Вы тут

Ганна Іванова: Стаю зараз на сцэне… І ўсё гэта не сон!


На пачатку чэрвеня ў Мінску прайшоў фінал рэспубліканскага конкурсу грацыі і таленту «Каралева студэнцтва 2022», заснавальнікам якога з'яўляецца БРСМ. Найлепшай стала студэнтка Віцебскага дзяржаўнага тэхналагічнага ўніверсітэта Ганна Іванова. Дзяўчына вядзе актыўны лад жыцця — займаецца творчасцю, спортам і навуковай дзейнасцю, а таксама прымае ўдзел у гарадскіх, абласных і рэспубліканскіх мерапрыемствах. Ганна распавяла «Чырвонцы. Чырвонай змене» аб тым, як справілася з хваляваннем і чаму ўпэўненасць у сабе — далёка не галоўны складнік перамогі.


— Ужо на першым курсе ў складзе групы падтрымкі ты прымала ўдзел у конкурсах «Студэнт года» і «Каралева студэнцтва». Адкуль узнікла зацікаўленасць у такіх мерапрыемствах?

— Я адразу вырашыла, што хачу прысвяціць сябе не толькі вучобе, але і актыўнай творчай дзейнасці. Даведалася, што на базе ВДТУ ёсць розныя калектывы, і, не разважаючы, запісалася ў студыю эстраднага танца «V.І.P.». І вось ужо на канцэрце, прысвечаным пачатку навучальнага года, разам з іншымі першакурснікамі выступіла з танцам. Хвалявалася, бо з першых дзён хацела зарэкамендаваць сябе з добрага боку. З гэтага і пачалося маё актыўнае студэнцкае жыццё. Мы ўдзельнічалі ў розных мерапрыемствах, рэпеціравалі пасля вучобы, а потым беглі дадому рыхтавацца да заняткаў. Я пазнаёмілася са старшакурснікамі і даведалася ад іх пра такія праекты БРСМ, як «Студэнт года» і «Каралева студэнцтва», у якіх яны тады бралі ўдзел. Мяне ўсё больш сталі цікавіць падрабязнасці, якімі ўдзельнікі з задавальненнем дзяліліся.

Пасля паездкі ў Мінск на фінал рэспубліканскага конкурсу «Студэнт года Беларусі 2020» у складзе танцавальнай групы, дзе студэнт нашага ўніверсітэта Уладзіслаў Мірончык заняў другое месца, я зразумела, што хачу паспрабаваць сябе ў гэтым мерапрыемстве. Літаральна праз некалькі месяцаў прайшоў абласны і рэспубліканскі этапы «Каралевы студэнцтва Беларусі», дзе я таксама была ў танцавальнай групе прадстаўніц ВДТУ, і было вельмі прыемна адчуць сам працэс падрыхтоўкі, а таксама ўсе перажыванні і эмоцыі ад перамог. У 2021 годзе дзве прадстаўніцы ВДТУ, Лера Фомчанка і Віка Вараб'ёва, занялі першае і другое месцы. Так напрыканцы першага курса я зразумела, што зрабіла правільны выбар і гатова далей працаваць для сябе, калектыву і ўніверсітэта.

— Хто дапамагаў рыхтавацца да конкурсу?

— Падрыхтоўка да «Каралевы студэнцтва Беларусі» пачалася яшчэ з універсітэцкага этапу. На рэпетыцыях адпрацоўвалася дэфіле, а гэта і прыгожая паходка, і постаць, і акцёрскае майстэрства. Работа над маўленнем, пазбаўленне ад сарамлівасці і доўгіх паўзаў для конкурсу прамоўніцкага майстэрства. І, вядома ж, работа над сабой, эмоцыямі і перажываннямі.

З усім гэтым мне дапамагалі спраўляцца мая кіраўніца Алеся Анатольеўна Чыслова, якая ўсяліла веру і ўпэўненасць, сябры, падтрымка якіх адчувалася літаральна кожную секунду, харэографы, якія адточвалі са мной кожны рух. Кіраўніцтва ўніверсітэта, дэканат і выкладчыкі шчыра верылі ў мяне і падтрымлівалі нават на адлегласці. Уклад унеслі і прадстаўнікі БРСМ. Асобны «дзякуй» арганізатарам і рэжысёрскай групе за тое, наколькі прафесійна, творча і з любоўю яны падыходзяць да сваёй працы. І, вядома ж, велізарныя словы падзякі бацькам, якія пражывалі са мной усе цяжкасці і страхі, падзялялі радасць ад перамог, верылі ў мяне і атулілі любоўю і клопатам

— Які конкурсны нумар стаў для цябе самым важны?

— Выдзеліць нешта адно складана. Кожнае з выступленняў прэзентуе ўдзельніцу па-рознаму. У дэфіле раскрываецца зграбнасць, лёгкасць, павольнасць. Прамоўніцкае майстэрства дазваляе ацаніць вобразнасць маўлення і арыгінальнасць падачы матэрыялу. А творчы конкурс дэманструе твой найлепшы навык або любімае хобі і, канешне, ты атрымліваеш задавальненне на сцэне ад таго, што займаешся любімай справай.

— Ганна, што ты адчула, калі цябе абвясцілі пераможцай?

— Пасля аб'яўлення вынікаў мяне накрылі эмоцыі радасці, шчасця, гонару. Гэта ўсведамленне таго, што прайшоўшы такі шлях, я дамаглася ганаровага тытула, стаю зараз на сцэне перад шматлікімі гледачамі, перад сваёй групай падтрымкі, роднымі, а за кулісамі — мая кіраўніца, якая адчувае тое ж. І ўсё гэта не сон. Побач стаяла студэнтка нашага ўніверсітэта Лера Фомчанка, яна перадала мне карону «Каралевы студэнцтва», якую я прывязу назад у ВНУ. У той момант разумееш, што дзеля гэтага варта працаваць і нішто не заменіць такіх пачуццяў.

— Якая атмасфера панавала сярод канкурсантак? Ці паспелі пасябраваць?

— Знаёмства з удзельніцамі адбылося яшчэ да фінальнага тыдня падрыхтоўкі да конкурсу. Калі мы на два дні прыязджалі ў Мінск, было відаць, што стасункі больш наладжаны ў мікрагрупах. Гэта зразумела, бо некаторыя былі знаёмы яшчэ з абласнога этапу. Аднак да канца першага дня стала зразумела, што ўсе дзяўчынкі таварыскія, пазітыўна настроены і адкрыты да камунікацыі. За тыдзень падрыхтоўкі да конкурсу мы даведаліся столькі цікавых і ўнікальных фактаў адзін пра аднаго! З кожным днём мы збліжаліся, і ў цяжкія моманты кожная была гатова дапамагчы, выручыць і падтрымаць. Падчас фіналу мы абняліся і пажадалі проста атрымаць задавальненне ад выхаду на сцэну, ад працы і ад атмасферы ў зале.

— Ёсць меркаванне, што для таго, каб удзельнічаць у такіх конкурсах, трэба валодаць вельмі высокай самаацэнкай і быць упэўненай у сабе асобай. Ці згодная ты з гэтым? А яшчэ якую параду ты магла б даць дзяўчатам і хлопцам, якім не хапае ўпэўненасці, каб рэалізаваць свой патэнцыял.

— Не зусім. Безумоўна, гэта адыгрывае нейкую ролю, але мінімальна. Упэўненасць нараджаецца дзякуючы плённай працы, падтрымцы блізкіх і разуменню, што цябе любяць. А каб не саромецца, уяўляйце нешта прыемнае або каго-небудзь з блізкіх. Я, напрыклад, думала пра маму, і на твары адразу з'яўлялася шчырая ўсмешка.

— Зараз ты вучышся на другім курсе факультэта эканомікі і бізнес-кіравання. Ужо разважала, з якой сферай звяжыш жыццё?

— У мяне няма канкрэтных планаў пасля заканчэння ўніверсітэта. Ёсць думка аб паступленні ў магістратуру. Разумею, што жыццё больш складанае і варыятыўнае, чым мы можам уявіць, і з кожным днём усё мяняецца, прагрэс не стаіць на месцы. Ужо неактуальна быць спецыялістам у вузкай сферы, за выключэннем некаторых спецыяльнасцяў. Зараз важна развівацца ў розных напрамках, быць амбіцыйным і гатовым да перамен.

— Ганна, што падабаецца ў студэнцкім жыцці больш за ўсё?

— Магу сказаць, што гэта самы яскравы і цікавы перыяд у жыцці, пастаянны рух, калі ты знаёмішся з мноствам людзей, вучышся новаму і, вядома ж, знаходзіш сяброў.

Арына КАРПОВІЧ

Фота дадзены гераіняй і БРСМ

Выбар рэдакцыі

Калейдаскоп

Шалі — прыемныя навіны, леў — добрыя справы. Усходні гараскоп на наступны тыдзень

Шалі — прыемныя навіны, леў — добрыя справы. Усходні гараскоп на наступны тыдзень

Авен. Панядзелак прынясе вам рамантычны настрой, хаця трэба працаваць

Калейдаскоп

Што вы ведаеце пра беларускае жніво? «Ураджайны» тэст

Што вы ведаеце пра беларускае жніво? «Ураджайны» тэст

Надышоў жнівень — самы ўраджайны, працоўны, смачны час.