Андрэй Іванец азнаёміўся з работай устаноў адукацыі Петрыкаўшчыны

Падчас візіту на Петрыкаўшчыну Андрэй Іванец азнаёміўся з работай гімназіі і сярэдняй школы №2, ясляў-сада №5 і дашкольнага цэнтра развіцця дзіцяці ўпраўлення сацыяльнага развіцця і жыллёва-камунальнай гаспадаркі ТАА «Беларуськалій».

Наведаў міністр адукацыі таксама Петрыкаўскае дзяржаўнае спецыяльнае прафесійна-тэхнічнае вучылішча закрытага тыпу №1 лёгкай прамысловасці. У гэту ўстанову накіроўваюцца непаўналетнія ва ўзросце ад 11 да 18 гадоў, якія маюць патрэбу ў асаблівых умовах выхавання, уступілі ў канфлікт з законам. Пасля заканчэння навучання яны атрымаюць прафесію швачкі або тэрмааддзелачніка швейных вырабаў. Асаблівая ўвага ва ўстанове закрытага тыпу надаецца не толькі прафесійнай падрыхтоўцы, але і рэабілітацыі і рэсацыялізацыі непаўналетніх: адукацыі, арганізацыі вольнага часу, аказанні медыка-псіхалагічнай, псіхолага-педагагічнай і сацыяльна-прававой дапамогі. Міністр азнаёміўся з матэрыяльна-тэхнічнай базай, умовамі навучання і пражывання. 

Падчас агляднай экскурсіі ва ўстанову кіраўніку ведамства адрасавалі пытанне аб элементах школьнай формы ў гэтым навучальным годзе. Ён запэўніў, што праблем з формай няма.

- Пытанне школьнай формы ў многіх бацькоў надуманае: чаму маё дзіця павінна быць як усе? Я ўсім кажу, што школа - гэта ўстанова адукацыі, у якой ёсць распарадак, правілы, і, калі прыходзіш ў школу, іх трэба выконваць, - зазначыў Андрэй Іванец.

Кіраўнік ведамства нагадаў, што 1 верасня кожная школа павінна ўвесці адзін адметны элемент. Гэта можа быць камізэлька, пінжак, бомбер, вадалазка. Пры гэтым значок - гэта эмблема, а не элемент адзення і павінна быць нанесена на адметны элемент школьнай формы.

Як патлумачыў Андрэй Іванец, Міністэрствам адукацыі прапанавана  анлайн-анкетаванне па гэтаму пытанню. У ім можна апісаць свае перавагі па каляровай гаме і наборы элементаў школьнай формы. Пры гэтым анкета ўлічвае статус таго, хто адказвае на яе пытанні - навучэнец, педагог, маці ці бацька вучня.

Між тым на базе Петрыкаўскай гімназіі Андрэй Іванец і прадстаўнікі педагагічнай грамадскасці раёна ў фармаце адкрытага дыялога абмеркавалі і іншыя актуальныя пытанні развіцця сістэмы адукацыі.

Наталля КАПРЫЛЕНКА

Фота Ірыны АСТАШКЕВІЧ