Мабільную праграму «Дзённік падарожніка» распрацоўваюць для школьнікаў

Мабільную праграму «Дзённік падарожніка» распрацоўваюць для школьнікаў. Аб гэтым расказала намеснік дырэктара па метадычнай рабоце Рэспубліканскага цэнтра экалогіі і краязнаўства Лідзія Жур падчас праведзенага круглага стала ў БелТА.

«Гэта аналаг папяровага варыянта дзённіка падарожніка: у ім можна будзе ў электронным выглядзе аформіць інфармацыю аб тых мясцінах воінскай славы, якія дзеці наведалі. Мы пакуль знаходзімся на пачатковай стадыі распрацоўкі, але многім ужо цікава. Дзеці, асабліва малодшага школьнага ўзросту, любяць па-мастацку афармляць свае работы, што дазваляе лепш запомніць, адкласці ў памяці тое, што ім удалося ўбачыць. І дадатак будзе гэтаму толькі спрыяць», — паведаміла Лідзія Жур.

Паводле яе слоў, у Беларусі вялікая ўвага аддаецца адукацыйнаму турызму. У краіне рэалізоўваецца пілотны праект, дзякуючы якому дзеці бясплатна могуць наведваць разнастайныя аб'екты, у тым ліку ваенна-гістарычныя, якія вывучаюцца ў рамках школьнай праграмы. Такая праграма распрацавана і для студэнтаў ВНУ. Сёння акцэнт у адукацыі робіцца на развіццё анлайн-формаў. «Дзеці любяць такі падыход, яны зацікаўленыя, самі імкнуцца ўдзельнічаць, ствараюць 3D-музеі. Дарэчы, апошнім часам мы працуем над стварэннем адзінай інфармацыйнай платформы «Патрыёт.by», да яе падключана больш як 70 устаноў адукацыі. Платформа дае магчымасць вялікай колькасці людзей далучацца да розных мерапрыемстваў і пры гэтым быць не проста слухачамі, а актыўна ўключацца ў працэс», — дадала намеснік дырэктара Рэспубліканскага цэнтра экалогіі і краязнаўства.

Разам з пошукам новых формаў работы працягваецца рэалізацыя ўжо звыклых. «Праводзяцца інфармацыйныя гадзіны, дыспуты, прэс-канферэнцыі, інтэграваныя ўрокі. Працуе больш за 400 пошукавых аб'яднанняў, якія непасрэдна займаюцца пошукава-даследчай дзейнасцю, удзельнічаюць у раскопках згодна з заканадаўствам. Яны ахопліваюць больш як 4 тысячы навучэнцаў. Працягваюць работу ваенна-патрыятычныя клубы, пастаянна адкрываюцца новыя. Дзеці з задавальненнем іх наведваюць. І, безумоўна, Міністэрства абароны прыкладае ўсе намаганні, каб ім было цікава.

Таксама школьнікі вядуць пошукавую работу на базе музеяў ва ўстановах адукацыі У краіне такіх налічваецца каля 1,5 тысячы, з іх больш за 200 мае ваенна-гістарычную накіраванасць. Матэрыялы для іх збіраюць у тым ліку самі дзеці. Яны знаходзяць інфармацыю аб сваіх блізкіх, земляках, у іх з'яўляецца вялікая цікавасць да гэтай тэмы.

Для эфектыўнай работы ў сферы патрыятычнага выхавання можна выкарыстоўваць метад структураванай драмы. Аб гэтым расказала падчас круглага стала метадыст вышэйшай катэгорыі ўпраўлення вучэбна-метадычнай работы Акадэміі паслядыпломнай адукацыі Венера Варановіч.

«Гэта новая форма і падыход, сутнасць якога ў тым, каб спазнаваць і вывучаць нешта праз эмоцыі і пачуцці. Ужо прайшоў шэраг семінараў. Так, на адным з іх мы разбіралі подзвіг Мікалая Кісялёва, які вывеў за лінію фронту праз Суражскія вароты больш за 200 чалавек. На базе дакументаў, успамінаў удзельнікі семінара пераўвасабляліся ў дзеючых асоб гісторыі. Эмоцыі прапускалі праз сябе, што дазваляе дасягаць патрэбнага выніку», — удакладніла Венера Варановіч.

Яна таксама паведаміла, што набірае ўсё большую папулярнасць такая форма работы, калі ў анлайн-фармаце ўзаемадзейнічае некалькі ўстаноў. Напрыклад, непасрэдна на ўроку праходзіць анлайн-экскурсія па музеі гісторыі Вялікай Айчыннай вайны, зносіны з экскурсаводам. Ёсць падобная практыка і ў Брэсцкай крэпасці. Ці калі школы праводзяць сумесныя анлайн-заняткі. Дзеці атрымліваюць заданні, разам працуюць і пазней абмяркоўваюць атрыманыя вынікі.

Надзея НІКАЛАЕВА