Вырашаць праблемы прадпрыемстваў выключна за кошт людзей недапушчальна. Аб гэтым заявіў старшыня Федэрацыі прафсаюзаў Беларусі Міхаіл Орда на VI пленуме ФПБ.
Падчас пленума яго ўдзельнікі падвялі вынікі працы за паўгоддзе і намецілі планы на будучыню. Сярод асноўных тэм — занятасць і заработная плата, Ахова працы і калектыўныя дагаворы, маніторынг цэн і дэфіцыт кадраў рабочых прафесій.
Адзначалася, што на пастаянным кантролі знаходзіліся пытанні своечасовасці выплаты і памеру заработнай платы, а таксама няпоўнай занятасці насельніцтва. За пяць першых месяцаў года выяўлена больш за 300 выпадкаў, калі наймальнікі парушалі тэрміны выплаты заробку.
Праблема няпоўнай занятасці ў маі закранула работнікаў 188 арганізацый. Некаторыя працаўнікі па ініцыятыве наймальнікаў знаходзіліся ў цэладзённым простае.
— Мы павінны стаяць адзін за аднаго, каб прайсці гэтыя складанасці, — падкрэсліў у сваім выступе старшыня ФПБ Міхаіл Орда. — Час патрабуе мабілізацыі ўсіх сіл і рэсурсаў. Мы павінны адстойваць і абараняць людзей, займаць прынцыповую пазіцыю па кожным пытанні. І глядзець за тым, каб не было перакосаў і няўзважаных рашэнняў.
У якасці прыкладу лідар нацыянальнага прафцэнтра прывёў сітуацыю, калі ў красавіку наймальнікі прапанавалі ўраду змяніць працоўнае заканадаўства. Маўляў, санкцыі і цяжкасці, таму патрэбныя дадатковыя магчымасці для мабільнасці, пераразмеркавання працоўных рэсурсаў.
— Але фактычна выявілася, што ўсе праблемы проста хочуць перакласці на людзей: звальняць за дзень, пераводзіць на іншую працу без згоды чалавека на працяглы тэрмін і гэтак далей. Федэрацыя прафсаюзаў у гэтай сітуацыі заняла выразную пазіцыю: вырашаць праблемы прадпрыемстваў выключна за кошт людзей недапушчальна, — падкрэсліў Міхаіл Орда.
Прафсаюзы не пагадзіліся і з прапановай наймальнікаў у разы павялічыць у Працоўным кодэксе дапушчальную норму звышурочных работ. Прычына такой ініцыятывы наймальнікаў — недахоп кадраў.
— Як паказвае практыка, такія падыходы не вырашаюць праблему, — упэўнены Міхаіл Орда. — На кароткі прамежак гэтая мера, магчыма, перакрые нейкія пытанні. Але ў цэлым не прынясе карысці ў перспектыве.
У 2012 годзе ўжо прымаліся рашэнні аб павелічэнні звышурочных работ са 120 да 180 гадзін. Тады казалі аб тым, што гэта цалкам закрые ўсе пытанні недахопу працоўных рэсурсаў. Сёння ж мы бачым, што дэфіцыт кадраў павялічваецца, сярэдні ўзрост рабочых на прадпрыемствах таксама вырас. І самае галоўнае: здароўе ў чалавека не жалезнае. Калі ён увесь час перапрацоўвае ад 2 да 4 гадзін у дзень і выходзіць у выхадныя, то ў яго як мінімум назапашваецца стомленасць. У выніку зніжаецца прадукцыйнасць, узрастаюць рызыкі траўматызму і гэтак далей. Ды і проста ў чалавека забіраюць яго асабісты час. Таму мы настойваем на тым, што калі дзесьці такія меры неабходныя, то іх трэба вырашаць кропкава. Тым больш што гэтае пытанне тычыцца літаральна 8-10 прадпрыемстваў па краіне.
Але нават такія адзінкавыя выпадкі патрабуюць дэталёвага разгляду. Таму прафсаюзы падымаюць падобныя пытанні на самых розных узроўнях, удзельнічаючы ў працы калегіяльных органаў: міністэрстваў, аблвыканкамаў, прадпрыемстваў.
Фота – ФПБ
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.