Цэнтр інфармацыйных тэхналогій Мінгарвыканкама сумесна з Мінскай ЖКГ распрацоўваюць адзіную электронную праграму, у якой будзе акамуліравацца інфармацыя аб усіх зарэгістраваных жывёлах. Доступ да сістэмы будуць мець абслугоўваючыя жыллёва-камунальныя арганізацыі і разлікова-даведачныя цэнтры (РДЦ). Мяркуецца, што гэта спросціць налічэнне падатку за ўтрыманне сабак, а таксама дапаможа аператыўна адшукаць гадаванца.
Абавязкова рэгістраваць у кватэры беларусам трэба толькі сабак і кошак — гадаванцаў іншых відаў гэта не датычыцца. А на кошку, дарэчы, не трэба плаціць і падатак. Аформіць афіцыйную «прапіску» даросламу сабаку ці кату трэба цягам трох дзён з моманту іх з’яўлення ў жыллі. Шчанюкоў і кацянят афармляюць, калі ім споўніцца тры месяцы. Калі чатырохногі сябра загінуў, згубіўся, пераехаў ці быў аддадзены, гаспадар павінен паведаміць пра гэта камунальнікам і ветэрынарнай службе, расказала Настасся ВАРАБ’ЁВА, намеснік генеральнага дырэктара Мінскай гарадской жыллёвай гаспадаркі.
Каб зарэгістраваць жывёлу ў кватэры, трэба зрабіць наступнае:
- аформіць гадаванцу ветэрынарны пашпарт;
- вакцынаваць яго супраць шаленства і зрабіць адзнаку пра гэта ў ветпашпарце;
- уладальнікі сабак патэнцыйна небяспечных парод павінны прайсці кіналагічныя курсы, атрымаць спецыяльную даведку;
- з пашпартам сабакі ці ката і сваім сведчаннем асобы (а таксама даведкай пра навучанне ў кінолага — для пэўных парод сабак) гаспадару трэба падысці ў жыллёва-эксплуатацыйную службу, таварыства ўласнікаў ці іншую арганізацыю, якая абслугоўвае дом, дзе жыве жывёла;
- напісаць заяву аб рэгістрацыі;
- азнаёміцца з правіламі ўтрымання хатніх жывёл.
Кіналагічныя курсы для спецыяльнага абучэння сабак патэнцыйна небяспечных парод можна прайсці на прадпрыемстве «Фауна горада». Курсы доўжацца ад аднаго да чатырох месяцаў, і праводзяць іх спецыялісты беларускага грамадскага спартыўна-кіналагічнага таварыства, удакладніла спецыяліст:
— Навучанне ўключае ў сябе тэарэтычныя веды, падчас якіх уладальнікаў жывёл вучаць правільнаму стаўленню да сваіх гадаванцаў, і практычныя — калі гаспадар і яго сабака працуюць над карэкцыяй паводзін і ключавымі навыкамі. Па завяршэнні заняткаў выдаецца дыплом «Кіруемы гарадскі сабака» і даведка, якая патрэбна для рэгістрацыі гадаванца ў кватэры.
Пасля рэгістрацыі спецыялісты жыллёва-эксплуатацыйнай службы выдадуць сабаку ці кошцы жэтон, які яны павінны заўжды мець пры сабе. Прымацаваць жэтон можна, напрыклад, да ашыйніка.
Сёння рэгістрацыя жывёл праводзіцца на папяровых носьбітах — у спецыяльных журналах. Аднак паколькі такі падыход ужо састарэў, з часам усе яны будуць унесены ў электронную базу. Да яе, акрамя супрацоўнікаў ЖКГ і РДЦ, будуць мець доступ і спецыялісты «Фауны горада», якія займаюцца пошукам гаспадароў хатніх жывёл, якія згубіліся, ці былі дастаўлены на прадпрыемства, дадала Настасся Вараб’ёва:
З укараненнем электроннай базы ў спецыяльным раздзеле праграмы будзе змяшчацца не толькі нумар жэтона знойдзенага гадаванца, але і іншыя характарыстыкі, у прыватнасці фота.
Нагадаем, што, згодна з законам, у кватэры можа пражываць не больш за дзве жывёлы: кот і сабака, два каты ці два сабакі.
Ірына СІДАРОК, фота аўтара
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.