваць спецыялістаў будуць на кафедры геаграфіі і прыродакарыстання факультэта прыродазнаўства.

«Урбаналогія і сіці-менеджмент» — новая для рынку працы нашай краіны спецыяльнасць. Неабходнасць падрыхтоўкі спецыялістаў у гэтай галіне прадыктавана патрэбай у комплексным вырашэнні праблем урбанізацыі. Адукацыйная праграма пабудавана на сучасных сусветных падыходах да кіравання гарадскім развіццём і дасць магчымасць сфарміраваць унікальных спецыялістаў па напрамках «Гарадскі дызайн», «Гарадское планаванне і кіраванне».

Місія ўрбанолага заключаецца ў тым, каб любы населены пункт (у першую чаргу горад) зрабіць зручным для жыцця людзей, забяспечыўшы пры гэтым яго ўстойлівае развіццё. Спецыялісты ў галіне ўрбаналогіі могуць адыграць ключавую ролю ў рэалізацыі канцэпцыі «разумны горад», а таксама па развіцці ў краіне «зялёнай эканомікі».

Выпускнікі гэтай спецыяльнасці змогуць працаваць як у дзяржаўных арганізацыях і ўстановах, так і ў прыватным сектары, паспяхова будаваць кар'еру ў адміністрацыях гарадоў і раёнаў, сферах архітэктуры і горадабудаўніцтва, транспарту і лагістыкі, экалогіі і ландшафтнага праектавання, у гандлі і грамадскім харчаванні. Атрыманыя кампетэнцыі дадуць магчымасць ім прафесійна рэалізоўвацца на дзяржаўнай службе, у камерцыйных і некамерцыйных арганізацыях нацыянальнага і міжнароднага ўзроўню, арганізоўваць уласны бізнес.

Надзея НІКАЛАЕВА

Прэв’ю: pixabay.com

Выбар рэдакцыі

Грамадства

Ірына Даўгала: Сям’я для беларусаў застаецца найвышэйшай каштоўнасцю

Ірына Даўгала: Сям’я для беларусаў застаецца найвышэйшай каштоўнасцю

«Сям’я закладвае ў чалавеку мараль, здольнасць спраўляцца з выпрабаваннямі, патэнцыял для развіцця, яна навучае любові, самаахвярнасці, культуры».

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.