Вы тут

СААЗ даследуе ўспышку гепатыту ў дзяцей па ўсім свеце


На працягу апошніх некалькіх тыдняў быў зарэгістраваны шэраг выпадкаў цяжкага гепатыту невядомага паходжання ў дзяцей. Выпадкі рэгістраваліся ў некалькіх краінах, у тым ліку ў Злучаным Каралеўстве Вялікабрытаніі і Паўночнай Ірландыі, Іспаніі і ЗША. Вось як тлумачаць незвычайную ўспышку ў Сусветнай арганізацыі аховы здароўя.


Што такое востры гепатыт?

Гэта тэрмін, які азначае вострае запаленне печані. Востры гепатыт можа быць выкліканы як інфекцыяй, так і не звязанымі з інфекцыяй фактарамі. Існуюць тры асноўныя віды вострага віруснага гепатыту: гепатыт A, B і C. Вірусныя гепатыты D і E сустракаюцца радзей, асабліва ў краінах з высокім узроўнем даходу.

Што робіць гэту ўспышку незвычайнай?

Цяжкі востры гепатыт рэдка сустракаецца ў дзяцей ранняга ўзросту. Першыя паведамленні аб магчымым росце колькасці выпадкаў паступілі з Шатландыі. Пасля, па меры распаўсюджвання інфармацыі, трывожныя паведамленні сталі з'яўляцца і з іншых рэгіёнаў Злучанага Каралеўства, а таксама з іншых краін па ўсім свеце.

Вядома, што ў гэтых пацыентаў не былі выяўлены вірусы, якія звычайна становяцца прычынай вострага віруснага гепатыту. Па наяўнай на дадзены момант інфармацыі, міжнародныя паездкі або сувязь з іншымі краінамі таксама не ўказваюцца ў якасці фактараў, што маюць значэнне.

Наколькі трывожнае становішча?

Указаныя выпадкі — хоць яны і досыць рэдкія — варта ўспрымаць з усёй сур'ёзнасцю. Патрабуюцца далейшыя меры па выяўленні іншых патэнцыяльных выпадкаў, прычым не толькі ва ўжо закранутых краінах. Першачарговая задача заключаецца ў вызначэнні прычыны захворвання — для далейшага ўдакладнення мер па прафілактыцы і кантролі.

Якія асноўныя тэорыі адносна паходжання?

Мы цесна супрацоўнічаем з краінамі і партнёрамі дзеля пошуку магчымых тлумачэнняў. Вывучаецца шырокае кола мажлівых прычын. Па адной з асноўных гіпотэз, прычынай захворвання з'яўляецца адэнавірус. Гэта група распаўсюджаных вірусаў, якія могуць перадавацца ад чалавека да чалавека, і выклікаць сімптомы рэспіраторных захворванняў, ваніты і дыярэю ў дзяцей.

Разам з тым такая гіпотэза не можа ў поўнай меры растлумачыць цяжкія клінічныя праявы захворвання. Вядомыя выпадкі гепатыту, выкліканага адэнавіруснай інфекцыяй, у дзяцей з аслабленай імуннай сістэмай, але пры гэтым раней адэнавірусная інфекцыя не станавілася прычынай гепатыту ў здаровых дзяцей.

Група спецыялістаў са Злучанага Каралеўства назвала ў якасці магчымых фактараў павышаную ўспрымальнасць дзяцей ранняга ўзросту да адэнавіруснай інфекцыі з прычыны нізкага ўзроўню цыркуляцыі адэнавірусаў падчас пандэміі COVІD-19 альбо патэнцыяльнае з'яўленне новага адэнавіруса, альбо спалучаную інфекцыю адэнавіруса і віруса SARS-CoV-2. Гэтыя гіпотэзы маюць патрэбу ў далейшым вывучэнні.

Ці можа ўспышка быць звязана з COVІD-19 і вакцынацыяй?

У некалькіх выпадках было выяўлена заражэнне вірусам SARS-CoV-2. У той жа час на дадзены момант у шматлікіх закранутых успышкай краінах назіраецца шырокая цыркуляцыя COVІD-19, і патэнцыяльная роля віруса SARS-CoV-2 у цяперашняй клінічнай карціне незразумелая.

Зараз няма фактычных даных, якія пацвярджалі б сувязь клінічнай карціны з вакцынацыяй, паколькі большасць хворых дзяцей не была вакцынавана супраць COVІD-19. Для ацэнкі і кантролю рызыкі неабходна дэталёва вывучыць шэраг іншых магчымых фактараў інфекцыйнага і неінфекцыйнага характару.

Ці варта чакаць з'яўлення новых выпадкаў?

Паведамленні аб новых выпадках працягваюць паступаць, прымаюцца пашыраныя меры па выяўленні выпадкаў у іншых краінах. У сувязі з гэтым вельмі верагодным бачыцца выяўленне новых выпадкаў яшчэ да таго, як будзе ўстаноўлена прычына захворвання і будуць адпаведным чынам скарэктаваны меры па яго прафілактыцы і кантролі.

На што трэба звярнуць увагу бацькам?

Найперш неабходна адзначыць, што дадзенае захворванне не з'яўляецца распаўсюджаным. Аднак бацькі павінны звяртаць увагу на сімптомы гепатыту — вострую дыярэю, ваніты, боль у жываце і жаўтуху (пажаўценне скуры і бялкоў вачэй) — у дзяцей. У большасці захварэлых не адзначалася павышэння тэмпературы. Пры ўзнікненні нагод для занепакоенасці бацькам рэкамендуецца звяртацца да медыцынскіх работнікаў.

Што можна зрабіць, каб засцерагчы дзяцей?

Трэба праводзіць звычайныя меры па засцярозе ад вірусаў: забяспечыць правільнае мыццё рук і належную рэспіраторную гігіену (прыкрываць рот падчас кашлю і чхання і іншае).

Алена КРАВЕЦ

Прэв’ю:ТАСС

Культура

З энергіі агню. Янка Купала для беларусаў — не проста паэт

З энергіі агню. Янка Купала для беларусаў — не проста паэт

 140 гадоў таму адбыўся галоўны купальскі цуд Беларусі.

Калейдаскоп

«Баграціён». Што вы ведаеце аб найбуйнейшай ваеннай аперацыі ў гісторыі? Тэст

«Баграціён». Што вы ведаеце аб найбуйнейшай ваеннай аперацыі ў гісторыі? Тэст

У ходзе аперацыі савецкая армія разграміла групу армій «Цэнтр» Вермахта.