Арганізатары «Славянскага базару» адзначаюць попыт на квіткі і актыўнае іх браніраванне

Арганізатары «Славянскага базару» адзначаюць попыт на квіткі і актыўнае іх браніраванне, паведамляецца ў тэлеграм-канале Міністэрства культуры.

«Афішай фестывалю прадугледжана каля 40 праектаў на канцэртных пляцоўках, тэатральных і філарманічнай сцэнах. Праграма звярстаная, яна апублікаваная на сайце “Славянскага базару ў Віцебску”. Мы адзначаем попыт на квіткі, актыўнае іх браніраванне», – адзначыў генеральны дырэктар Цэнтра культуры «Віцебск», дырэктар фестывалю Глеб Лапіцкі.

Сёлета ўдзел у «Славянскім базары ў Віцебску» прымуць каля 5 тыс чалавек з больш чым 25 краін свету.

Падрыхтоўка да фестывалю, які адбудзецца 14-17 ліпеня (дадатковыя мерапрыемствы 13 і 18 ліпеня), ідзе па плане.

У горадзе падчас «Славянскага базару ў Віцебску» фестывальнымі падзеямі будзе ахоплена 20 пляцовак і ўстаноў. Усе яны рыхтуюцца да форуму мастацтваў.

Дарэчы, тут будзе ўпершыню адкрытая фестывальная пляцоўка open air умяшчальнасцю 3,5-4 тысяч чалавек – са сцэнай, фудкортамі і фудтракамі.

Прэв’ю: БелТА