Беларусь і Расія — добрыя сябры і браты, заявіла старшыня Савета Рэспублікі Наталля Качанава ў час сустрэчы з Надзвычайным і Паўнамоцным Паслом Расіі ў Беларусі Барысам Грызловым, перадае БелТА.
«У нашай краіне вас ведаюць як добрага сябра Беларусі. Я ўпэўнена, што наша супрацоўніцтва з вашым прыходам на гэту важную пасаду, вядома, прадоўжыцца і будзе канструктыўным, — сказала Наталля Качанава. — Гаварыць аб тым, што адносіны паміж нашымі краінамі стратэгічныя, няма неабходнасці, таму што гэта сапраўды так. Мы добрыя сябры. Мы браты. І ўсе тыя задачы, якія сёння стаяць перад нашымі краінамі, — для нас гэта вельмі важна. Важна наша ўзаемадзеянне».
Спікер падкрэсліла: дыялог паміж нашымі краінамі развіваецца абсалютна па ўсіх напрамках. «Тыя гістарычныя традыцыі і карані, якія звязваюць нашы народы, дапамагаюць нам. У гэтым няма ніякага сумнення. І візіт нашага Прэзідэнта на Далёкі Усход з Прэзідэнтам Расіі яшчэ раз падкрэсліў, наколькі ў нас адкрыты, добры дыялог паміж краінамі. Гэта праўда. Гэта значыць, практычна няма закрытых тэм ні для расіян, ні для беларусаў. Таму што мы разам выбудоўваем нашу Саюзную дзяржаву Беларусі і Расіі ў такой добрай інтэграцыі, якая склалася паміж нашымі краінамі, — адзначыла яна. — Выбудоўванне дыялогу на вышэйшым узроўні, тое ўзаемадзеянне, якое складваецца сёння па рэалізацыі 28 саюзных праграм, надасць нам упэўненасць у тым, што мы будзем узаемадзейнічаць на карысць нашых краін і народаў».
Наталля Качанава дадала, што важна і ўзаемадзеянне парламентарыяў дзвюх краін. «Савет Федэрацыі і Нацыянальны сход Беларусі вельмі цесна ўзаемадзейнічаюць абсалютна па ўсіх напрамках. Гэта і Парламенцкі сход Беларусі і Расіі, Міжпарламенцкая асамблея СНД, АДКБ. Мы шмат гадоў праводзім значнае для нас мерапрыемства — Форум рэгіёнаў Беларусі і Расіі. У гэтым годзе ён пройдзе ў Гродне 23-24 чэрвеня. Гэта апагей таго, што адбываецца на працягу года, таму што мы працуем даволі шмат. Сустракаюцца нашы губернатары, падпісваюцца кантракты, пагадненні, — прадоўжала спікер. — У гэтым годзе запланавана яшчэ адно важнае мерапрыемства па лініі маладзёжнай тэматыкі — „Поезд Памяці“, дзе будуць удзельнічаць школьнікі Беларусі і Расіі, па 100 чалавек ад кожнай краіны. Старт будзе дадзены ў Брэсце. Нашы дзеці наведаюць 14 гарадоў Беларусі і Расіі». У кожным з іх будуць зроблены прыпынкі, дзе юнакі і дзяўчаты будуць наведваць памятныя мясціны, прысвечаныя падзеям Вялікай Айчыннай вайны. Фінішуе праект 3 ліпеня ў Мінску.
«Актыўна ў гэту работу ўключыліся ўсе міністэрствы і ведамствы, каб гэта першае мерапрыемства прайшло ўдачна, і мы тады можам разлічваць, што яно стане традыцыйным. Гэта будзе яшчэ адным паспяховым мерапрыемствам, якое дасць магчымасць моладзі сябраваць і добра ведаць нашу гісторыю», — канстатавала старшыня Савета Рэспублікі.
«Сустрэліся аднадумцы. Думаю, гэта самае галоўнае ўражанне. Мы цудоўна разумеем, што на дадзены момант тэрмін, што ў нас падобныя пазіцыі, ужо сышоў у гісторыю. У нас проста аднолькавыя пазіцыі па ўсіх пытаннях двухбаковых і міжнародных адносін у рамках дзейнасці ў міжнародных арганізацыях», — Сказаў Барыс Грызлоў.
Паводле яго слоў, у час сустрэчы абмяркоўваліся пытанні падрыхтоўкі да Форуму рэгіёнаў Беларусі і Расіі, які пройдзе 23-24 чэрвеня ў Гродне. «Гэта найважнейшае мерапрыемства. Будуць рыхтавацца кантракты, узгадняцца пытанні аб дагаворах у рамках гуманітарных пазіцый. Гэта будзе вельмі вялікая падзея, — адзначыў пасол. — Мы абмеркавалі пытанні адукацыі, узаемнага абмену студэнтамі. Расійская Федэрацыя істотна павялічыла колькасць бюджэтных месц у ВНУ Расіі і з верасня ў нас могуць вучыцца на аснове расійскага бюджэту 1,1 тыс. беларускіх студэнтаў. Гэта ў паўтара раза больш, чым у бягучым навучальным годзе. Мы абмеркавалі пытанне наконт юбілейнай даты — 250 гадоў уз’яднання беларускіх зямель тады з Расійскай імперыяй, гэта выхад Беларусі з-пад польскага прыгнёту і магчымыя мерапрыемствы, якія будуць праводзіцца ў рамках гэтай даты. Ну і, зразумела, абмеркавалі шэраг пытанняў узаемадзеяння заканадаўчай галіны, тых законапраектаў, якія будуць прымацца ў Рэспубліцы Беларусь у сувязі з прыняццем дапаўненняў і змяненняў у Канстытуцыю».
Фота: БелТА
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.
