Вы тут

«Мы разам»: як атлеты краіны пераадольваюць цяжкасці


​У традыцыйным аглядзе «Звязды» расказваем важныя спартыўныя навіны.


Героі тыдня

Беларуская зборная па фехтаванні на інвалідных калясках выступіла на міжнародным турніры ва Уфе. Крысціна Фяклістава заняла першае месца ў жаночай шпазе (катэгорыя Б), Андрэй Праневіч стаў пераможцам у мужчынскай шпазе (катэгорыя Б). Крысціна Фяклістава таксама заняла першае месца ў жаночай шаблі, а Настасся Кручкова заняла другое месца ў гэтай частцы праграмы. Алеся Макрыцкая стала трэцяй у спаборніцтвах на рапіры.

Перамога тыдня

Беларускі велагоншчык Яўген Каралёк стаў пераможцам пралогу на шматдзёнцы «Пяць кольцаў Масквы». На папярэднім этапе шматдзёнкі спартсмены спаборнічалі ў індывідуальнай гонцы на час. Дыстанцыю ў 3,8 км Каралёк, які прадстаўляе веласіпедны клуб «Мінск», пераадолеў за 4 хв. 35 сек., усяго на паўсекунды апярэдзіўшы расіяніна Аляксандра Еўтушэнку. На другім этапе гонкі спартсмены пераадолелі дыстанцыю ў 149,6 км па алімпійскай велатрасе ў Крылацкім. Пераможцам гонкі стаў прадстаўнік веласіпеднага клуба «Мінск» Яўген Собаль.

Аб’ява тыдня

З чэрвеня беларускія і расійскія дзюдаісты змогуць выступаць на міжнародных стартах у нейтральным статусе. Такое рашэнне прыняла Міжнародная федэрацыя дзюдо. «Гэтае рашэнне дае роўныя шанцы ўсім атлетам узняцца над палітыкай, канфліктамі і іншымі пытаннямі, не звязанымі са спортам. Парушэнне правоў атлетаў, якія выступаюць пад нейтральным сцягам, будзе прызнана дыскрымінацыяй», — гаворыцца ў заяве арганізацыі.

Турнір тыдня

У Санкт-Пецярбургу завяршыўся ўсерасійскі турнір па грэка-рымскай барацьбе «Белыя ночы» памяці алімпійскага чэмпіёна Анатоля Рошчына. Па выніках турніру беларуская каманда па грэка-рымскай барацьбе заваявала чатыры медалі. У вагавой катэгорыі да 55 кг перамог Максім Ступакевіч, «золата» ў катэгорыі да 77 кг дасталася Мікіту Казакову. Арцём Кацэр (да 55 кг) і Аляксандр Лявончык (да 67 кг) выйгралі бронзавыя ўзнагароды. Усяго на 34-м турніры «Белыя ночы» прынялі ўдзел 10 беларускіх барцоў.

Пазіцыя тыдня

 Беларуска Арына Сабаленка вярнулася ў першую пяцёрку рэйтынгу Жаночай тэніснай асацыяцыі (WTA). На мінулым тыдні першая ракетка Беларусі займала ў Міжнародным рэйтынгу 6-е месца. А пасля выхаду ў фінал турніру ў нідэрландскім Хертагенбосе паднялася на адну пазіцыю, набраўшы 4145 балаў. Вікторыя Азаранка засталася на 19-м радку (2330 балаў), Аляксандра Сасновіч займае 38-е месца (1341). На гэтым тыдні Арына Сабаленка і Аляксандра Сасновіч выступяць на спаборніцтвах у Берліне.

У рэйтынгу Асацыяцыі тэнісістаў-прафесіяналаў (АТР) Ілья Івашка падняўся з 49-га на 42-е месца (1060 балаў). Яшчэ адзін беларускі тэнісіст Ягор Герасімаў знаходзіцца на 144-м радку (427).

Цытата тыдня

 «Наша задача — утрымаць спорт за межамі негатыўнага палітычнага трэнду. Нам трэба, каб урады паважалі ролю МАК. Паглядзіце на нашых сяброў з тэніса. У Парыжы на „Ралан Гарос“ беларусы і расіяне маглі гуляць як нейтральныя спартсмены. Але перад Уімблдонам у Лондане брытанскі ўрад сказаў „не“. Калі мы дазваляем гэта — мы прайграём», — сказаў прэзідэнт Міжнароднага алімпійскага камітэта Томас Бах наконт адхілення беларускіх і расійскіх спартсменаў. Яго словы прыводзіць партал Inside The Games. Томас Бах намякнуў: яму не падабаецца, што рашэнне аб адхіленні беларусаў і расіян ад Уімблдонскага турніру было прынята пад ціскам урада Вялікабрытаніі. Па яго словах, гарантаваць сумленныя міжнародныя спаборніцтвы немагчыма, калі ўрады ў адпаведнасці са сваімі палітычнымі інтарэсамі самі вырашаюць, хто можа ўдзельнічаць у турнірах, а хто — не. «Сёння гэта Расія і Беларусь, а заўтра гэта ваша краіна. У свеце няма краіны, якая падабалася б усім астатнім урадам», — лічыць функцыянер.

Турнір тыдня

У Мінску прайшоў чарговы этап Беларускай лёгкаатлетычнай лігі «Мы разам». Ён сабраў наймацнейшых спартсменаў краіны, якія працягваюць набіраць форму да галоўных спаборніцтваў летняга сезона. У бегу на 100 метраў пераможцамі сталі Дзяніс Блізнец і Кацярына Жываева, у бегу на 110 і 100 метраў з бар’ерамі — Віталь Парахонька і Эльвіра Герман. Максім Грабарэнка і Эльвіра Герман сталі найлепшымі ў бегу на 200 метраў, а Раман Валодзькін і Аляксандра Хільмановіч — пераможцы забегу на 400 метраў. На 400 метрах з бар’ерамі перамаглі Ягор Хаўратовіч і Аляксандра Хільмановіч. Найлепшымі ў забегу на 800 метраў сталі Сяргей Карпаў і Вольга Немагай, а на 1500 метрах — Сяргей Карпаў і Вольга Немагай. Першымі да фінішу забегу на 5000 метраў прыйшлі Сяргей Краўчэня і Карына Тамашук. У спаборніцтвах у скачкі ў даўжыню перамаглі Аляксей Дудзінскі і Анастасія Мірончык-Іванава. А найлепшы трайны скачок паказалі Ягор Чуйко і Анастасія Нягода. Найлепшымі ў сектары для скачкоў у вышыню былі Дзмітрый Набокаў і Ганна Гарадская. З шастом лепш за усіх скокнулі Дзмітрый Марфушкін і Ірына Жук. Далей за ўсіх ядры ляталі ў Дзмітрыя Карпука і Алены Дубіцкай. У кіданні дыска перамаглі Яўген Багуцкі і Святлана Сярова, у кіданні кап’я — Аляксей Каткавец і Вікторыя Багуцкая, у кіданні молата — Аляксандр Шымановіч і Анастасія Маслава.

Валерыя СЦЯЦКО

Фот з адкрытых крыніц

Выбар рэдакцыі

Грамадства

Пачым сёння прадаюць лісічкі, чарніцы і лясную суніцу?

Пачым сёння прадаюць лісічкі, чарніцы і лясную суніцу?

Карэспандэнт «Звязды» патаргавалася на рынках.

Калейдаскоп

«Баграціён». Што вы ведаеце аб найбуйнейшай ваеннай аперацыі ў гісторыі? Тэст

«Баграціён». Што вы ведаеце аб найбуйнейшай ваеннай аперацыі ў гісторыі? Тэст

У ходзе аперацыі савецкая армія разграміла групу армій «Цэнтр» Вермахта.