Вы тут

Смарт-тэхналогіі і добрасуседства пад адкрытым небам


​Савет Рэспублікі працягвае падрыхтоўку да ІХ Форума рэгіёнаў Беларусі і Расіі. Пасля сумеснага пасяджэння з расійскім бокам беларускія сенатары адпрацоўваюць кожную з шасці секцый. На чарговай нарадзе на мінулым тыдні пад кіраўніцтвам старшыні Пастаяннай камісіі Савета Рэспублікі па адукацыі, навуцы, культуры і сацыяльным развіцці Віктара Лісковіча разглядзелі падрыхтоўку пятай секцыі. Яна будзе асвятляць пытанні інтэграцыі вышэйшай адукацыі рэгіёнаў дзвюх краін. Пройдзе пасяджэнне секцыі ў Гродзенскім дзяржаўным універсітэце імя Янкі Купалы. 


«Мы імкнёмся падыйсці да падрыхтоўкі дадзенай секцыі так, каб лепшае, што ёсць у кожнай з нашых краін, нашых рэгіёнаў было карысна і запатрабавана адзін адным і ў канечным выніку служыла развіццю сістэмы вышэйшай адукацыі ў Саюзнай дзяржаве, выхаванню маладых людзей і атрыманню імі неабходных ведаў», — сказаў член Савета Рэспублікі.

Плануецца, што на секцыі з кожнага боку выступяць па восем дакладчыкаў. Іх тэзісы будуць строга рэгламентаваны часам — не больш за пяць мінут, каб даць слова ўсім і не збіцца з падрыхтаванай праграмы.
«Неабходна адзначыць, што запланавана вялізная праграма. Падрыхтаваны ў ёй не толькі разгляд дакладаў, правядзенне навукова-практычнай канферэнцыі. Акрамя таго, у холе галоўнага корпуса ўніверсітэта будзе разгорнутая вялікая выстаўка. Удзел у ёй прымуць больш за 20 ВНУ нашай краіны і Расіі. Прысвечана выстаўка будзе развіццю смарт-тэхналогій, смарт-абсталявання і смарт-ўніверсітэта. То бок, гэта тыя інавацыі, якія неабходны сёння для разумнай эканомікі і лічбавай прасторы», — расказаў журналістам Віктар Лісковіч.

Таксама ён дадаў, што ў гарадскім парку Ж.Э.Жылібера, які мяжуе з Гродзенскім дзяржаўным універсітэтам, плануецца разгарнуць выстаўку «Добрасуседства пад адкрытым небам». Яна будзе змяшчаць чатыры інтэрактыўныя пляцоўкі — «Славянскі карагод», «Дарогамі Перамогі», «Адукацыя — найлепшае багацце», «О, Спорт — ты мір». Кожная з іх прапануе майстар-класы, флэшмобы, канцэртныя і спартыўныя выступленні, адукацыйныя акцыі, конкурсы і інтэлектуальныя гульні. 

Па словах сенатара, праз кожную з пляцовак будзе праходзіць тэма гістарычнай памяці. «Мы пакажам, як развівалася адукацыя ў Савецкім Саюзе, Беларусі, чаго яна ўжо дасягнула, будзем размаўляць пра гісторыю Беларусі і Савецкага Саюза, пра герояў, якія адстаялі Перамогу ў Вялікай Айчыннай вайне. Вельмі разлічваем, што пляцоўку ў парку наведаюць гараджане, госці горада, вучні школ і іншых устаноў адукацыі», — падзяліўся сенатар.

У рамках секцыі прадугледжана падпісанне дзесяці пагадненняў аб супрацоўніцтве паміж беларускімі і расійскімі ВНУ з Масквы, Санкт-Пецярбурга, Смаленска, Новакузнецка, Томска, Уладзівастока. Так, напрыклад, плануецца, што адпаведнымі дакументамі абмяняюцца мінскі БДЭУ і Дзяржаўны ўніверсітэт кіравання (Масква), Гродзенскі «мед» і Ціхаакіянскі «мед» (Уладзівасток), Беларуская дзяржаўная акадэмія музыкі і Дзяржаўны інстытут мастацтвазнаўства (Масква). Як дадаў Віктар Лісковіч, такія сувязі дапамогуць інтэгравацца навуковым і вучэбных распрацоўкам, уніфікаваць падыходы да абучэння моладзі.

«Сёння пытанні сумеснага навучання ў беларускіх і расійскіх ВНУ ўжо абумоўлены адпаведнымі нарматыўнымі дакументамі. Мы, канешне, будзем прапаноўваць да разгляду ўрадамі варыянты, каб на парытэтнай аснове нашы дзеці маглі атрымліваць адукацыю ў ВНУ Беларусі і Расіі», — сказаў старшыня Пастаяннай камісіі Савета Рэспублікі.

ІХ Форум рэгіёнаў Беларусі і Расіі пройдзе з 23 па 24 чэрвеня ў Гродне. Ён будзе складацца з шасці секцыі, на якіх разгледзяць наступныя пытанні: развіццё навукі, інтэграцыю адукацыі, узаемадзеянне ў аграпрамысловым комплексе, узаемадзеянне Маладзёжных парламентаў, эканамічную інтэграцыю (заключэнне пагадненняў паміж прадпрыемствамі, міністэрствамі і ведамствамі), заканадаўчае рэгуляванне дзейнасці Саюзнай дзяржавы.

Марыя ДАДАЛКА

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Зоркі абяцаюць шмат прыемных момантаў і добрых навін для Блізнятаў.

Памяць

Партызанскі ўнёсак у «Баграціён»

Партызанскі ўнёсак у «Баграціён»

Беларуская наступальная аперацыя пачалася 23 чэрвеня 1944 года.