У нядзелю 3 ліпеня Беларусь будзе адзначаць Дзень Незалежнасці. Адлюстраванне свята знойдзе і ў тэматычным эфіры беларускіх тэлеканалаў. Тэлеаўдыторыю чакаюць паказы мастацкіх фільмаў, канцэртных праграм.
На «Беларусь 3» праграма будзе складацца пераважна з кантэнту ўласнай вытворчасці і прэм'ер. Удзень глядзіце ўрачыстае пасяджэнне і святочны канцэрт да Дня Незалежнасці. Таксама напярэдадні і 3 ліпеня пакажуць шэраг адметных мастацкіх фільмаў вытворчасці Нацыянальнай кінастудыі «Беларусьфільм», сярод якіх «Гадзіннік спыніўся апоўначы» (1958 г.),
«Дзяўчынка шукае бацьку» (1959 г.), «Кіроўца аўтобуса» (1983 г.), «У жніўні 44-га...» (2000 г.). Кожны з іх адметны і варты таго, каб знайсці час яго паглядзець. Напрыклад, у суботу пакажуць гераічную аповесць Мікалая Фігуроўскага «Гадзіннік спыніўся апоўначы». ...У навагоднюю ноч 1943 года ў дом кіраўніка адной з мінскіх падпольных груп Ганны Чорнай малады падпольшчык Мікалай Дзееў прыводзіць сваю каханую дзяўчыну Марыну. Пачынаецца налёт савецкай авіяцыі. А вяртаючыся дадому пасля налёту, Марына знаходзіць у руках і ратуе жонку гаўляйтара Мінска фон Каўніца. Тая абяцае аддзякаваць дзяўчыне і ўзяць яе да сябе служкай. Гераіня згаджаеца, бо спадзяецца, што гэта яе шанц дапамагчы падпольшчыкам расправіцца з ворагам, вядомым сваімі жорсткімі злачынствамі. А пасля дзяўчына дазнаецца, што яе сябар Мікалай арыштаваны і загінуў ад катаванняў. Гэта яшчэ больш умацоўвае жаданне Марыны адпомсціць ворагу. Па заданні падпольшчыкаў яна падслухоўвае размовы Каўніца з афіцэрамі, таемна перапісвае дакументы ў яго кабінеце, і пасля падкладвае яму міну ў ложак... Варта адзначыць, што фільм заснаваны на рэальным факце знішчэння беларускімі падпольшчыкамі генеральнага камісара і гауляйтара Беларусі Вільгельма фон Кубэ. Ён загінуў ад выбуху англійскай міны з гадзіннікавым механізмам, якая была падкладзена яго пакаёўкай Аленай Мазанік. За гэты подзвіг ёй было прысвоена званне Героя Савецкага Саюза. Вестка аб забойстве Кубэ хутка разляцелася па франтавых акопах і партызанскіх лясах, па ўсім Савецкім Саюзе. Беларускім патрыётам апладзіраваў увесь антыфашысцкі свет. Гэтую аперацыю, праведзеную мінскімі падпольшчыкамі, да сёння вывучаюць у акадэміях спецслужбаў. Трэба адзначыць, што кінастужка была пэўны час лідарам па праглядах, бо ў год выхаду яе паглядзелі 35 мільёнаў тэлегледачоў.
Музычным аздабленнем святочнага эфіру «Беларусь 3» стануць канцэрты беларускіх выканаўцаў. Зможам убачыць і паслухаць такія праграмы, як «Дварцова-замкавая музыка Беларусі» і «Чатыры стагоддзі», «Тэатральная музыка беларускіх кампазітараў» з цыкла «Вечары з сімфанічным аркестрам». Таксама ў выкананні Сімфанічнага аркестра Белтэлерадыёкампаніі аўдыторыі будуць прадстаўлены «Музыка кіно», харэаграфічны спектакль «Ад смутку да вяселля» ў выкананні Беларускага дзяржаўнага акадэмічнага заслужанага харэаграфічнага ансамбля «Харошкі», традыцыйны фестываль армейскай песні «Звязда».
На тэлеканале АНТ 3-га ліпеня раніцай можна будзе паглядзець цырымонію ўскладання вянкоў і кветак у мемарыяльным комплексе «Курган Славы», а ўвечары не прапусціце святочны гала-канцэрт да Дня Незалежнасці «Наша памяць мацнейшая за час» у прамой трансляцыі.
Алена ДРАПКО
Фота з адкрытых крыніц
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
