Вы тут

Уладзімір Ліпскі «Прыгоды Нуліка» і Жанна Міус «Несумавальная дачка»


Уладзімір Ліпскі. Прыгоды Нуліка. Мінск, Выдавецкі дом «Звязда», 2021. 

Лаўрэата Дзяржаўнай прэміі Рэспублікі Беларусь Уладзіміра Ліпскага чытачам прадстаўляць не трэба. Ён ведае, як пісаць цікавыя і змястоўныя кніжкі для дзяцей, як зачараваць іх дасціпным беларускім словам. 


Аповесць-казка для малодшага школьнага ўзросту «Прыгоды Нуліка» якраз такая кніга. Яна мае займальны сюжэт і адначасова развівае здольнасці дзяцей, прапаноўвае ім самастойна рашыць матэматычныя задачкі, адгадаць загадкі, але адбываецца гэта ў форме гульні. Маленькія чытачы могуць такім чынам паўдзельнічаць у прыгодах герояў. Нездарма казачная аповесць Уладзіміра Ліпскага ўключана ў школьную праграму для трэцяга класа, у спіс для пазакласнага чытання.

Жыве на свеце самотны Нулік. Аднойчы ён знаёміцца з Міколкам, які таксама сумуе без сябра. Так пачынаюцца прыгоды хлопчыка і Нуліка, у якія ўцягваюцца мама і тата Міколкі, яго бабуля, аднакласнікі і школьная настаўніца. Увесь час героі штосьці прыдумляюць, малююць, гуляюць, то- бок праводзяць час карысна і весела. Але аднойчы Міколка атрымлівае ў падарунак прыстаўку да тэлевізара і электронныя гульні. Ці вытрымае яго сяброўства з Нулікам гэта выпрабаванне? Ці даруе хлопчыку пакрыўджаны Нулік?

Без залішняй павучальнасці, на зразумелай дзецям мове пісьменнік тлумачыць каштоўнасць сяброўства ў жыцці чалавека. Сябра лёгка згубіць, але няпроста адшукаць зноў. Кніга будзе карыснай таксама бацькам, выхавацелям і педагогам, бо напісана з добрым веданнем дзіцячай псіхалогіі. «Звяздоўскае» выданне прыцягвае і арыгінальнымі малюнкамі Святланы Стахоўскай.

Жанна Міус. «Несумавальная дачка». Мінск, выдавецтва «Беларусь», 2021.

Што такое «зверомода»? А «буквет»? Хто такая «доктораня»? І чаму звычайная лужына раптам ператвараецца ў «волнужу»? А вось яшчэ — «птушкарыб»... Пра значэнне ўсіх гэтых дзіўных слоў можна даведацца, прачытаўшы кнігу Жанны Міус «Несумавальная дачка». Ілюстрацыі Вольгі Міхеенкі дапамогуць уявіць забаўныя сюжэты вершаў. 

Жанна Міус — аўтарка некалькіх кніг, у тым ліку кнігі «Дзіўныя дзеткі» (Выдавецкі дом «Звязда», 2018 год). У новай кнізе сабраны вершы, «несумавальныя» ва ўсіх адносінах — не толькі таму, што расказваюць пра дзіцячыя свавольствы, а яшчэ і таму, што аўтара відавочна захапляе прыдумванне словаў. Значэнне не ўсіх угадаеш адразу, але вось што такое «пераборшчаны боршч» — думаю, тлумачыць не трэба. 

Чым жа займаюцца героі кніжкі, пераважна калі бацькоў няма дома? Напрыклад, ператвараюць падлогу ў кветкавы лужок з дапамогай фламастара. Ладзяць у кватэры модны салон — у якасці мадэляў выступаюць кот і сабака. Дзеляцца адно з адным сакрэтамі, бо лічаць, што таямніцам патрэбны чыісьці вушкі. Словам, любяць няшкодна пасваволіць. Калі, вядома, не лічыць шкодай адчуванні матулі, калі тая пакаштавала баршчу з перцам, часнаком і яшчэ дзясяткам спецый. Але такія ўжо яны, вясёлыя і няўрымслівыя дзеткі. Дарослыя таксама былі такімі — у рознай ступені «несумавальнасці». 

Алена БРАВА

Выбар рэдакцыі

У свеце

Цугцванг па-варшаўску. Куды рушаць польскія ўлады?

Цугцванг па-варшаўску. Куды рушаць польскія ўлады?

Самыя важныя выклікі, з якімі палякам давядзецца сутыкнуцца ўжо адразу пасля летніх канікулаў, — гэта энергетычны крызіс, высокія працэнтныя стаўкі і будучы эканамічны спад.

Грамадства

Талакой за зялёны горад. Ці будуць падтрыманы ініцыятывы жыхароў па азеляненні горада ў конкурсе грамадзянскіх ініцыятыў?

Талакой за зялёны горад. Ці будуць падтрыманы ініцыятывы жыхароў па азеляненні горада ў конкурсе грамадзянскіх ініцыятыў?

Ці будуць падтрыманы ініцыятывы жыхароў па азеляненні горада ў конкурсе грамадзянскіх ініцыятыў?