Пра важнасць даверу ў рабоце, тыл і перадавую ў гарачы сельскагаспадарчы сезон, а таксама пра мары расказалі ўдзельнікі ўнікальнага губернатарскага праекта «З рэзерву — у кіраўнікі», які набірае абароты на Гомельшчыне.
Для Ігара Сцяпанава як для сапраўднага аграрыя час і прастора — катэгорыі не фізічныя, але жыццёвыя. Цяпер — асабліва. Бо новы статус давялося прымяраць у самы напружаны час, пасяўную. Былы галоўны аграном, а цяпер намеснік кіраўніка УСП «СлаўМол» Гомельскага раёна — адзін з удзельнікаў праекта «З рэзерву — у кіраўнікі». Ён з ліку тых дзевяці, якія атрымалі новыя пасады ў сваіх гаспадарках.
— У рабоце нічога не змянілася, але вырасла адказнасць за людзей, за выкананне работы. Цяпер унікаю адразу ва ўсе галіны — жывёлагадоўля, раслінаводства і механізацыя, — расказвае рэзервіст па тэлефоне.
Звязацца з ім было складана. У кабінеце не заспець. На рабоце з сямі гадзін і, як кажа, да ўпору. Мабільны тэлефон ужо з раніцы гарачы ад званкоў. Але галава халодная, і кружыцца ёй няма калі, запэўнівае 28-гадовы суразмоўнік.
— Адказваю цяпер за ўсіх у гаспадарцы, а гэта 380 чалавек. Паралельна асвойваю праграму падрыхтоўкі. Адначасова буду праходзіць завочнае навучанне на птушкафабрыцы «Світанак», — тлумачыць Ігар Сцяпанаў.
У роднай гаспадарцы ён вырас з брыгадзіра паляводчай брыгады да галоўнага агранома. Кажа, што заўсёды адчуваў: дыплом сельскагаспадарчага ўніверсітэта — добра, але веды лішнімі не бываюць. Таму актыўна цікавіўся сумежнымі напрамкамі сельскай гаспадаркі. Работа на зямлі для яго — цалкам асэнсаваная жыццёвая пазіцыя. Сканцэнтравацца на ёй дапамагае і надзейны тыл. Гатовыя маральна падтрымаць у новым жыццёвым рытме жонка з сынам і бацькі, якія, дарэчы, усё жыццё прапрацавалі ў той жа арганізацыі, што і сын.
Праект «З рэзерву — у кіраўнікі» — шанц, упэўнены Ігар Сцяпанаў, для такіх жа, як ён, маладых аграрыяў, якія мараць вывесці айчынную сельскую гаспадарку на новы ўзровень. Праект — перафармаціраваная «Школа маладога кіраўніка», якая з 2018 года працавала ў рэгіёне. Старшыня аблвыканкама Іван Крупко выступіў з ініцыятывай перагледзець падыходы ў рабоце з рэзервістамі і сканцэнтравацца на падрыхтоўцы кіраўнікоў-аграрыяў.
Губернатар акрэсліў задачу для ўсіх кадравых службаў раёнаў: вырашэнне праблемы дэфіцыту кіруючых кадраў у АПК патрабуе нетрывіяльных падыходаў. На Гомельшчыне ёсць прыклады моцных сельгаспрадпрыемстваў, у кіраўнікоў такіх гаспадарак перспектыўныя маладыя спецыялісты могуць прайсці школу менеджменту і праявіць сябе.
Нагадаем, што ў лютым жаданне ўдзельнічаць у праекце «З рэзерву — у кіраўнікі» выказала каля 300 аграрыяў. У фінал выйшлі 24 — тыя, хто вытрымаў экзамены асабіста ў старшыні аблвыканкама Івана Крупко. Шэсць чалавек выказалі жаданне адразу заступіць на пасады дырэктараў сельгаспрадпрыемстваў. Астатнія былі размеркаваныя ў паспяховыя базавыя сельгасарганізацыі намеснікамі кіраўнікоў. Так унікальны кадравы праект ахапіў 25 гаспадарак 15 раёнаў Гомельшчыны.
На Мазыршчыне ў праекце ўдзельнічаюць чатыры базавыя сельгасарганізацыі. У «Козенках-Агра» прынялі Уладзіміра Грыба. Аграном з Калінкавіцкага раёна лічыць, што яму вельмі пашанцавала. Яго настаўнік Сяргей Сінькевіч — у прафесіі амаль 40 гадоў, пры гэтым не стамляецца вучыцца і развівацца, гатовы дзяліцца сакрэтамі паспяховай работы і ўзаемадзеяння з калектывам. Удзельнік праекта «З рэзерву — у кіраўнікі» Андрэй Чарнякоў прызначаны ў гаспадарку «Хутар-Агра» Светлагорскага раёна. Новага работніка забяспечылі жыллём. Рэзервіст прызнаўся, што даўно задумваўся пра кар'еру, але толькі падчас асабістай сустрэчы з губернатарам канчаткова зразумеў для сябе: гатовы, хоча і можа.
Згодна з праграмай праекта рэзервісты будуць стажыравацца на пасадзе намесніка кіраўніка на працягу шасці месяцаў. Акрэслены і канкрэтныя задачы для іх: пашыраць веды па асноўнай прафесіі і напрацоўваць вопыт па іншых, у тым ліку па эканоміцы і жывёлагадоўлі, адпрацаваць усе працэсы пасяўной і ўборачнай кампаній. Таксама ў праекце прадугледжаны тэарэтычная частка і экзамены.
Паводле ацэнкі кіраўніка рэгіёна, 70-80 % удзельнікаў да канца года змогуць упэўнена ўзначаліць любую мясцовую сельскагаспадарчую арганізацыю.
Сярод тых удзельнікаў, што былі адразу прызначаны на пасады кіраўнікоў гаспадарак, новы дырэктар ААТ «Вялікастралкоўскі» Рагачоўскага раёна Андрэй Трафімаў. 26-гадовы аграрый у сваёй гаспадарцы «Мормаль» Жлобінскага раёна з пасады галоўнага інжынера быў прызначаны начальнікам сельгасучастка, цяпер ён запрошаны Рагачоўскім райвыканкамам на пасаду кіраўніка гаспадаркі.
Максім Чыкуноў спачатку разлічваў пайсці намеснікам дырэктара на найлепшае ў сваім раёне прадпрыемства «Беларусьнафта-Асобіна», а пасля экзамену ад губернатара пагадзіўся прыехаць на Веткаўшчыну, каб узначаліць ААТ «Нямкі».
Як адзначылі новыя кіраўнікі, на даручаных прадпрыемствах яны нацэленыя на стварэнне моцнай каманды, выкананне тэхналагічнай дысцыпліны, беражлівае стаўленне да тэхнікі і рэсурсаў. У рабоце мараць дастойна вытрымаць поўны цыкл усіх сельскагаспадарчых работ. Пасля — зрабіць дэталёвую работу над памылкамі, а ў наступны сезон увайсці са сваім калектывам як з моцнай камандай. Між тым, вядома, што кожны прызначаны цяпер малады кіраўнік гаспадаркі будзе забяспечаны ўсебаковай падтрымкай аблвыканкама, можа разлічваць на матэрыяльную, тэхнічную і любую кансультацыйную дапамогу.
Па выніках работы будуць заахвочаны і кіраўнікі гаспадарак, якія ўзялі да сябе на работу новых рэзервістаў.
Наталля КАПРЫЛЕНКА
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
