Вішні «Настасся», «Арцём», «Ігар» і яшчэ амаль тры дзясяткі маладых дрэўцаў з імёнамі дзяцей цяпер будуць упрыгожваць Каўпенскі дзіцячы сад — базавую школу, што ў Лоеўскім раёне. Свае імёны дзеці далі саджанцам новага саду. Так школьнікі падтрымалі рэспубліканскую прыродаахоўную акцыю «Сад надзеі».
Сёння ў дзіцячым садзе — базавай школе аграгарадка Каўпень 46 вучні, 17 настаўнікаў. Педагогі на ўзроўні раёна выказалі ініцыятыву залажыць «Сад надзеі» менавіта на тэрыторыі іх навучальнай установы. Высадзілі амаль тры дзясяткі саджанцаў — вішні, яблыні, абрыкосы і грэцкія арэхі. Дрэўцы для пасадкі прынеслі з дамашніх прысядзібных участкаў. У садовым дэсанце бралі ўдзел вучні ўсіх класаў пачатковай і базавай школы, увесь педагагічны калектыў. Вучні 9-га класа, а сёлета гэта чацвёра навучэнцаў, асобна высадзілі Дрэва выпускнікоў — 2022.
— «Сад надзеі» для нас, дзяцей і ўсіх супрацоўнікаў школы вельмі сімвалічны. Ён — сімвал надзеі на тое, што наша школа будзе жыць! Вучні вызначацца з прафесіяй, паспяхова паступяць у навучальныя ўстановы, будуць праслаўляць сваю родную школу, — спадзяецца дырэктар Каўпенскага дзіцячага сада — базавай школы Святлана Лёгкая.
У каўпенскіх вучняў ёсць вопыт работы ў цяпліцы і на прышкольным участку на ўроках працоўнага навучання. Актыўна ўключаюцца дзеці таксама ў акцыі па азеляненні свайго аграгарадка. Таму, упэўненая галоўны спецыяліст аддзела адукацыі, спорту і турызму Лоеўскага райвыканкама Таццяна Гаспадарова, школьнаму «Саду надзеі» гарантаваны належны догляд. Вучні асабліва падкрэслілі, што мараць самастойна даглядаць імянныя дрэўцы.
— Вучні з такім задавальненнем высаджвалі дрэўцы, а пасля давалі ім свае імёны. Прыемна было назіраць за гэтым і раздзяліць радасць з дзецьмі, — падзялілася Таццяна Гаспадарова.
Галоўны спецыяліст райвыканкама падчас рэспубліканскай прыродаахоўнай акцыі не толькі словам, але і справай падтрымала каўпенскіх вучняў і педагогаў: дапамагла высадзіць расліны. Цяпер Таццяна Мікалаеўна матывуе ўсе ўстановы адукацыі Лоеўшыны ўключыцца ў экалагічны рух. Кажа, гарантаваны выдатны эмацыянальны эфект ад такой карыснай справы.
— Хацелася б, каб да гэткіх ініцыятыў далучаліся і бацькі вучняў. Бо дзеці з такой цікавасцю бяруцца за падобныя акцыі. І важна, каб бацькі змаглі раздзяліць з імі радасць ад удзелу ў чымсьці карысным для прыроды. Хацелася б, каб бацькі ўбачылі, наколькі іх дзеці з захапленнем бяруцца даглядаць саджанцы, імкнуцца далучацца да працоўнай дзейнасці. Гэта абавязкова варта падтрымліваць і ў сям'і, — перакананая галоўны спецыяліст аддзела адукацыі, спорту і турызму райвыканкама.
Дарэчы, рэспубліканская прыродаахоўная акцыя «Сад надзеі» — ініцыятыва Савета Міністраў — сёмы год запар актыўна падтрымліваецца ў розных рэгіёнах краіны. Сёлета на Гомельшчыне новыя «Сады надзеі» ўжо закладзены ў Хойніцкім, Петрыкаўскім, Ельскім, Рагачоўскім і Лоеўскім раёнах.
Наталля КАПРЫЛЕНКА
Фота Валянціны ХУДАЛЕЙ
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
