Лісковіч: Праект «Поезд Памяці» павінен стаць цікавым і карысным для дзяцей

Сёння пад кіраўніцтвам старшыні Пастаяннай камісіі Савета Рэспублікі па адукацыі, навуцы, культуры і сацыяльным развіцці Віктара Лісковіча праходзіць нарада па пытаннях падрыхтоўкі сумеснага беларуска-расійскага праекта «Поезд Памяці», перадае БелТА.

У мерапрыемстве прымае ўдзел расійская дэлегацыя на чале з першым намеснікам кіраўніка Апарату Савета Федэрацыі Федэральнага сходу Расіі Львом Шчарбаковым.

Праект ініцыяваны кіраўнікамі верхніх палат парламентаў Беларусі і Расіі — старшынёй Савета Рэспублікі Нацыянальнага сходу Рэспублікі Беларусь Наталляй Качанавай і старшынёй Савета Федэрацыі Расійскай Федэрацыі Валянцінай Мацвіенка.

Удзельнікамі патрыятычнага праекта «Поезд Памяці» стануць 200 беларускіх і расійскіх школьнікаў, па 100 ад кожнай краіны, якія змогуць наведаць некалькі гарадоў дзвюх краін. Школьнікі азнаёмяцца з асноўнымі вехамі Вялікай Айчыннай вайны, да якіх прывязаны маршрут руху поезда, адбудуцца сустрэчы дзяцей з ветэранамі, наведванне музеяў, рэканструкцыі ваенных падзей, асветныя і культурныя мерапрыемствы. Задача праекта — не толькі расказваць пра вайну, але і аб’ядноўваць моладзь дзвюх краін.

«Па-першае, дзеці змогуць паразмаўляць, актыўна правесці час, па-другое, наведаюць гістарычныя выдатныя мясціны кожнага з гарадоў. Яны прымуць удзел у мітынгу-рэквіеме ў Брэсцкай крэпасці 22 чэрвеня, у рэканструкцыі баёў на Кобрынскім умацаванні, наведаюць “Лінію Сталіна”, прымуць удзел у мерапрыемствах 3 ліпеня ў горадзе Мінску. У Расійскай Федэрацыі мы з дзецьмі наведаем Маскву, Санкт — Пецярбург, Вялікі Ноўгарад, Смаленск, Ржэў і шэраг іншых гарадоў», — адзначыў Віктар Лісковіч.

Сенатар выказаў надзею, што гэты праект стане традыцыйным, а геаграфія маршруту будзе пастаянна пашырацца. «Самае галоўнае — гэтым праектам мы хочам захаваць гістарычную памяць аб тых, хто абараняў нашу радзіму ў гады ВАВ, хто аддаваў сваё жыццё, каб мы з вамі жылі ў мірнай, спакойнай дзяржаве, — падкрэсліў ён. — У рэалізацыі праекта задзейнічаны шэраг міністэрстваў і ведамстваў: Міністэрства адукацыі, Беларуская чыгунка, Міністэрства культуры, абласныя выканаўчыя камітэты. У кожнай вобласці курыруе гэту работу намеснік старшыні абласнога выканаўчага камітэта. Гэта значыць, мы разумеем важнасць праекта і хочам яго зрабіць цікавым і карысным для дзяцей».

Праект пройдзе ў дні IX Форуму рэгіёнаў Беларусі і Расіі. Як паведамлялася, «Цягнік Памяці» стартуе 22 чэрвеня ў Брэсце, праедзе па гарадах Беларусі і Расіі і фінішуе ў Мінску 3 ліпеня.