Аб гэтым падчас пасяджэння калегіі Міністэрства ўнутраных спраў заявіў кіраўнік ведамства. Міністр адзначыў, што органы ўнутраных спраў зладжана і прафесійна рэагуюць на крымінальныя выклікі і пагрозы, аднак ёсць і «тонкія месцы».
— Наспела вострая неабходнасць у змяненні падыходаў да барацьбы з наркапагрозай, — заўважыў генерал-лейтэнант міліцыі Іван Кубракоў. — У нас ёсць якасны заканадаўчы інструмент, аднак, на жаль, ён выкарыстоўваецца не ў поўнай меры. Акрамя таго, не на належным узроўні арганізавана прафілактычная работа з насельніцтвам, асабліва ва ўстановах адукацыі.
Колькасць выяўленых злачынстваў павялічылася на траціну. З незаконнага абароту канфіскавана ў чатыры разы больш псіхаактыўных рэчываў. З пачатку года спынена дзейнасць шасці інтэрнэт-крам. 90% збыту забароненых рэчываў ажыццяўляецца праз інтэрнэт.
Міністр звярнуўся да кіраўнікоў органаў унутраных спраў актыўна ўключацца ў работу, накіраваную на тлумачэнне прававых і медыцынскіх наступстваў спажывання і збыту наркотыкаў. «Неабходна выпрацаваць такія меры, якія дазволяць паўплываць на сітуацыю, у тым ліку распрацаваць дакладны алгарытм узаемадзеяння з усімі зацікаўленымі бакамі», — падкрэсліў Іван Кубракоў.
Як было адзначана падчас калегіі, асуджаныя за нарказлачынствы не пакінуты без падтрымкі. Станоўчы вопыт пілотнага праекта Дэпартамента выканання пакаранняў МУС і Міністэрства аховы здароўя «Комплексная медыцынская рэабілітацыя грамадзян з сіндромам залежнасці ад алкаголю ва ўмовах лячэбна-працоўных прафілакторыяў» быў распаўсюджаны і ў некаторых папраўчых установах. Сёння на іх базе функцыянуюць рэабілітацыйныя цэнтры «Адраджэнне» і «Давер», дзе асуджаныя пры дапамозе спецыялістаў пазбаўляюцца ад алкагольнай і наркатычнай залежнасці. Такая практыка будзе працягнута.
Падчас калегіі разгледзелі і пытанні камплектавання, дысцыпліны ў органах унутраных спраў, абмеркавалі няпростую сітуацыю ў сферы забеспячэння дарожнай бяспекі. У планах — унесці змены ў рэалізуемы ў Беларусі з 2019 года Комплекс мер «Добрая дарога». Навацыі, у першую чаргу, будуць накіраваны на зніжэнне аварыйнасці на дарогах. Паляпшэнне абстаноўкі прагназуецца ў сувязі з прынятымі ў канцы года змяненнямі ў Закон «Аб дарожным руху» і ўнесенымі новаўвядзеннямі ў Правілы дарожнага руху, большаць з якіх уступіць у сілу ўжо гэтай восенню.
Вераніка КАНЮТА
Існуюць строгія патрабаванні да месцаў для купання.
Яе песні займаюць першыя радкі ў музычных чартах краіны, пастаянна гучаць на радыё і тэлебачанні.
