Вы тут

Чачэрская ААТ «Зорка». Гаспадарка за апошнія 15 гадоў стала ўзорнай у Гомельскай вобласці


Дбаць пра харчовую бяспеку краіны працягвае цёзка газеты «Звязда» — аднайменнае сельгаспрадпрыемства ў Чачэрскім раёне. Яго калектыў перакананы: зорнае імя 92 гады таму гаспадарка магла атрымаць менавіта ў гонар аднаго з першых выданняў Беларусі. Апошнім часам адкрытае акцыянернае таварыства ў беларускамоўным варыянце на афіцыйных дакументах носіць назву «Зорка». Але калектыў адчувае сябе менавіта «звяздоўцамі». У юбілейную дату, якая выпала на самую гарачую пару — жніво, карэспандэнт «Звязды» завітала на Чачэршчыну.


Дырэктар ААТ «Зорка» Чачэрскага раёна Галіна Трыбунах аглядае ўраджай сланечніка.

Аб дасягненнях ААТ «Зорка» ведаюць далёка за межамі Чачэрскага раёна. Сельгаспрадпрыемства за апошнія 15 гадоў па праве заваявала статус аграрнага лідара гомельскага Засажэўя. У акцыянернае таварыства аб'яднана пяць гаспадарак — колішнія саўгасы «Бяляеўскі» і «Сож-1», КСУП «Нісімкавічы» і «Звязда», у даверным кіраванні галаўнога прадпрыемства таксама мясцовая гаспадарка «Палессе». Сям'я ж «звяздоўцаў» — каля 200 чалавек. Працуюць людзі і з Чачэрска, і з населеных пунктаў, што знаходзяцца на тэрыторыі іншых гаспадарак.

— З намі той, хто жадае годна працаваць і годна жыць, — пераканана дырэктар ААТ «Зорка», адна з самых вядомых жанчын-кіраўнікоў сельгаспрадпрыемстваў у краіне, узнагароджаная медалём «За працоўныя заслугі» Галіна Трыбунах.

За ўсю гісторыю існавання ў «звяздоўскага» калектыву было толькі сем кіраўнікоў. Галіна Пятроўна — сёмы кіраўнік, а ўзначаліла гаспадарку ў 2007 годзе. Магія лічбаў таму віной ці не, дырэктар не ведае, але менавіта гэта работа стала лёсавырашальнай не толькі для Галіны Пятроўны, але для ўсіх членаў яе сям'і. Кіраванне гаспадаркай — справа жыцця і для яе мужа, Сяргея Васільевіча. Ён — і другая палавінка, і правая рука, і памочнік ва ўсіх справах. Сяргей Трыбунах — намеснік дырэктара, якім ганарыцца калектыў.

— Мы заўсёды прытрымліваемся правіла ў рабоце: дзяржаўныя пытанні вышэй за ўсё. Стабільная работа нашай гаспадаркі — гэта задача, якую паставіла краіна перад маім калектывам, і яе абавязкова трэба выканаць. Калі ёсць праблемы са спецыялістам у рабоце, абавязкова знайду падыход, — расказвае Галіна Трыбунах.

З дырэктарам ААТ «Зорка» выязджаем у поле. Тэрыторыя гаспадаркі значная па плошчы. За дзень кіраўнік, здараецца, наведваючы толькі асноўныя аб'екты прадпрыемства, за рулём машыны пераадольвае да 350 кіламетраў. Цяпер самы гарачы сезон для аграрыяў — гэта і час выпрабавання, як наладжана ў калектыве работа супрацоўнікаў машынна-трактарнага парка, тлумачыць Галіна Пятроўна. Хоць, пераканана, у сельскай гаспадарцы «не гарачых» сезонаў увогуле няма. Праца на зямлі — няспынная, бы само жыццё.

Галоўны ветэрынарны ўрач і галоўны заатэхнік ААТ «Зорка» Аляксандр Шуманаў і Алена Малашкіна.

— Цяпер працягваем убіраць збожжавыя культуры, прэсуем саломку, звозім з палёў, рыхтуемся да сяўбы азімага рапсу, пачынаем рыхтаваць глебу, — пералічвае дырэктар гаспадаркі. — Між тым кожны з нашых працаўнікоў разумее, што хлеб павінен быць на стале ў кожнай беларускай сям'і, і гэта не пустыя словы для нашага калектыву. Перад пачаткам уборачнай кампаніі, калі збіраемся з супрацоўнікамі, я заўсёды заклікаю: лічыце, што мы зараз з вамі на фронце. Мы выйшлі ў поле, і для нас няма больш шляху назад. Мы павінны ісці хутка і толькі наперад, прыбраць тое, што выгадавала зямелька наша, павінны ўсё сабраць і пакласці ў засекі, адправіць у дзяржзаказ, — пераканана кіраўнік ААТ «Зорка».

Сумленная праца на зямлі абавязкова адгукнецца добрым заробкам, гэта таксама правіла «звяздоўцаў».

— Перад выездам у поле кожны камбайнер атрымлівае папку з расцэнкамі за тону намалочанага збожжа. Пасля змены кожны ўжо ведае, колькі зарабіў за дзень. Цяпер, у сезон, толькі за адзін месяц механізатары, задзейнічаныя на ўборачнай, атрымліваюць звыш шасці тысяч рублёў. Гэта вельмі матывуе супрацоўнікаў. У цэлым жа за першае паўгоддзе бягучага года сярэдняя заработная плата ў нашай гаспадарцы склала звыш 1,7 тысячы рублёў, — тлумачаць галоўны эканаміст і галоўны бухгалтар ААТ «Зорка» Святлана Каржова і Валянціна Іваненка.

Сёння ў гаспадарцы адмовіліся ад практыкі браць падчас жніва ў памочнікі камбайнера непрафесійна падрыхтаваных спецыялістаў. Ставяць перад супрацоўнікамі задачу, каб на любым этапе ўборкі памочнік камбайнера мог цалкам замяніць старэйшага ў экіпажы, стаць паўнавартасным членам брыгады па рамонце тэхнікі падчас жніва. Гэта
дазваляе ў тым ліку максімальна хутка нават у полі адрамантаваць машыны і мінімізаваць іх прастоі ў полі.

Ёсць у «звяздоўцаў» і яшчэ адно абавязковае правіла ў рабоце — быць шматпрофільнымі спецыялістамі. Напрыклад, маладыя кадры — загадчык рамонтных майстэрань Максім Макарэвіч і інжынер па выпуску сельгастэхнікі Аляксей Нарушаў — могуць працаваць на любой сельгастэхніцы і падтрымаць, дапамагчы супрацоўнікам сваіх падраздзяленняў на ўсіх этапах работы.

— Створана ў гаспадарцы і моцная каманда па рамонце машынна-трактарнага парка. Акрамя таго, самі механізатары вельмі адказна ставяцца да тэхнікі, на якой працуюць, — зазначае Галіна Трыбунах і з гонарам пералічвае імёны найлепшых з найлепшых у камандзе трактарыстаў-машыністаў: Уладзімір Дзятлаў, Іван Павілкоў, Сяргей Куркоў, Мікалай Брайкоў, Аляксандр Каплуноў. Гонар калектыву, па словах кіраўніка гаспадаркі, — галоўны інжынер Віталь Кандраценка і галоўны аграном Уладзімір Сахараў.

У арсенале гаспадаркі сёння — 10 збожжаўборачных камбайнаў: палова — новенькіх, набытых у тым ліку па Указе Прэзідэнта № 146.

Загадчык МТФ на 600 галоў буйной рагатай жывёлы Яўген Нарушаў.

— Дзякуй Аляксандру Рыгоравічу: як бы ні было складана, як бы ні было цяжка, заўсёды сельская гаспадарка атрымлівае адчувальную падтрымку кіраўніка дзяржавы. Указ Прэзідэнта дае магчымасць аграрыям набываць любую тэхніку і трактары айчыннай вытворчасці. Так, летась мы набылі два збожжаўборачныя камбайны і яшчэ два — сёлета. Адзін камбайн, набыты зусім нядаўна таксама па 146-м указе, але ўжо за бюджэтныя грошы, — гэта падтрымка гаспадаркі ад кіраўніка Гомельскай вобласці Івана Крупко, — тлумачыць Галіна Трыбунах.

Добрая тэхніка на ўзбраенні аграрыяў — гарантыя таго, што і надалей гаспадарка зможа высокімі тэмпамі развіваць свой асноўны кірунак — жывёлагадоўлю. На пяці фермах ААТ «Зорка» — больш за пяць тысяч галоў буйной рагатай жывёлы. Штодня ад «звяздоўскіх» рагуль на перапрацоўку на Рагачоўскі малочны камбінат пастаўляецца 34 тоны малака.

— У нас ёсць кароўкі, якія даюць больш за дзевяць тон малака. Такія добрыя вынікі па надоях — гэта праца не аднаго дня, а працяглай сістэмнай работы, — падкрэслівае галоўны заатэхнік ААТ «Зорка» Алена Малашкіна і расказвае, што яе даяркі і заатэхнікі ведаюць усіх сваіх каровак «у твар», як кажуць, адносяцца з вялікай пяшчотай і клопатам, даюць ім мянушкі.

Алена Ціханаўна, якая сама 20 гадоў жыцця аддала рабоце галоўным заатэхнікам, пераканана, што работа з жывёлай самая цікавая і вельмі адказная.

— Я заўсёды кажу сваім жывёлаводам, што ў нас такая вытворчасць: гэта як мартэнаўская печ — калі яе спыніць, усё прападзе дарэмна. Таму ў нашай рабоце няма такога, што мы дабіліся паказчыкаў добрых і сядзім спакойна. Калі прыйшла працаваць у гаспадарку, крыху больш за тры тоны малака даілі, а цяпер — амаль 35, але гэта нагода толькі яшчэ больш развівацца і ўдасканальваць работу, — дзеліцца Алена Малашкіна.

Дарэчы, прозвішча галоўнага заатэхніка ў ААТ «Зорка» таксама праслаўляе чарговую працоўную дынастыю. Агульны працоўны стаж — больш чым 30 гадоў — за плячыма мужа Алены Ціханаўны Фёдара Малашкіна і яго брата Рыгора Малашкіна. Праслаўляе працоўную сямейную дынастыю малады супрацоўнік, які ўзначальвае МТФ на 600 галоў буйной рагатай жывёлы, Яўген Нарушаў.

— На працу іду з задавальненнем, — шчыра дзеліцца Яўген Віктаравіч, бацька якога доўгі час прапрацаваў у роднай гаспадарцы трактарыстам. — Скончыў універсітэт і прыйшоў працаваць сюды па сваёй спецыяльнасці праграмістам. Пасля прапанавалі заняць пасаду загадчыка МТФ, пагадзіўся і не пашкадаваў. Працуем зладжана.

Увогуле, зладжана працуе ўся каманда «звяздоўцаў». Кіраўнік калектыву Галіна Трыбунах упэўнена: фірмовы стыль яе супрацоўнікаў — менавіта сумленная праца.

— Памятаю добра, што, калі толькі прыйшла працаваць сюды дырэктарам, у адно імгненне разумела, з кім з кіраўнікоў падраздзяленняў, адказных спецыялістаў спрацуемся, а з кім — не. Наш чалавек — гэта той, хто якую высокую пасаду ў гаспадарцы не займаў, ніколі не пройдзе міма простага рабочага, якому патрэбна дапамога, — закасае рукавы і шчыра дапаможа. Сёння ў нас працуюць добрыя маладыя спецыялісты і надзейныя працаўнікі са значным стажам работы. З такой камандай, пераканана, мы зможам усё.

Наталля КАПРЫЛЕНКА

Фота аўтара

Выбар рэдакцыі

Культура

Янка Купала: з ХХ стагоддзя ў ХХІ. Часопіс «Роднае слова» прэзентаваў сваю версію сучаснага купалазнаўства

Янка Купала: з ХХ стагоддзя ў ХХІ. Часопіс «Роднае слова» прэзентаваў сваю версію сучаснага купалазнаўства

У Дзяржаўным літаратурным музеі Янкі Купалы 5 кастрычніка адбылася прэзентацыя «Янка Купала: з ХХ стагоддзя ў ХХІ», прысвечаная ліпеньскаму

Грамадства

Беспілотны і электрычны транспарт: што прапануюць беларускія вучоныя

Беспілотны і электрычны транспарт: што прапануюць беларускія вучоныя

Аб'яднаны інстытут машынабудавання Нацыянальнай акадэміі навук Беларусі сёлета святкуе 65-годдзе.