Дэпутат: Мір — абсалютная каштоўнасць для беларусаў

Ірына ДАЎГАЛА, член Пастаяннай камісіі па заканадаўстве Палаты прадстаўнікоў Нацыянальнага сходу:

— Спыняцца нельга — затопчуць! Пасланне Прэзідэнта пранізана менавіта гэтым пасылам. Былі пытанні, на якія дадзены нязручныя пытанні. Але нязручныя не для беларусаў. Дык будзе вайна? І адказ быў вельмі канкрэтным і якраз нязручным... для калектыўнага Захаду. А калі заўтра вайна, то «на абарону ўстануць усе, нават тыя, хто не хоча», адзначыў Прэзідэнт. Мы катэгарычна не хочам вайны. Акрамя таго, ніхто не хоча выходзіць з зоны камфорту. Мір — абсалютная каштоўнасць для беларусаў, — пераканана дэпутат. 

Яна звяртае ўвагу, што асаблівая ўвага ў Пасланні была прысвечана эканоміцы, як важнейшаму складніку нашага жыцця. І тут не абышлося без акцэнту на санкцыі. 

— «Санкцыі — гэта інквізіцыя нашага часу», — цытуе словы кіраўніка дзяржавы Ірына Даўгала і працягвае. — Але і яны не спыняць нашага развіцця. Непрыемна, але мы будзем рухацца наперад. Як будзем і берагчы гісторыю. Нашы дзеці павінны ведаць, калі і як перакройваліся нашы землі. Другога шанцу стварыць сваю дзяржаву не будзе. 

Дэпутат пераканана: дзяржава клапоціцца пра нас і задаецца пытаннем: Ці не гэта ідзе асновай абноўленай Канстытуцыі? 

— Захоўваецца і памнажаецца сацыяльная скіраванасць галоўнага дакумента краіны, — кажа яна. — Канстытуцыя раскрые рэзервы паміж дзяржавай і грамадствам. Асобны акцэнт у Пасланні быў зроблены на росце цэн, прычынах і мерах па недапушчэнні неабгрунтаванага росту. Аднак гэта сусветная тэндэнцыя. Адносіны з Расіяй і Кітаем зяўляюцца стратэгічнымі ва ўсіх кірунках, пачынаючы з гандлю, заканчваючы палітычнымі кірункамі і захаваннем бяспекі сваім народам. Мы не сябруем з кімсьці супраць кагосьці! Мы заўсёды гатовыя да канструктыўнага супрацоўніцтва.

Пра спорт Ірына Даўгала адзначыла коратка, прывёўшы цытату Прэзідэнта: «Спорт высокіх дасягненняў атручаны палітыкай». 

— На жаль, але гэта факт, — пагаджаецца яна. — Прэзідэнт заявіў, што бягучы год стане годам пазітыву і абнаўлення, нягледзячы ні на якія санкцыі. Можна не сумнявацца, і задачы, пастаўленыя перад урадам, дзяржорганамі і народам, будуць выкананыя. А тэкст Паслання разляціцца на цытаты, прычым не толькі ў СМІ, але і сярод простых людзей. 

Вераніка КАНЮТА

Прэв’ю: БелТА