Вы тут

Работу з моладдзю і захаванне гістарычнай памяці абмеркавалі ў Клічаве


Новыя фарматы работы з моладдзю ў Магілёўскай вобласці абмеркавалі 22 чэрвеня ў час пасяджэння ў Клічаве. Удзельнікамі сустрэчы сталі кіраўнік Адміністрацыі Прэзідэнта Ігар Сергеенка, памочнік Прэзідэнта — інспектар па Магілёўскай вобласці Леанід Мартынюк, старшыня Магілёўскага аблвыканкама Анатоль Ісачанка, старшыня абласнога Савета дэпутатаў Ірына Раінчык, прадстаўнікі ідэалагічнай вертыкалі рэгіёна, маладзёжнага парламента і моладзь вобласці, перадае БелТА.


«У краіне праходзіць Тыдзень моладзі пад слоганам „Моладзь Беларусі: памятаем традыцыі, жывём сучасным, імкнёмся ў будучыню“. Беларусь — краіна міру і спакою, і вельмі хочацца, каб так было і ў далейшым. У нас ствараюцца неабходныя ўмовы для самарэалізацыі. Дзяржава аказвае істотную дапамогу маладым сем’ям, шматдзетным бацькам. Усё гэта трэба цаніць і не паддавацца на правакацыі. Нам неабходна захаваць тое, што маем, выхаваць у маладым пакаленні патрыятызм і любоў да Радзімы. Гэта штодзённая работа. Дзякуючы ёй моладзь павінна выпрацаваць імунітэт да радыкальных ідэалогій», — сказаў старшыня Магілёўскага аблвыканкама Анатоль Ісачанка.

Як адзначыла ў час выступлення начальнік галоўнага ўпраўлення ідэалагічнай работы і па справах моладзі Кацярына Музычэнка, істотны ўплыў на грамадства і працэсы, якія ў ім адбываюцца, аказваюць каштоўнасныя арыенціры, погляды і інтарэсы моладзі. «Гэты ўплыў распаўсюджваецца на ўсе сферы жыцця: адукацыю, дэмаграфію, працу, клопат аб здароўі, інфармацыйную і прававую дасведчанасць і інш. Моладзь мае свае патрэбнасці, таму падтрымка дзяржавы на гэтым этапе жыцця найбольш значная. У Беларусі яна ажыццяўляецца па розных напрамках: адукацыя, магчымасць праявіць сябе ў творчай і навуковай дзейнасці, садзейнічанне занятасці, падтрымка маладых спецыялістаў і сем’яў», — падкрэсліла яна.

Паводле слоў Кацярыны Музычэнка, колькасць моладзі ў Магілёўскай вобласці — больш за 171 тыс. (17 працэнтаў ад агульнай колькасці насельніцтва). Самыя маладзёжныя раёны — Клічаўскі, Горацкі і Слаўгарадскі, а таксама Магілёў і Бабруйск. Найбольш шматлікая ўзроставая група — 25-30 гадоў (38 працэнтаў). Згодна з сацыялагічнымі даследаваннямі, праведзенымі ў гэтым годзе, у топ-5 каштоўнасцей моладзі рэгіёна ўваходзяць здароўе, сям’я і дзеці, фінансавая стабільнасць, цікавая работа і вольны час.

Сярод пытанняў, якія абмяркоўваюцца ў час пасяджэння, сталі новыя фарматы работы з моладдзю, пытанні захавання гістарычнай памяці і патрыятызму. Паводле слоў Кацярыны Музычэнка, у рабоце з моладдзю неабходна поўнасцю выключыць фармальны падыход.

Яркім акцэнтам рабочай сустрэчы стала прэзентацыя выстаўкі «Нашы поспехі табе, Магілёўшчына!», дзе былі прэзентаваны самыя яркія маладзёжныя праекты, рэалізаваныя ў вобласці. Яны былі падзелены на некалькі блокаў. Інфармацыйныя праекты прэзентавалі СМІ рэгіёна, яшчэ адзін блок — прадстаўленне студатрадаўскага руху ў рэгіёне. Камандзір будатрада Беларуска-Расійскага ўніверсітэта «Тытан» Іван Івашкаў разам са сваімі юнакамі і дзяўчатамі паедзе працаваць у Якуцію. У іх камандзе 16 чалавек розных спецыяльнасцей, будуць працаваць амаль два месяцы. «Будзем займацца добраўпарадкаваннем: укладваць плітку, рабіць дарогі, будаваць аб’екты сацыяльнай інфраструктуры ў Чаяндзінскім нафтагазакандэнсатным радовішчы. А ў мінулым годзе нам пашанцавала паўдзельнічаць у будаўніцтве Беларускай АЭС», — расказаў ён.

Акрамя таго, кіраўнік Адміністрацыі Прэзідэнта Ігар Сергеенка наведаў Клічаўскі краязнаўчы музей, дзе азнаёміўся з гісторыяй і дасягненнямі раёна, прадстаўленымі экспанатамі.

Фота: БелТА

Выбар рэдакцыі

Грамадства

Прыёмная кампанія: хто штурмаваў ВНУ? Рэкорды і антырэкорды

Прыёмная кампанія: хто штурмаваў ВНУ? Рэкорды і антырэкорды

У БДУ 82 % залічаных на першы курс набралі 300 балаў і больш.

Калейдаскоп

Склад для дачніка. Парады ад практыкаў, як лепш захаваць ураджай на зіму

Склад для дачніка. Парады ад практыкаў, як лепш захаваць ураджай на зіму

Парады ад практыкаў, як лепш захаваць ураджай на зіму.