Вы тут

Глыбокае рыхтуецца да абласных «Дажынак»


У Глыбокага сёлета двайны клопат. Акрамя традыцыйнага жніва, якое трэба правесці паспяхова і завяршыць своечасова, рэгіён чакае абласны фестываль-кірмаш «Дажынкі-2022». І калі збор хлебнага ўраджаю ў паўночным раёне на самым старце, то падрыхтоўка да галоўнага штогадовага свята аграрыяў ідзе поўным ходам. Пра яе мы і распыталі старшыню Глыбоцкага раённага выканаўчага камітэта Аляксандра Шубскага.


— Аляксандр Мікалаевіч, добры ўраджай — заканамерны вынік працы многіх і многіх людзей: работнікаў і кіраўнікоў гаспадарак, кіраўніцтва райвыканкама, для якіх кожная жніво — як персанальнае выпрабаванне на трываласць. Словам, усіх, хто робіць адну з самых важных у свеце работ, — вырошчвае хлеб. Якія планы ў Глыбоцкім раёне на ўраджай-2022?

— Выпрабаванне на трываласць? Можа. Але для ўсіх, хто працуе ў галіне сельскай гаспадаркі раёна, ад работніка да кіраўніка, гэта свядомы выбар і нават лад жыцця.

Вялікае значэнне мае прафесіяналізм і адказная работа кадраў, іх здольнасць гібка рэагаваць на навацыі тэхнічнага прагрэсу ў галіне сельскай гаспадаркі. У ТАА «Глыбоцкі аграсэрвіс» працуюць высакакласныя спецыялісты, якія аператыўна забяспечваюць тэхнічнае абслугоўванне і рамонт не толькі ўсіх відаў сучасных трактароў, у якіх аб'яднаныя апошнія дасягненні машынабудавання і электронікі, але і сельскагаспадарчых машын, комплексных (камбінаваных) агрэгатаў, што станоўча адбіваецца на тэмпах правядзення сельскагаспадарчых работ.

Аграрыі нашага паўночнага рэгіёна з выдатнай прыродай, але цяжкага ў частцы гаспадарання на зямлі, пастаянна павышаюць сваю кваліфікацыю, спраўляюцца з усімі сур'ёзнымі задачамі, якія стаяць перад АПК, каб забяспечваць харчовую бяспеку.

Вынікам работы хлебаробаў Глыбоччыны павінны стаць 53 тысячы тон збожжавых і зернебабовых, якія мы плануем сабраць у 2022 годзе, што больш за ўзровень мінулага года на 16 тысяч тон.

— Гэта добрая нагода святкаваць «Дажынкі-2022». Безумоўна, стаць сталіцай чарговага фестывалю-кірмашу вельмі пачэсна, прэстыжна і бясконца адказна. Бо гэта заўсёды велізарная падрыхтоўчая работа. Як кіраўніцтва раёна ўспрыняло вестку пра тое, што абласныя «Дажынкі-2022» пройдуць у Глыбокім?

— Безумоўна, пазітыўна. Бо правядзенне такога форуму — значная падзея ў жыцці Глыбоччыны, якая дасць імпульс развіццю рэгіёна, павышэнню ўзроўню жыцця насельніцтва. Ператварэнню райцэнтра будуць спрыяць значныя інвестыцыі ў добраўпарадкаванне гарадской інфраструктуры, жыллёвага фонду, дарог.

Мы высока цэнім давер, аказаны нам кіраўніцтвам Віцебскага абласнога выканаўчага камітэта, абласнога Савета дэпутатаў. У той жа час разумеем меру адказнасці, ускладзеную на нас. Свята працаўнікоў вёскі — падзея не радавая, да яе трэба дбайным чынам падрыхтавацца, што цяпер мы і робім. Выразна пазначаны контуры маштабнай работы па будаўніцтве і рамонце самых розных аб'ектаў, пачынаючы ўладкаваннем тратуараў і завяршаючы будаўніцтвам такіх важных для нашага горада і раёна аб'ектаў, як раённая гімназія, гарадскі басейн у фізкультурна-аздараўленчым цэнтры, амфітэатр. Таму немагчыма не радавацца ўсім тым зменам, пераўтварэнням, якія прыйшлі да нас разам са святам «Дажынкі».

— Месцічы бачаць, як змяняецца аблічча горада, што нагадвае ў гэты час вялікую будаўнічую пляцоўку. Якія канкрэтна аб'екты чакае абнаўленне, якія набудуць новы выгляд? На аб'ектах адукацыі, у прыватнасці, у гімназіі, таксама разгорнуты грандыёзныя работы...

— У цяперашні час камунальныя службы актыўна рамантуюць дарожнае пакрыццё і тратуары ў горадзе. Асфальт пакладзены на вуліцах: Энгельса, Леніна, Маскоўская, Палявая, Школьная, Горкага, Госпітальная, Ясная, Чыгуначная, 3 Ліпеня, Савецкая, Міру — і іншых. Работы будуць працягнутыя.

Новы знадворны выгляд набываюць жылыя дамы. Яны ператвараюцца ў ходзе капітальных і бягучых рамонтаў. Усяго будзе абноўлена 24 жылыя шматкватэрныя дамы. Пасля завяршэння гэтых работ зоймемся добраўпарадкаваннем прыдамовых тэрыторый. На гэтыя мэты накіравана больш за 8 мільёнаў рублёў.

Важны для нас аб'ект — будынак раённай гімназіі, рэканструкцыя якога цалкам зменіць яго. Ужо адрамантаваны дах, цалкам замененыя сістэма вентыляцыі, электраправодка, каналізацыя. У кабінетах — новыя падлогі, на столях — падвесныя сістэмы. Цалкам адрамантаваны сталовая і кухня, закуплена неабходнае тэхналагічнае абсталяванне. У дадзены момант працягваецца ўцяпленне і афарбоўка сцен звонку будынка. Рамонтныя работы павінны завяршыцца ў жніўні, каб ужо 1 верасня дзеці селі за парты ў абноўленым будынку ўстановы адукацыі.

З нуля ўзвялі будынак гарадскога басейна, які стаў часткай фізкультурна-аздараўленчага цэнтра. Фактычна ўсе работы выкананы, і ў ліпені аб'ект будзе гатовы да здачы ў эксплуатацыю. Няма сумненняў, што цэнтр адыграе важную ролю ва ўмацаванні здароўя глыбаччан.

Абноўленай сустрэне «Дажынкі» раённая ўстанова аховы здароўя. Ужо адрамантаваны тэрапеўтычнае, інфекцыйнае і прыёмнае аддзяленні цэнтральнай раённай бальніцы, адкрыты кабінет камп'ютарнай тамаграфіі з найноўшым абсталяваннем. У цяперашні час пачаты рамонт паліклінічнага аддзялення бальніцы. Адзначу, што гэты аб'ект на асаблівай увазе прадстаўнікоў раённай, абласной улады, нашага дэпутата — старшыні Палаты прадстаўнікоў Уладзіміра Андрэйчанкі.

Працягваецца добраўпарадкаванне набярэжнай возера Кагальнае.

У цэлым, у працэсе падрыхтоўкі да абласнога фестывалю-кірмашу працаўнікоў вёскі «Дажынкі» ў Глыбокім будзе адрамантавана больш як 100 аб'ектаў гарадской, жыллёва-камунальнай і сацыяльнай інфраструктуры. Таму расказаць пра ўсё не так проста, лепш убачыць і ацаніць размах асабіста.

— Плануецца прыезд вялікай колькасці ўдзельнікаў фестывалю-кірмашу: работнікаў аграпрамысловага комплексу, артыстаў, народных майстроў і г. д. Ці зможа горад усіх прыняць, усіх накарміць, забяспечыць адпачынак?

— Безумоўна. Глыбокае — горад гістарычнага і падзейнага турызму. У даковідныя часы да нас штогод прыязджала да 50 тысяч чалавек не толькі з Беларусі, але і краін блізкага, далёкага замежжа. Ініцыятыву па размяшчэнні гасцей падхапілі прыватныя прадпрымальнікі, якія адкрылі і ўтрымліваюць шэраг гасцініц, атэляў. Ёсць, вядома, і дзяржаўная гасцініца, якая належыць Глыбоцкай жыллёва-камунальнай гаспадарцы. Таму ўсіх гасцей сустрэнем, накормім і размесцім, не сумнявайцеся.

— Абласны фестываль працаўнікоў вёскі «Дажынкі-2022» стаў добрай падставай для кардынальнага абнаўлення горада. Свята адбудзецца і пройдзе, а зручныя і прыгожыя аб’екты будуць радаваць жыхароў і гасцей Глыбокага доўгі час. Як вы лічыце, вялікае свята памяняе горад і людзей?

— Глыбачане — гэта людзі адмысловага склада характару. Яны любяць свой горад, перажываюць за яго развіццё, сучаснасць і будучыню. Ім не ўсё роўна па якіх вуліцах хадзіць, якімі гарадскімі краявідамі любавацца. Яны імкнуцца жыць у прыгажосці. Таму правядзенне «Дажынак» успрымаюць з вялікім натхненнем, бо свята працаўнікоў вёскі прыкметна абновіць і прынарадзіць наш горад.

Нам паступае шмат станоўчых водгукаў ад гараджан на пазітыўныя змены ў Глыбокім. Гэта сведчыць аб тым, што людзі бачаць памкненні рэгіянальнай — абласной і раённай — улады па паляпшэнні якасці і ўмоў жыцця ў горадзе, цэняць ужо створанае і імкнуцца да яго захавання.

Спадзяюся, што з кожным годам наш раён будзе толькі расквітаць і яшчэ не раз вітаць гасцей вялікіх і шумных святаў і фестываляў.

— Глыбоцкі раён з’яўляецца буйным прамысловым цэнтрам вобласці. На яго тэрыторыі працуюць ключавыя прамысловыя прадпрыемствы, добра развіты малы і сярэдні бізнес. Аляксандр Мікалаевіч, Пракаментуйце, калі ласка, вынікі сацыяльна-эканамічнага развіцця горада ў бягучым годзе.

— Нягледзячы на некаторыя складанасці, з якімі сутыкнуліся нашы прадпрыемствы ў сувязі з ужываннем санкцый з боку недружалюбных краін, у цэлым эканоміка раёна за мінулы перыяд 2022 года спрацавала станоўча. Судзіце самі. Сярэднямесячная заработная плата ў студзені-красавіку павялічылася больш чым на 14% да аналагічнага перыяду мінулага года (1097 рублёў), больш чым на 10% ўзраслі сукупныя паступленні даходаў кансалідаванага бюджэту да 4,2 млн.рублёў.

Прамысловы комплекс раёна прадстаўлены ў асноўным прадпрыемствамі перапрацоўкі сельскагаспадарчай прадукцыі (ААТ «Глыбоцкі малочнакансервавы камбінат», унітарнае вытворчае прадпрыемства «Глыбоцкі мясакамбінат», ААТ «Глыбоцкі камбікормавы завод», ААТ «Мосарлен», прадпрыемствам па перапрацоўцы рыбы ТАА «Фішмэн Паўэр»). Прадпрыемствы прамысловасці павялічылі на 14% аб’ём выручкі ад рэалізацыі прадукцыі (работ, паслуг), на 96,5% узрос прыбытак ад рэалізацыі прадукцыі (работ, паслуг) і склаў 7 млн.рублёў. Забяспечаны даволі высокія тэмпы росту экспарту тавараў (131,8%) і экспарце паслуг (135,9%).

Годныя паказчыкі ў суб’ектаў малога і сярэдняга прадпрымальніцтва. У цяперашні час на тэрыторыі Глыбоцкага раёна ажыццяўляюць дзейнасць 809 індывідуальных прадпрымальнікаў і 184 арганізацыі. Іх удзел у напаўняльнасці бюджэту раёна значна. Ва ўласных даходах бюджэту раёна доля паступленняў ад суб’ектаў прадпрымальніцтва складае амаль 30%. 193 фізічных асобы ажыццяўляюць сваю дзейнасць без рэгістрацыі ў якасці індывідуальных прадпрымальнікаў, 216 чалавек займаюцца рамеснай дзейнасцю, 44-з’яўляюцца суб’ектамі аграэкатурызму.

У цэлым, хочацца адзначыць вялікі патэнцыял Глыбоцкага раёна да далейшага развіцця: па выніках 2020 года Глыбоцкі раён названы лепшым па вядзенні бізнесу сярод рэгіёнаў Віцебскай вобласці з колькасцю насельніцтва менш за 50 тысяч чалавек.

Перамога ў рэспубліканскім конкурсе «Лепшы горад (раён) і вобласць для бізнесу Беларусі-2020», які праводзіла Рэспубліканская канфедэрацыя прадпрымальніцтва, — другая па ліку для Глыбоцкага раёна. Тры гады таму Глыбоччына атрымлівала такую ж высокую ўзнагароду. На думку спецыялістаў канфедэрацыі, гэты факт — найлепшае пацверджанне граматна арганізаванай працы, у аснове якой — канструктыўны дыялог бізнесу і ўлады.

— Падзеі апошняга часу паказваюць, што жыццё дынамічна мяняецца. Для грамадства важная ідэя народнага адзінства як адна з магчымасцяў дасягнення пастаўленых мэт. На ваш погляд, у чым сіла адзінства глыбаччан?

— Перакананы, што глыбаччан аб'ядноўвае агульнасць поглядаў на разуменне сучасных праблем грамадства: на гісторыю раёна і краіны ў цэлым, захаванне культуры і традыцый для будучых пакаленняў. Глыбокае славіцца людзьмі, дасягненні якіх вядомыя далёка за межамі горада. Усё гэта — падстава для гонару кожнага глыбаччаніна, яго пункт адліку, яго цэмент, радавы корань, які аб'ядноўвае людзей розных узростаў, канфесій. Таму не дзіўна, што менавіта ў Глыбокім ёсць Плошча 17 Верасня, якая атрымала сваю назву ў гонар вядомай гістарычнай падзеі — аб'яднання Заходняй і Усходняй Беларусі. Менавіта на гэтай плошчы, адзін насупраць аднаго, стаяць два найпрыгажэйшыя храмы — праваслаўны і каталіцкі. Іх можна прылічыць да сімвалаў непарушнага адзінства нашага грамадства, якое грунтуецца на ўзаемнай павазе і любові да блізкага і Радзімы.

Пытанні задавала Аксана КАРУНА

Выбар рэдакцыі

Эканоміка

Аляксандр Сотнікаў: «Чуткі пра „смерць“ наяўных моцна перабольшаны»

Аляксандр Сотнікаў: «Чуткі пра „смерць“ наяўных моцна перабольшаны»

Банкамат становіцца па-сапраўднаму шматфункцыянальнай прыладай.