Наперадзе два дні спякоты. Удзень паветра прагрэецца да плюс 20–27 градусаў

Нягледзячы на тое, што другі месяц лета стартаваў гарачым надвор’ем, ён не змог папоўніць шэрагі цёплых месяцаў. Сярэдняя тэмпература паветра ў гэтым месяцы аказалася на 1 градус ніжэйшай за кліматычную норму. Пры гэтым па дажджах норма ліпенем была выкананая, а месцамі па захадзе краіны нават перавышаная ў 2–2,5 раза, паведамілі спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

А 5 жніўня наогул нам абяцаюць жоўты ўзровень небяспекі з-за спякоты. Чакаецца пераважна без ападкаў. Толькі днём па паўднёвым усходзе краіны, дзе адаб’ецца ўплыў няўстойлівай паветранай масы, месцамі пройдуць кароткачасовыя дажджы з навальніцамі. Удзень паветра прагрэецца да плюс 27–33 градусаў.

У суботу ўмовы надвор’я пачнуць мяняцца. У начныя гадзіны яшчэ захаваецца ўплыў поля павышанага атмасфернага ціску, таму істотных ападкаў не прагназуецца. А вось раніцай і ўдзень на нашу тэрыторыю чакаецца перамяшчэнне франтальнага падзелу з Заходняй Еўропы, які праявіць сябе на большай частцы краіны кароткачасовымі дажджамі. Месцамі дажджы будуць суправаджацца навальніцамі і ўзмацненнем ветру да моцнага парывістага. Тэмпература паветра ўначы складзе плюс 15–20 градусаў. У дзённыя гадзіны тэмпературны фон будзе даволі кантрасны: ад плюс 22 градусаў па паўночным захадзе ў зоне атмасфернага фронту да плюс 32 градусаў па паўднёвым усходзе краіны.

Цяпло пачне сыходзіць ад нас ужо ў нядзелю. У гэты дзень яшчэ будзе захоўвацца ўплыў франтальнага падзелу, які ссоўваецца ў паўднёва-ўсходнім напрамку. Таму ноччу і раніцай на большай частцы тэрыторыі краіны, а днём па паўднёвым усходзе прагназуюцца кароткачасовыя дажджы. У асобных раёнах прагрымяць навальніцы. Пры гэтым тэмпературны фон па краіне панізіцца: ноччу будзе плюс 9–15 градусаў, а ў паўднёва-ўсходніх раёнах плюс 16–19 градусаў. Максімальная тэмпература ўдзень не перавысіць плюс 20–26 градусаў.

Паводле папярэдніх прагнозаў сіноптыкаў, у пачатку чарговага працоўнага тыдня атмасферны ціск пачне расці, дажджоў стане менш. Яны будуць насіць кароткачасовы характар і выпадаць лакальна. У панядзелак будзе пераважна без ападкаў, толькі месцамі па поўдні краіны магчымы кароткачасовыя дажджы. Ноччу і раніцай у асобных раёнах чакаецца слабы туман. Уначы тэмпература паветра складзе плюс 8–15 градусаў, удзень — плюс 20–27 градусаў. А ў аўторак-сераду, 9–10 жніўня, ноччу будзе пераважна без ападкаў. Днём у асобных раёнах краіны магчымы кароткачасовыя дажджы. Уначы і раніцай месцамі туман. Тэмпература паветра ўначы панізіцца да плюс 7–14 градусаў.

Удзень паветра прагрэецца да плюс 20–27 градусаў.

Сяргей КУРКАЧ

Прэв’ю: БелТА