Старшыня Палаты прадстаўнікоў Уладзімір Андрэйчанка і пасол Расійскай Федэрацыі Барыс Грызлоў абмеркавалі пытанні двухбаковага супрацоўніцтва.
Вітаючы пасла ў Палаце прадстаўнікоў Уладзімір Андрэйчанка на афіцыйным узроўні павіншаваў Барыса Грызлова з пачаткам дыпламатычнай місіі ў нашай краіне. Спікер ніжняй палаты парламента заўважыў, што пасол добра ведае нашу краіну, а таму разумее, якое важнае значэнне для нас мае развіццё, а таксама паглыбленне беларуска-расійскага супрацоўніцтва.
— Асабліва ў гэты няпросты час, калі аказваецца беспрэцэндэнтны ціск, эканамічная блакада, будзем казаць — удушэнне Беларусі і Расіі шляхам санкцый, шантажу, — акцэнтаваў увагу Уладзімір Андрэйчанка. — Па сутнасці, сёння развязана інфармацыйная і эканамічная вайна супраць Рэспублікі Беларусь і Расійскай Федэрацыі. Я ўпэўнены, што мы выстаім і будзем наймацнейшымі.
Адказ на гэтыя пагрозы, па словах Старшыні Палаты прадстаўнікоў, відавочны: па выніках мінулага года ў дзвюх краін склаўся таваразварот больш чым на 40 млрд долараў. У бягучым годзе рост таваразвароту — практычна 30 % да ўзроўню двух месяцаў мінулага года. Прычым 80 % узаемных разліках паміж суб’ектамі гаспадарання адбываецца ў нацыянальнай валюце.
«Важна, што сёння і расійскія калегі, і мы актыўна працуем над пытаннямі саюзнага будаўніцтва, — падкрэсліў Уладзімір Андрэйчанка. — Аснова створана вельмі добрая — гэта 28 саюзных праграм, зацверджаных дэкрэтам Вышэйшага Дзяржсавета. Асабліва важна, каб мы глядзелі ў заўтрашні дзень. Мы павінны сёння выбудоўваць новую доўгатэрміновую стратэгію развіцця Саюзнай дзяржавы з улікам бягучых абставін. Вялікая работа, якая ўжо пачалася, чакаецца па ўнясенні змяненняў і дапаўненняў, па збліжэнні нашых нацыянальных заканадаўстваў».
У межах 28 галіновых праграм па будаўніцтве Саюзнай дзяржавы плануецца прыняць да 400 законаў: маюцца на ўвазе і законы ў Расіі, і законы ў Беларусі. Акрамя таго, на сустрэчы абмеркавалі пытанні, якія датычацца бюджэту Саюзнай дзяржавы. На цяперашні момант ён складае каля 5 млрд расійскіх рублёў у год.
— У сувязі з тым, што ўзмацнілася наша ўзаемадзеянне ў межах пабудовы Саюзнай дзяржавы, неабходна будзе на 2023 год казаць аб павелічэнні бюджэту і насычэнні яго новымі праграмамі, — адзначыў Надзвычайны і Паўнамоцны Пасол Расійскай Федэрацыі ў Рэспубліцы Беларусь Барыс Грызлоў, удакладніўшы, што Мінск з’яўляецца для яго дарагім і родным горадам, дзе ён быў ужо звыш 50 разоў. — На ўсіх узроўнях расійска-беларускія адносіны выйшлі на вельмі высокую планку. Па лініі ААН і шматлікіх міжнародных арганізацый заўсёды прадстаўнікі Расіі і Беларусі галасуюць аднолькава. У нас не тое, што падобныя, у нас аднолькавыя пазіцыі. У апошні час вельмі частыя сустрэчы і кіраўнікоў нашых краін. Рэгіёны Расійскай Федарацыі рэгулярна прыязджаюць у Рэспубліку Беларусь для таго, каб абмеркаваць пытанні ўзаемадзеяння ў галіне прамысловасці, культурнай і спартыўнай дзейнасці. Гэтыя візіты не толькі дзеля таго, каб адзначыць нашы добрыя адносіны, а яшчэ і павышаць таваразварот. Важна і тое, што ва ўмовах такога санкцыйнага ціску, які аказвае на нас калектыўны Захад на чале з ЗША, мы знаходзім магчымасці імпартазамяшчэння. Гэта важны кірунак, які прывядзе да таго, што мы на працягу бягучага, магчыма, паловы наступнага года пазбавімся ад імпартных вырабаў у вытворчасці нашай прадукцыі. Гэта толькі ўзмацніць нас.
Падчас сустрэчы беларускі бок праанансаваў міжнародную канферэнцыю, прысвечаную Перамозе савецкага народа ў Вялікай Айчыннай вайне, якая адбудзецца сёлета.
Вераніка КАНЮТА
Фота БелТА
Існуюць строгія патрабаванні да месцаў для купання.
Яе песні займаюць першыя радкі ў музычных чартах краіны, пастаянна гучаць на радыё і тэлебачанні.
