Вы тут

З якімі карткамі едзем за мяжу? Цяпер у трэндзе UnіonPay і «БЕЛКАРТ-Мір»


Бягучая сітуацыя змяніла звыклыя схемы падарожнікаў, менавіта тых, хто выязджае за мяжу. Абмежаванні ў разліках па картках Vіsa і Mastercard рэзка павялічылі папулярнасць картак кітайскай плацежнай сістэмы UnіonPay. Але гэта не эквівалентная замена, як можа падацца на першы погляд. Эксперт плацежнага рынку, дырэктар правайдара электронных плацяжоў Assіst Belarus Вячаслаў Сенін дапаможа разабрацца, якія карткі цяпер можна выкарыстоўваць за мяжой, каб не адчуваць праблем з разлікамі.


20 гадоў таму

Для пачатку здзейснім кароткі экскурс у свет грашовых разлікаў Кітая. Кампанія Chіna UnіonPay была створана ў 2002 годзе па ініцыятыве Народнага банка Кітая і ўжо ў 2005 годзе стала ператварацца ў буйнога міжнароднага гульца. Характэрны той факт, што ў 2010 годзе UnіonPay заняла першае месца ў свеце па колькасці выпушчаных плацежных картак. У 2015 годзе плацежная сістэма UnіonPay Іnternatіonal упэўнена заняла лідзіруючую пазіцыю па колькасці аперацый па картках, апярэдзіўшы плацежную сістэму Vіsa. Доля картак UnіonPay у 2018 годзе склала 45 % ад агульнай колькасці ў свеце.

У Беларусі плацежная сістэма UnіonPay Іnternatіonal прысутнічае з 2011 года, аднак да сакавіка 2022 года вынікі яе дзейнасці на рынку Беларусі не былі такімі ўражальнымі, як у сусветных маштабах.

Ажыятажны попыт

Трэба адзначыць, што ўвядзенне санкцый плацежных сістэм Vіsa і Mastercard для расійскіх і беларускіх банкаў рэзка скараціла магчымасці прыёму картак гэтых сістэм за мяжой. І вось тут на фінансавай арэне актывізавалася афармленне картак UnіonPay.

Наш эксперт звярнуў увагу на тое, што ў нашай краіне плацежныя карткі UnіonPay выпускае толькі адна фінансавая ўстанова — камерцыйны банк. Аднак Белгазпрамбанк не чакаў такога рэзкага павелічэння попыту на кітайскія карткі ў пачатку 2022 года, і бюджэтныя варыянты карткі UnіonPay Classіc былі часова прыпынены ў выпуску з-за адсутнасці пластыку і адноўлены толькі 29 чэрвеня 2022 года. Цяпер кліенты могуць аформіць прэміяльную картку UnіonPay Platіnum за 135 беларускіх рублёў у аддзяленнях банка і 101 рубель у інтэрнэт-банкінгу. Таксама кліентам цяпер даступны бюджэтны варыянт UnіonPay Classіc за 50 беларускіх рублёў у аддзяленнях банка і 37,50 рубля ў інтэрнэт-банкінгу. Не зусім танна, але ж...

«Беларусы прывыклі выкарыстоўваць карткі Vіsa і Mastercard для разлікаў за мяжой. Аднак не варта залішне насцярожана ставіцца да папулярных сёння кітайскіх картак. Плацежная сістэма UnіonPay супрацоўнічае з больш чым 2500 фінансавымі інстытутамі ў 180 краінах і падтрымлівае правядзенне трансгранічных плацяжоў — што актуальна для падарожнікаў», — паведаміў наш эксперт плацежнага рынку Вячаслаў Сенін.

«Разам з тым, нельга прытрымлівацца іншай крайнасці і цалкам спадзявацца на ўражальную статыстыку сусветнага распаўсюджвання картак UnіonPay. Бо часта прысутнасць плацежнай сістэмы UnіonPay ў якой-небудзь краіне прадстаўлена ўсяго некалькімі банкамі. У буйных гандлёвых цэнтрах вы амаль напэўна зможаце разлічыцца карткай UnіonPay, аднак у больш дробных гандлёвых сетках магчымыя адмовы ў яе прыёме да аплаты. Напрыклад, Белгазпрамбанк першапачаткова пазіцыянаваў карткі UnіonPay як плацежны інструмент для падарожнікаў, што накіроўваюцца ў КНР. Улічваючы бягучыя абмежаванні разлікаў па картках Vіsa і Mastercard, а таксама геаграфію распаўсюджвання картак кітайскай плацежнай сістэмы, магчымае афармленне і выкарыстанне картак UnіonPay пры паездцы за мяжу. Аднак папярэдне варта азнаёміцца на сайце плацежнай сістэмы UnіonPay з магчымасцямі аплаты ў краіне вашага падарожжа», — дае рэкамендацыі спецыяліст.

Варта таксама ўлічыць, што той жа банк праводзіць разлікі з сістэмай UnіonPay у еўра. Гэта значыць, аперацыя ў валюце краіны знаходжання канвертуецца ў еўра і затым сума аперацыі ў еўра спісваецца з вашага рахунку. Таму для мінімізацыі колькасці канверсій і рызыкі змены курсу валют мае сэнс адкрыццё рахунку менавіта ў еўра.

Лыжка дзёгцю

Ёсць яшчэ адна асаблівасць картак UnіonPay, якая можа злёгку засмуціць анлайн-шопераў. Белгазпрамбанк анансаваў, што плацежныя карткі Unіon Pay недаступныя для здзяйснення аперацый у сетцы Інтэрнэт.

«Рэзюмуючы, адзначу, што ў выпадку разлікаў па картцы UnіonPay не даводзіцца разлічваць на звыклую ўніверсальнасць выкарыстання, уласцівую карткам Vіsa і Mastercard. Аднак папярэдняе вывучэнне інфармацыі па краіне падарожжа дазволіць пазбегнуць няспраўных сітуацый з цяжкасцямі ў разліках па картцы UnіonPay. Такі варыянт плацежнага інструмента цалкам дарэчны для выкарыстання», — адзначыў Вячаслаў Сенін.

Плацежная сістэма «Мір» працуе ў дзясятку краін

Ва ўмовах абмежаванняў па міжнародных разліках з'явіўся яшчэ адзін альтэрнатыўны варыянт карткі для паездкі — плацежная картка расійскай плацежнай сістэмы «Мір». Разлічыцца такой карткай можна не па ўсім свеце, а ў абмежаванай колькасці краін, такіх як Турцыя, В'етнам, Беларусь, Арменія, Узбекістан, Казахстан, Кыргызстан, Таджыкістан, Паўднёвая Асеція і Абхазія. Аднак калі вам патрэбна будзе паездка ў адну з гэтых краін, варыянт карткі «Мір» будзе прыдатным.

«БЕЛКАРТ-Мір» сябруе з інтэрнэтам

Вынікам супрацоўніцтва плацежных сістэм БЕЛКАРТ і «Мір» стала з'яўленне на тэрыторыі Беларусі картак «БЕЛКАРТ-Мір» з 2020 года. Гэтыя карткі выпускаюцца ў рамках плацежнай сістэмы БЕЛКАРТ, але прымаюцца да разлікаў ва ўсіх краінах, у якіх прадстаўлена плацежная сістэма «Мір». Трымальнік карткі «БЕЛКАРТ-Мір» можа разлічыцца або зняць наяўныя грошы ў любым месцы або прыладзе, дзе ёсць лагатып MІR.

Акрамя разлікаў у звычайных крамах і зняцця наяўных у банкаматах, картку «БЕЛКАРТ-Мір» можна выкарыстоўваць для разлікаў у сетцы Інтэрнэт, як на тэрыторыі нашай краіны, так і на сайтах, якія абслугоўваюць банкі — удзельнікі плацежнай сістэмы «Мір».

Карткі «БЕЛКАРТ-Мір» выпускаюць восем беларускіх банкаў. Кошт абслугоўвання такіх картак невысокі, а ў асобных банках плата за яго наогул адсутнічае. Безумоўна, калі падарожнік накіроўваецца ў адну з вышэйзгаданых краін, дзе прысутнічае плацежная сістэма «Мір», ідэальным варыянтам будзе адкрыццё і выкарыстанне плацежнай карткі «БЕЛКАРТ-Мір».

«Тым, хто выязджае за мяжу, не варта моцна хвалявацца з нагоды ўзніклых абмежаванняў у разліках, — падводзіць вынік абмеркавання па выбары плацежнага сродку Вячаслаў Сенін. — Існуюць два даступныя варыянты, альтэрнатыўныя карткі Vіsa і Mastercard, — карткі UnіonPay і «БЕЛКАРТ-Мір». Калі вам важная шырокая геаграфія разлікаў, то рэкамендуецца скарыстацца карткай UnіonPay. Пры гэтым трэба разумець рызыкі абмежаванай колькасці банкаў, якія абслугоўваюць гандлёвыя сеткі за мяжой або ў якіх вы можаце зняць наяўныя грошы. У такім выпадку перад паездкай трэба сабраць як мага больш інфармацыі па распаўсюджанні плацежнай сістэмы UnіonPay у краіне вашага знаходжання.

Калі ж вам прадбачыцца паездка ў Турцыю, В'етнам, Расію, Арменію, Узбекістан, Казахстан, Кыргызстан, Таджыкістан, Паўднёвую Асецію або Абхазію, лепш скарыстацца зручнай і бюджэтнай карткай «БЕЛКАРТ-Мір». Падобна на тое, што на дадзеным этапе нашым падарожнікам трэба будзе выбіраць з двух варыянтаў безнаяўных «кашалькоў». Тут, як той казаў, трэцяга не дадзена.

Сяргей КУРКАЧ

Фота Маргарыты ПАЛЮХОВІЧ

Выбар рэдакцыі

Сям'я і дэмаграфія

Надзея Ластоўская: Калі ты багацейшы, дапамажы іншаму

Надзея Ластоўская: Калі ты багацейшы, дапамажы іншаму

Якія прынцыпы закладвае ў выхаванне сваіх дзяцей лаўрэат рэспубліканскага конкурсу «Жанчына года»?

Грамадства

Гісторыя ваеннага братэрства

Гісторыя ваеннага братэрства

«Нармандыя», што стала Нёманскай.

Рэлігія

200 гадоў пад заступніцтвам Пятра і Паўла

200 гадоў пад заступніцтвам Пятра і Паўла

Гомельскі кафедральны Свята-Петра-Паўласкі сабор — адзін з самых велічных праваслаўных храмаў Беларусі, адзін з нямногіх помнікаў архітэктуры зрэлага класіцызму, які захаваўся да нашых дзён.