Сівец: Зняцце абмежаванняў пойдзе на карысць развіццю Саюзнай дзяржавы

Такое меркаванне выказаў старшыня Пастаяннай камісіі Савета Рэспублікі па заканадаўстве і дзяржаўным будаўніцтве Сяргей Сівец.

У гутарцы з журналістамі старшыня профільнай камісіі пракаментаваў скасаванне з сённяшняга дня антыковідных абмежаванняў, якія да гэтага дзейнічалі паміж Беларуссю і Расіяй. 

— Мы заўсёды займалі пазіцыю, што абмежаванні, якія звязаны са свабодай перамяшчэння нашых грамадзян, не ўплываюць на максімілізацыю бяспекі з пункту гледжання санітарна-эпідэміялагічных норм, — адзначыў сенатар. — Але тое, што яны перашкаджаюць рэалізацыі адпаведных правоў і свабод нашых грамадзян (у першую чаргу права на свабоду перасоўвання, права на працу на тэрыторыі Саюзнай дзяржавы, свабодзе капіталаў, усё, што ў нас фармалізавана на ўзроўні інтэграцыйнай нарматворчасці) — гэта безумоўна. 

Старшыня профільнай камісіі падкрэсліў: усе гэтыя фактары не садзейнічалі далейшаму паглыбленню інтэграцыйнага супрацоўніцтва і будаўніцтва Саюзнай дзяржавы. 

— Мы разумелі, што яны носяць часовы характар, але ўсе былі зацікаўлены ў тым, каб максімальна скараціць час і дзеянне гэтых абмежавальных норм, — канстатаваў Сяргей Сівец. -Мы можам толькі вітаць іх скасаванне, асабліва цяпер — ва ўмовах беспрэцэдэнтнага санкцыйнага ціску, які аказваецца на Расійскую Федэрацыю і Рэспубліку Беларусь. 

Сенатар нагадаў аб наяўнасці 28 саюзных праграм, фармалізаваных у дэкрэце № 6 Вышэйшага дзяржсавета. 

— Ужо сёлета да канца года па шэрагу праграм павінны быць прыняты канкрэтныя заканадаўчыя рашэнні, звязаныя з уніфікацыяй, гарманізацыяй нацыянальнага заканадаўства Расійскай Федэрацыі і Рэспублікі Беларусь, — падкрэсліў ён.

Сяргей Сівец акцэнтаваў увагу на тым, што для працэсу эфектыўнай рэалізацыі планаў не трэба ўсталёўваць ніякія адміністрацыйныя перашкоды. 

— Каб мы мелі магчымасць нават у межах мытных праваадносінаў спакойна пераадольваць тэрыторыю ў рамках саюзнай прасторы, каб не стваралі дадатковыя складанасці для нашых грамадзян у частцы рэалізацыі сацыяльна-эканамічных правоў, — патлумачыў ён і зрабіў слушную выснову . — Гэта ўсё зроблена, я лічу, своечасова і гэта пойдзе на карысць нашаму далейшаму інтэграцыйнаму супрацоўніцтву і развіццю Саюзнай дзяржавы. 

Вольга АНУФРЫЕВА

Прэв’ю: БелТА