У час святкавання Дня беларускага пісьменства Добруш павінен стаць кропкай прыцягнення турыстаў. Аб гэтым сказаў намеснік прэм’ер-міністра Ігар Петрышэнка сёння на пасяджэнні арганізацыйнага камітэта па падрыхтоўцы і правядзенні Дня беларускага пісьменства, перадае БелТА.
«Сёння мы абмяркуем комплекс пытанняў, звязаных з падрыхтоўкай да правядзення Дня беларускага пісьменства. У гэтым годзе ён пройдзе ў Добрушы. Горад невялікі, і для яго жыхароў, гасцей гэты дзень стане знакавай падзеяй. Наша задача зрабіць яго па-сапраўднаму запамінальным. Для гэтага трэба максімальна выкарыстаць не толькі напрацаваны намі вопыт мінулых гадоў, але і ўнесці новыя фарбы ў святочнае мерапрыемства», — сказаў Ігар Петрышэнка.
Паводле яго слоў, Дзень беларускага пісьменства пройдзе пад знакам Года гістарычнай памяці. «Таму мы павінны не проста гаварыць пра літаратуру, багацце беларускай мовы і традыцый нашага народа. Праз мерапрыемствы свята неабходна правесці асноўныя ідэі Года гістарычнай памяці», — звярнуў увагу віцэ-прэм’ер.
Як адзначыў намеснік прэм’ер-міністра, цяперашняе пасяджэнне першае ў такім складзе аргкамітэта. «Міністэрствам інфармацыі і Гомельскім абласным выканаўчым камітэтам пачата ўжо актыўная работа па падрыхтоўцы святочных мерапрыемстваў і самога горада да іх правядзення», — дадаў ён.
У ходзе пасяджэння будуць разгледжаны пытанні, звязаныя з падрыхтоўкай канцэпцыі праграмы свята, з падыходамі да правядзення цырымоніі адкрыцця і закрыцця Дня пісьменства і святочных мерапрыемстваў у цэлым. Таксама ўдзельнікі абмяркуюць, як вырашаюцца пытанні з фінансаваннем гэтых мерапрыемстваў, як будзе арганізавана інфармацыйная падтрымка Дня пісьменства.
«Неабходна таксама загадзя прадумаць пытанні прыцягнення турыстаў. Добруш павінен стаць для іх у святочныя дні кропкай прыцягнення. Міністэрству спорту і турызму сумесна з абласным выканаўчым камітэтам неабходна арганізаваць работу па падрыхтоўцы адпаведных турыстычных маршрутаў або іх удакладненні. Акрамя таго, трэба прадумаць, якія спартыўныя мерапрыемствы могуць быць арганізаваны ў рамках Дня пісьменства», — падкрэсліў Ігар Петрышэнка.
Акрамя гэтага на пасяджэнні абмяркуюць, якія мерапрыемствы плануецца арганізаваць для дзяцей і моладзі. «Усім арганізатарам трэба прыкласці максімум намаганняў для таго, каб прыцягнуць да ўдзелу ў свяце як мага больш моладзі. Актыўная роля павінна быць выканана БРСМ і БРПА ў частцы прыцягнення і арганізацыі цікавых пляцовак у рамках святкавання Дня пісьменства для дзяцей і моладзі», — паведаміў віцэ-прэм’ер.
Паводле слоў Ігара Петрышэнкі, пры падрыхтоўцы да Дня пісьменства заўсёды асаблівая ўвага ўдзяляецца добраўпарадкаванню і прывядзенню ў парадак горада, дзе праводзіцца свята. Таму на пасяджэнні будуць закрануты пытанні, звязаныя з правядзеннем работ па рамонце, рэканструкцыі і абнаўленні гарадскіх аб’ектаў, а таксама з арганізацыяй размяшчэння і харчавання ўдзельнікаў і гасцей свята.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
