Знакамітыя перазвоны «Славянскага базару» не змаўкаюць на вулачках культурнай сталіцы. Кожны з сямі дзён форуму мастацтваў напоўнены яркімі мерапрыемствамі і каларытнымі конкурсамі. Мы даведаліся, наколькі моцна б’ецца «сэрца» фестывалю ў гэтыя ліпеньскія дні.
14 ліпеня на сцэне Летняга амфітэатра адбылося ўрачыстае адкрыццё 31-га форуму мастацтваў, які даўно стаў візітнай карткай не толькі Віцебшчыны, але і ўсёй Беларусі. Павіншаваў гасцей, удзельнікаў і жыхароў Віцебска са святам творчасці і адзінства Прэзідэнт Рэспублікі Беларусь Аляксандр Лукашэнка. Ён уручыў Гран-пры Міжнароднага дзіцячага музычнага конкурсу нашаму земляку Елісею Касічу, які па выніках двух конкурсных дзён атрымаў ад журы максімальны бал — 140. Гэта своеасаблівы рэкорд, бо члены журы ацэньвалі не столькі шоу, колькі вакальныя даныя юных зорачак.
Пастановай Вышэйшага дзяржаўнага савета Саюзнай дзяржавы прэміямі Саюзнай дзяржавы за 2021–2022 гады за творы літаратуры і мастацтва, якія ўносяць вялікі ўклад ва ўмацаванне брацкіх, дружалюбных адносін і ўсебаковае супрацоўніцтва паміж дзяржавамі — членамі Дагавора аб стварэнні Саюзнай дзяржавы, узнагароджаны аўтарскі калектыў канцэртных праграм Міжнароднага фестывалю мастацтваў «Славянскі базар у Віцебску»; аўтарскі калектыў Ржэўскага мемарыяла Савецкаму салдату; аўтарскі калектыў выдавецкага праекта, прысвечанага 75-годдзю Перамогі народаў Савецкага Саюза ў Вялікай Айчыннай вайне «Гістарычная памяць Саюзнай дзяржавы». Высокія ўзнагароды ўручыў Прэзідэнт Беларусі, як і спецыяльную ўзнагароду «Праз мастацтва — да міру і ўзаемаразумення» Анатолю Ярмоленку і ансамблю «Сябры». Іх імянная зорка на Алеі каля амфітэатра ўрачыста запалілася напярэдадні. «Цудоўна, што такая высокая ўзнагарода за мір і ўзаемаразуменне ўручаецца на нашай мірнай і незалежнай зямлі. Важна, каб гэтыя паняцці існавалі не толькі ў Беларусі, але і за яе межамі. Няхай так будзе заўсёды, ганарыцеся і шануйце гэта, паважаныя сябры!», — падзякаваў Анатоль Іванавіч.
Свае шчырыя віншаванні Віцебску даслаў Прэзідэнт Расійскай Федэрацыі Уладзімір Пуцін, іх на сцэне зачытаў намеснік старшыні ўрада РФ Аляксей Авярчук.
На святочным канцэрце радавалі гледачоў зоркі айчыннай і замежнай эстрады: Дзяніс Майданаў, Ірына Дарафеева, Анатоль Ярмоленка і ансамбль «Сябры», Вікторыя Алешка, Руслан Аляхно, Зара. Цудоўны нумар «Лібертанга» прадставілі Марыа Стэфана П’етрадаркі і Карэн Карапецян у суправаджэнні паветраных гімнастаў Белдзяржцырка. Даўні госць фестывалю Грыгорый Лепс выканаў свае знакамітыя хіты «Я паднімаю рукі», «Я шчаслівы» разам з залай. Завітаў на ўрачыстае адкрыццё і Сяргей Бязрукаў з пранікнёным вершам Канстанціна Сіманава «Чакай мяне». Прадстаўнікі сталага пакалення з радасцю сустракалі групу «Зямляне» з хітом «Трава ля дома» і яскравых Arabesque. Пераможца першага беларускага шоу «Х-фактар» Андрэй Панісаў выканаў з «Песнярамі» знакамітую «Волагду». Па традыцыі яркай вясёлкай салютаў заззяла над Віцебскам начное неба.
На фестывалі стартавалі Дні Саюзнай дзяржавы. Сёлета арганізатары пашырылі фармат — павялічылі колькасць саюзных Дзён і сумесных з рэгіёнамі Расіі праектаў — яны пройдуць на чатырох асноўных пляцоўках. Старт мерапрыемствам даў open-aіr на Пушкінскай плошчы «Гуляй, народ!», у канцэрце ў гістарычным цэнтры культурнай сталіцы ўзялі ўдзел Надзея Крыгіна і акадэмічны рускі народны ансамбль «Расія» імя Людмілы Зыкінай, народны ансамбль «Нясвіжскія лыжачнікі», ансамбль танца, музыкі і песні «Белыя росы», тэатр песні і танца Смаленскага дзяржаўнага інстытута мастацтваў і іншыя.
У канферэнц-зале Віцебскага дзяржаўнага ўніверсітэта імя Машэрава ў трэці раз прайшоў круглы стол у фармаце дыскусійнай пляцоўкі па тэме: «Саюзная дзяржава — прастора для развіцця творчага патэнцыялу моладзі», у якой узялі ўдзел Дзяржаўны сакратар Саюзнай дзяржавы Дзмітрый Мезенцаў, міністр інфармацыі Беларусі Уладзімір Пярцоў, міністр культуры Беларусі Анатоль Маркевіч, старшыня Віцебскага аблвыканкама Аляксандр Субоцін, прадстаўнікі творчай інтэлігенцыі, айчынныя і замежныя артысты, лаўрэаты прэміі Саюзнай дзяржавы.
«Культурны і духоўны падмурак, які на працягу стагоддзяў фарміравалі нашы народы, непарушны, — адзначыў у прывітальным слове Дзмітрый Мезенцаў. — Сёння весці дыялог з маладым пакаленнем мы павінны на роўных, запрашаць іх да ўдзелу ў культурна-асветніцкіх праграмах. Нягледзячы на тое, што ў кантэксце апошніх палітычных падзей маюцца спробы перайначыць гісторыю, умаліць подзвіг савецкага народа, прэзідэнты дзвюх краін не раз падкрэслівалі важнасць гістарычнай памяці. Мы павінны помніць пра мужнасць і гераізм савецкіх салдат, для якіх цана свабоды для мільёнаў была вышэйшая за цану свайго жыцця».
Паміж Беларуссю і Расіяй наладжана моцнае культурнае супрацоўніцтва. Напрыклад на базе Вялікага тэатра Беларусі будуць арганізаваны сумесныя адукацыйныя мерапрыемствы, дзе тэатр стане своеасаблівым рэсурсна-метадычным цэнтрам для моладзі. Цяпер вядзецца работа па стварэнні ўнікальнага творчага аб'яднання — маладзёжнага беларуска-расійскага сімфанічнага аркестра. Абмеркаванне сумесных ініцыятыў будзе працягнута ў бягучым годзе ў Мінску на форуме, прысвечаным адзінай культурнай прасторы Беларусі і Расіі. Аб гэтым у відэазвароце расказала міністр культуры Расійскай Федэрацыі Вольга Любімава.
«Мы актыўна працуем з Расіяй не толькі ў межах Саюзнай дзяржавы — паміж рэгіёнамі абедзвюх краін падпісана больш за 80 дагавораў у сферы культурна-адукацыйнага супрацоўніцтва. У чарговы раз восенню ў Магілёве пройдзе фестываль творчасці людзей з інваліднасцю «Разам мы зможам больш!» , у бягучым годзе ў Беларусі пройдуць Дні расійскай духоўнай культуры. Зараз вядзецца падрыхтоўка нашых дзіцячых творчых калектываў для ўдзелу ў Першым дзіцячым форуме ў Маскве», — расказаў міністр культуры Рэспублікі Беларусь Анатоль Маркевіч.
Вечарам на сцэне амфітэатра пройдзе гала-канцэрт «Саюзная дзяржава запрашае» з удзелам вядучых артыстаў і калектываў двзвюх краін. Добры настрой гледачам падораць Алена Ланская, ансамбль «Песняры», «Хор Турэцкага», Дзіяна Гурцкая, Дзяржаўны ансамбль песні і танца Рэспублікі Татарстан, кубанскі казачы ансамбль «Крыніца» і іншыя.
15 ліпеня ў Віцебскай абласной філармоніі адбыўся сольны канцэрт Дзідзюлі «Музыка свету», дзе музыкант выканаў любімыя кампазіцыі «Айседора», «Фламенка» і шэраг іншых. З праграмай «Казацкі край» у канцэртнай зале «Віцебск» выступіў Дзяржаўны казацкі ансамбль песні і танца «Стаўраполле», а вечарам зала напоўнілася гукамі джаза.
16 ліпеня, стартуе XXXІ Міжнародны конкурс выканаўцаў эстраднай песні «Віцебск-2022», на якім нашу краіну прадстаўляе Ганна Трубяцкая.
Аляксандра ГВОЗДЗЕВА
Фота: БелТА
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
