Вы тут

Кузня чэмпіёнаў


Мазырская СДЮШАР прафсаюзаў па веславанні на байдарках і каноэ з'явілася на карце і ў гісторыі Мазыршчыны 1 студзеня 1974 года. У той далёкі час не было сучасных спартыўных баз, якія ёсць у распараджэнні весляроў сёння. А вось выдатныя трэнеры ў Мазырскай СДЮШАР ужо былі, і менавіта ім абавязаныя сваімі высокімідасягненнямі мазырскія спартсмены.


Калі ў сярэдзіне 70-х трэнерскі цэх школы папоўніўся маладымі трэнерамі Уладзімірам Шантаровічам і Віталём Скрыганавым, пачалася новая эпоха ў развіцці мазырскага веславання на байдарках і каноэ. Сёння тут працуюць адны з найлепшых трэнераў Беларусі ў веславанні, распавяла начальнік аддзела спорту і турызму Мазырскага райвыканкама Галіна Касцяшкіна.

— Веславанне як спартыўны кірунак выклікае ў Мазыры павышаную цікавасць у бацькоў, дзяцей і падлеткаў, — адзначае яна. — Напэўна, таму што ва ўсіх на слыху нашы трыумфатары — сярэбраныя прызёры Алімпійскіх гульняў у Токіа Вольга Худзенка, Марына Літвінчук, Маргарыта Махнева і Надзея Папок. Або Раман Петрушэнка, алімпійскі чэмпіён і сяміразовы чэмпіён свету. За гады свайго існавання СДЮШАР выхавала цэлую плеяду выдатных спартсменаў: гуляючы па Мазыры, можна сустрэць алімпійскага чэмпіёна. І яны служаць добрым арыенцірам для падрастаючага пакалення.

Цяпер на базе школы трэніруецца мужчынская нацыянальная зборная па веславанні на байдарках і каноэ.

А трэніруе іх ужо мясцовая легенда — выдатны настаўнік Уладзімір Шантаровіч.

— Спорт вышэйшых дасягненняў — сэнс жыцця спартсменаў. Гэта як вера, — тлумачыць ён. — Спачатку трэба, каб у спартсменаў паверыў той, хто іх вядзе, трэнер. А далей яны самі пачынаюць верыць у сябе — і дасягаюць выдатных вынікаў. Таму што жывуць гэтым відам спорту. У нас касмічныя вынікі — на чэмпіянатах Еўропы, свету, Алімпійскіх гульнях. Толькі за апошнія 8 гадоў — 10 чэмпіёнаў свету па веславанні родам з Мазыра і выхадцы з нашай школы.

Калі хтосьці не стаў чэмпіёнам, гэта недапрацоўка трэнера, мяркуе Уладзімір Уладзіміравіч. Калі малады чалавек не застаўся ў спорце, кінуў займацца — значыць, настаўнік нешта да спартсмена не данёс, не здолеў знайсці правільны падыход да вучня.

Сёння ў Мазырскай СДЮШАР прафсаюзаў па веславанні на байдарках і каноэ 270 юных спартсменаў. Прымаюць сюды з сямі гадоў. І самым галоўным у рабоце з дзецьмі Уладзімір Шантаровіч лічыць нават не вынікі і дасягненні. «Сыходзяць шкодныя звычкі, менш часу дзеці праводзяць, утаропіўшыся ў смартфон. Яны становяцца здаравейшыя і пачынаюць лепш вучыцца», — падкрэслівае ён.

— Пяцьдзясят гадоў я працую трэнерам. На маіх вачах змяняюцца пакаленні. І я не магу чуць, калі кажуць: «Цяпер дзеці не тыя» або «У наш час моладзь была лепшая». Няпраўда! І дзеці, і моладзь ад пакалення да пакалення становяцца больш цікаўныя, мэтанакіраваныя, працаздольныя. Усё залежыць ад педагога. Бо першапачаткова і дзіця, і падлетак прыходзіць не ў від спорту, а да трэнера. І ад трэнера залежыць, ці паверыць вучань у сябе настолькі, каб здолець стаць чэмпіёнам.

Аляксандра АНЦЭЛЕВІЧ

Фота Лізаветы ГОЛАД

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.