Цана на пуцёўкі ў беларускіх санаторыях застаецца амаль нязменнай у параўнанні з канцом мінулага года, і на першыя месяцы лета больш за палову месцаў у нашых здраўніцах ужо забраніравана. Цікавасць да аздараўлення ў нашай краіне павялічылася, у тым ліку і з боку расіян, літаральна за два апошнія тыдні — яны актыўна цікавяцца пуцёўкамі і прыязджаюць. Чаго чакаць тым, хто збіраецца гэтым летам адпачыць у беларускім санаторыі, расказаў дырэктар Рэспубліканскага цэнтра па аздараўленні і санаторна-курортным лячэнні Генадзь Балбатоўскі.
Падводзячы вынікі пачатку гэтага года, ён адзначыў, што сістэма санаторна-курортнага аздараўлення працавала стабільна, і на адпачынак у санаторыях захоўваўся устойлівы попыт. Запаўняльнасць здраўніц павялічылася ў параўнанні з першым кварталам мінулага года і складае каля 70 %.
— Гэта адпавядае рэкамендацыям Рэспубліканскага цэнтра па аздараўленні і санаторна-курортным лячэнні, накіраваным на тое, каб санаторыі працавалі ў рэжыме санітарна-гігіенічнага дабрабыту. У першым квартале гэтага года былі выяўлены адзінкавыя завозныя выпадкі каранавіруснай інфекцыі пры тым, што сёння запаўняльнасць складае 73 %. Гэта значыць, аднамомантна ў санаторыях знаходзіцца каля 19 тысяч адпачывальнікаў і 15 тысяч работнікаў. Сёння нашы санаторна-курортныя ўстановы з'яўляюцца дастаткова бяспечнымі месцамі знаходжання, — падкрэсліў Генадзь Балбатоўскі.
У параўнанні з аналагічным перыядам мінулага года рэалізацыя пуцёвак сёлета павялічылася на 10 %. На столькі ж вырасла і выручка, якая склала звыш 120 мільёнаў рублёў. На 15 % павялічыўся экспарт паслуг. А колькасць замежнікаў у беларускіх санаторыях павялічылася з 15 тысяч (за першы квартал 2021 года) да 22 тысяч (у другім квартале 2022-га). Выручка ад экспарту паслуг таксама вырасла на 14 % і складае больш за 17 мільёнаў рублёў.
— Сістэма функцыянуе стабільна і выконвае ўсе сацыяльныя праекты і дзяржпраграмы, — адзначыў Генадзь Балбатоўскі.
На гэтым тыдні школьнікі пайшлі на вясеннія канікулы, і ўсім ахвотным дадзена магчымасць правесці іх у аздараўленчых лагерах. Каля 61 тысячы юных беларусаў гэтым скарысталіся. Рэспубліканскі цэнтр па аздараўленні і санаторна-курортным лячэнні выдаткаваў на гэтыя мэты каля 1,5 мільёна рублёў.
А вось летам у лагерах адпачыць плануе каля 350 тысяч школьнікаў. Папярэднія заяўкі з рэгіёнаў прааналізаваны, і попыт будзе задаволены цалкам.
Пуцёўкі на летні перыяд ужо цяпер актыўна прадаюцца. На чэрвень і ліпень, у прыватнасці, забраніравана 50—60 % месцаў. Таму ўсім ахвотным правесці адпачынак у беларускай здраўніцы варта пра гэта падумаць сёння. Тым больш што пакуль пуцёўкі рэалізуюцца па фіксаванай заяўленай цане.
— Ёсць цікавасць і з боку замежнікаў, — заўважае Генадзь Балбатоўскі. — За два апошнія тыдні іх колькасць павялічылася ўдвая. На сёння колькасць замежных грамадзян у нашых санаторыях (а большую частку з іх складаюць расіяне) перавышае 2200 чалавек. Напэўна, паўплывала зняцце каранавірусных абмежаванняў, хоць для аздараўлення іх і не існавала. Аднак, напэўна, для многіх гэта было фактарам стрымлівання.
Сярэдняя цана 1 ложка-дня ў двухмесным нумары складае 69 рублёў. У параўнанні са снежнем 2021 года яна вырасла ўсяго на дзясятыя долі працэнта. Паводле прагнозаў, летам у сувязі з павышаным попытам цана зменіцца на 2-3 % — да 72 рублёў у дзень.
Нагадаем, што шэраг катэгорый грамадзян маюць ільготы на аздараўленне ў беларускіх здраўніцах. Для іх пуцёўка каштуе значна танней. Іх штогод атрымліваюць каля 700—800 тысяч беларусаў. Найперш гэта дзеці (яны маюць права бясплатнага аздараўлення), таксама інваліды 1-2 груп і шэраг іншых катэгорый. Прэтэндаваць на частковую аплату могуць нават працоўныя грамадзяне, якія маюць хранічныя захворванні і адпаведна права на кампенсацыю аздараўлення.
Сёння ў Беларусі 15 санаторыяў маюць найвышэйшую катэгорыю, а значыць, найлепшую матэрыяльна-тэхнічную базу і паслугі самай высокай якасці. Па выніках мінулагодняга конкурсу «Пазнай Беларусь», які праводзіла Міністэрства спорту і турызму сумесна з Рэспубліканскім цэнтрам па аздараўленні і санаторна-курортным лячэнні, найлепшымі санаторыямі сталі «Юнацтва» і «Пліса». А ўлічваючы сацыяльныя складнікі, лідарам па выніках работы ў 2021 годзе прызнаны «Радон». Каля 75 беларускіх здраўніц прапануюць спецыяльныя праграмы і дадатковыя паслугі па аднаўленні пасля каранавіруснай інфекцыі.
Алена КРАВЕЦ
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
