Вы тут

Ангеліна Сарока: «У прамым эфіры складана і адказна»


Нядаўна на канале «Беларусь 2» завяршыўся другі сезон рэаліці «Хачу ў «ПІН_КОД». Дзесяць крэатыўных і таленавітых маладых людзей змагаліся за месца новага вядучага маладзёжнай праграмы. Сваімі ўражаннямі падзялілася адна з удзельніц праекта, студэнтка І курса факультэта журналістыкі БДУ Ангеліна Сарока.


— Як ты даведалася аб гэтым творчым спаборніцтве?

— На журфаку запісалася ў гурток «Канферанс», арганізатар якога адправіла спасылку ў агульную групу: «Паспрабуйце сябе ў «ПІН_КОД!» Вырашыла запоўніць анкету і пастаралася зрабіць тое крэатыўна. Неўзабаве са мной звязалася вядучая праграмы Наташа Паўшок, якая адбірала патэнцыяльных удзельнікаў. Я мала ведала аб праграме, але азнаёмілася з ёй у кароткія тэрміны. Для кастынгу прыдумала ўласную рубрыку пра DІY-упрыгажэнні. Мне заўсёды падабалася рабіць нешта сваімі рукамі, я займалася пляценнем з бісеру і трубачак, скрапбукінгам, дэкупажам, таксама малявала і нават у інтэрнаце ўпрыгожыла свой пакой.

— Што адбывалася на кастынгу? Ці было страшна?

— Насамрэч успаміны не вельмі прыемныя, бо заданне я не зразумела і «шыкоўна» яго праваліла! Але, на шчасце, настаўнік адной з камандаў Жан Сянкевіч вырашыў даць мне другі шанц. Хутчэй за ўсё, з-за маёй яркай знешнасці, а можа, убачыў патэнцыял. Ва ўсякім выпадку, Жан неаднойчы сцвярджаў потым, што не пашкадаваў аб сваім рашэнні.

— Магчыма, ты разгубілася перад камерай?

— Не, камеры я не баюся, я ж відэаблогер. Каля сямі гадоў вяду YouTube-канал Lіna Key, на якім у мяне больш за тысячу падпісчыкаў. З імі дзялюся яркімі момантамі свайго жыцця, абмяркоўваю падлеткавыя праблемы — забаўляльны кантэнт, так скажам. Памятаю, у самым пачатку расказвала пра вяселле хамякоў і здымала смешныя відэа, трэнды. Мне хацелася стасункаў, і людзі пакідалі свае каментарыі: і станоўчыя, і не вельмі. Стала збіраць на добрую камеру і ноўтбук. Дзякуючы каналу я і вырашыла пайсці ў журналістыку, мару весці інтэрактыўныя рубрыкі і размаўляць з аўдыторыяй. Цяпер з-за занятасці рэдка здымаю, але буду працягваць займацца відэахостынгам, гэта мая аддушына.

— З якімі цяжкасцямі сутыкнулася падчас шоу?

— Спачатку мне было складана ўліцца ў каманду, бо на праект прыйшла пазней за астатніх. Гэта заўважалі і самі ўдзельнікі, і мой настаўнік, таму я неаднойчы станавілася намінантам на вылет. Але рук не апусціла, пачала старанна працаваць і, на думку каманды «ПІН_КОД», прыкметна вырасла. Маёй перавагай было тое, што я ўжо ўмела манціраваць ролікі. А за час праекта яшчэ больш павысіла свой узровень у апрацоўцы відэа.

— У якой ролі ты адчувала сябе больш камфортна: карэспандэнта ці вядучага?

— Я зразумела, што працаваць у прамым эфіры складана і адказна. Усведамленне таго, што нічога нельга будзе змяніць, запісаць нанава, скоўвае і дадае хвалявання. Таму мне прасцей загадзя прадумаць сцэнарый і зняць рэпартаж.

— Што табе даў удзел у рэаліці?

— Спадабаліся заняткі па сцэнічнай мове. Вядома, я і раней трэніравалася над пастаноўкай голасу і правільным вымаўленнем, але ў дадзенай справе практыка ніколі лішняй не бывае. Таксама цікавымі былі ўрокі па здымцы відэа, раскадроўцы, правільным ракурсе. У цэлым я зарадзілася энергіяй і набыла бясцэнны вопыт, які, упэўненая, спатрэбіцца мне ў далейшым.

— Што адчувала, сыходзячы з праекта за крок да фіналу?

— Крыўдна, вядома. Насамрэч яшчэ напярэдадні ў мяне было прадчуванне, што далей не прайду. Але надзея не памірала да апошняга. Я раней за ўсіх прыехала на пляцоўку і заспела працэс падрыхтоўкі да эфіру. Устанаўлівалі апаратуру, вядучыя паўтаралі тэкст, візажысты ўсіх фарбавалі. Я зразумела, як моцна хачу працаваць у гэтай сферы.

— Рэдакцыя праграмы казала аб тым, што адкрытая да новых ідэй і прапаноў. Ці не думаеш вярнуцца са сваёй рубрыкай?

— Цяпер планую адпачыць ад камер, але нядоўга. Хутка ў мяне пачнецца практыка, і хто ведае, можа, я прайду яе на канале «Беларусь 2».

Паліна ШЫНКЕВІЧ, вучаніца 10 класа гімназіі № 6 г. Маладзечна.

Фота дадзены гераіняй

Выбар рэдакцыі

Грамадства

Прыёмная кампанія: хто штурмаваў ВНУ? Рэкорды і антырэкорды

Прыёмная кампанія: хто штурмаваў ВНУ? Рэкорды і антырэкорды

У БДУ 82 % залічаных на першы курс набралі 300 балаў і больш.

Калейдаскоп

Склад для дачніка. Парады ад практыкаў, як лепш захаваць ураджай на зіму

Склад для дачніка. Парады ад практыкаў, як лепш захаваць ураджай на зіму

Парады ад практыкаў, як лепш захаваць ураджай на зіму.