З нагоды Дня яднання народаў Беларусі і Расіі Гомельшчыну з афіцыйным візітам наведвае дэлегацыя Бранскай вобласці.
Як вядома, тыдзень таму расійскія суседзі прымалі на Браншчыне гомельскіх гасцей. Старшыня Гомельскага аблвыканкама Іван Крупко і губернатар Бранскай вобласці Аляксандр Багамаз дамовіліся аб развіцці сумесных праектаў у будаўніцтве, сферах адукацыі і спорту. Аб тым, што бакі гатовыя абмяркоўваць любыя прапановы па актывізацыі ўзаемавыгаднага супрацоўніцтва, пайшла гаворка і падчас сустрэчы бранскай дэлегацыі ў Гомельскім аблвыканкаме.
Кіраўнік Гомельскай вобласці Іван Крупко адзначыў, што па аб’ёме інвестыцый у эканоміку паўднёва-усходняга беларускага рэгіёну Расійская Федэрацыя займае першае месца. На Гомельшчыне зарэгістравана 426 прадпрыемстваў з расійскім капіталам.
— Расійская Федэрацыя — наш асноўны партнёр. Падпісаны пагадненні з 28 рэгіёнамі Расіі, а доля ў тавараабароце складае 60 %. Прычым за 2021 год гэты паказчык вырас на 137%. Асабліва хацеў бы адзначыць той факт, што Расійская Федэрацыя займае першае месца па аб’ёмах інвестыцый у наш рэгіён, — падкрэсліў Іван Крупко. — У цяперашняй сітуацыі трэба ствараць новыя сумесныя вытворчасці, каб нашы рэгіёны развіваліся, а дабрабыт людзей павялічваўся.
Губернатар Бранскай вобласці Аляксандр Багамаз выказаў упэўненасць у тым, што поспех у супрацоўніцтве паміж рэгіёнамі грунтуецца ў тым ліку на ўзаемным даверы і павазе.
Падчас візіту ў Гомель дэлегацыя Бранскай вобласці наведала прадпрыемствы-флагманы абласнога цэнтра ААТ «Гомсельмаш» і ААТ «Спартак».
Сімвалічным напярэдадні Дня яднання народаў Беларусі і Расіі стаў удзел гамяльчан і гасцей з Браншчыны ў мітынгу каля мемарыяльнага комплексу «Алея Герояў» у Гомелі. Губернатары регіёнаў аддалі даніну памяці 38 Героям Савецкага Саюза і тром Поўным кавалерам ордэна Славы, якія звязалі сваё жыццё з Гомелем. Агульная памяць аб вайне, агульныя боль і смутак аб загінулых, агульная радасць Перамогі заўсёды будуць жыць адзіна ў сэрцах беларусаў і расіян. Такімі словамі завяршылася ўрачыстая цырымонія ўскладання кветак і вянкоў на мемарыяле.
Гасцей з Браншчыны чакалі таксама ў сярэдняй школе № 75 Гомеля: адна з самых маладых устаноў адукацыі абласнога цэнтра падпісала пагадненне аб супрацоўніцтве з сярэдняй агульнаадукацыйнай школай № 71 Бранска.
Для губернатараў Гомельскай і Бранскай абласцей прайшла экскурсія па, сапраўды, адукацыйным мультыкомплексе. У знак шматгадовага сяброўства абласцей кіраўнікі рэгіёнаў пакінулі адпячаткі сваіх далоняў на школьных дрэвах адзінства. Дарэчы, з просьбай аб падпісанні дакумента аб пабрацімстве да Івана Крупко падчас яго рабочай паездкі ў Бранск звярнуліся юныя карэспандэнты школьнай газеты. І вось, пажаданне дзяцей выканана.
— Важна, каб моладзь нашых краін была аб’яднана ў навуцы, адукацыі культуры і спорце. Акрамя таго, мы павінны выхоўваць яе на гістарычных традыцыях нашых продкаў, каб не забыліся важныя этапы мінулага, — адзначыў падчас наведвання гомельскай школы губернатар Бранскай вобласці Аляксандр Багамаз.
Кіраўнікі Гомельскага і Бранскага рэгіёнаў адкрылі таварыскі турнір паміж камандамі дзвюх абласцей па хакеі. Спаборніцтвы, прымеркаваныя да Дня яднання народаў Беларусі і Расіі, праходзяць у Гомельскім лядовым палацы. Удзельнікаў спаборніцтваў віталі Іван Крупко і Аляксандр Багамаз. Яны выказалі спадзяванне, што турнір стане традыцыйным, бо менавіта спорт ва ўсе часы аб’ядноўваў людзей.
Між тым падчас прыёму дэлегацыі Бранскай вобласці Іван Крупко запрасіў расійскага калегу Аляксандра Багамаза на Рэгіянальны бізнес-форум «Гомель — Бранск», які пройдзе 20 мая.
Кіраўнік Бранскай вобласці падзякаваў за цёплы прыём на Гомельшчыне і выказаў упэўненасць у тым, што будзе выканана ўсё намечанае ў супрацоўніцтве беларускага і расійскага рэгіёнаў.
Наталля КАПРЫЛЕНКА
Фота аўтара
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.