Вы тут

Агледзіны найцікавейшага на «Рэктарскім праглядзе»


Жадаючыя пазнаёміцца са спробамі маладых мастакоў да 13 мая могуць наведаць ужо традыцыйны для Беларускай дзяржаўнай акадэміі мастацтваў «Рэктарскі прагляд». Гэта экспазіцыя твораў студэнтаў мастацкага факультэта і факультэта дызайну і дэкаратыўна-прыкладнога мастацтва ў выставачнай зале «KODEX» (вул. Сурганава 14а, 4 паверх).


Ганна Раманенка «Жыццё ў горадзе», 2021 г.

Рэктарскі прагляд — традыцыйны другі этап галоўнага экзамену па асноўных спецыяльнасцях у мастацкіх ВНУ пры ўдзеле рэктара (прарэктара), які ажыццяўляецца два разы ў навучальным годзе, па выніках зімовай і летняй сесій. На праглядзе, які адбываецца ў фармаце дэманстрацыі выкананых — згодна з адукацыйнымі праграмамі — студэнцкіх твораў у навучальных памяшканнях БДАМ, камісіяй вызначаецца ўзровень дасягненняў кожнага студэнта на абраным шляху.

Звычайна такая выстаўка закранае ўсіх студэнтаў мастацкага факультэта, экспануецца толькі ў вучэбных аўдыторыях (майстэрнях) і працягваецца два дні. Чарговы раз найлепшыя творы па выніках экзаменацыйных праглядаў былі сфарміраваны ў экспазіцыю і пададзены ў прафесійнай выставачнай прасторы. Каардынатарам выступіла Ганна Конанава, прарэктар па вучэбнай рабоце, кандыдат мастацтвазнаўства.

Так, экспазіцыю склалі некалькі дзясяткаў работ, у аснове — жывапіс і графіка, хапае твораў з дрэва і шкла. Некалькі слоў пра найбольш запамінальныя кампазіцыі... А гэта ярка-метафарычная «Лірыка» (2022) Юліі Ураблеўскай, рэалістычнае «Жыццё ў горадзе» (2021) Ганны Раманенкі, манахромны «Пейзаж» (2022) Аліны Парфяновіч, мяккі «Нацюрморт» (2021) Марты Шчэрбіч... Перагукаюцца з традыцыяй многія работы, у тым ліку «Горад» (2021) Карыны Леонавай. На карціне глядач нібы стаіць па-за героем, робіцца выпадковым ці вымушаным — тут як каму падабаецца — суразмоўцам. Асаблівай таямніцы назіральнік не спазнае, наяўны герой, твар якога мы не бачым, углядаецца ў гарадскі краявід. Мяркуючы па вокнах, персанаж знаходзіцца далёка не ў новабудоўлі, аднак разглядае такія, хутчэй за ўсё, мінскія. Тэмы прыроды (герой, магчыма, звык любавацца небам, якое цепер засланяе будоўля) і горада, канфлікту новага і старога, узаемаадносін дзеяння і назірання, відаць, працягваюць хваляваць мастакоў не толькі сталых, але і маладых.

Вылучаюцца ў шэрагу іншых — найперш лаканічнасцю і ледзь адчувальнай незавершанасцю, якая ідзе на карысць, — і скульптуры «Сірын» (2022) Ксеніі Лукерчык і «Катасмоўжык» (2022) Фёдара Каштанава. Другі, што цікава, выкананы з мармуру.

Карына Лявонава «Горад», 2021 г.

Сапраўднае ўпрыгажэнне выстаўкі — вучэбныя работы (акварэлі 2021 года) Марыі Сыракваш з выявамі Мінска, які добра пазнаецца, бо аўтар часта звяртаецца да знакамітых помнікаў архітэктуры; эксперыменты Анастасіі Чадзій, а яна стварае вельмі цікавыя кампазіцыі, выкарыстоўваючы ляўкас, смальту, алей, эпаксідную смалу; своеасаблівая «дарожная» серыя (2021) Багдана Эйсманта, даволі змрочная і ў нечым нежывая.

Праект «Рэктарскі прагляд» мае статус прафарыентацыйнага. Да агляду экспазіцыі запрашаюцца кіраўнікі, прадстаўнікі і навучэнцы школ, сярэдніх спецыяльных і вышэйшых навучальных устаноў. Як адзначаюць арганізатары, прадугледжана магчымасць заказаць экскурсію для арганізаваных груп. Наведванне «Рэктарскага прагляду» — выключна па папярэднім запісе.

Яўгенія ШЫЦЬКА

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

РАК. У першай палове тыдня будзеце актыўна вучыцца новаму і размаўляць з людзьмі. У сярэдзіне тыдня можа змяніцца настрой, з'явіцца дакладнае разуменне сваіх мэт.

Калейдаскоп

«I гэты чалавек застаўся жыць...» Медыкі ў беларускай літаратуры. Тэст

«I гэты чалавек застаўся жыць...» Медыкі ў беларускай літаратуры. Тэст

Кожную трэцюю нядзелю червеня адзначаецца Дзень медыцынскага работніка.