Набор для «Аліўе», фартух з кашулі і марынаваныя памідоры

Набор для «Аліўе»

• Спатрэбіцца на літровы слоік: 4-5 агуркоў сярэдняга памеру, 300—400 г зялёнага гарошку, 5 гарошын чорнага перцу, 2 гарошыны духмянага перцу, галінка кропу з парасонікам, пару лісточкаў чорнай парэчкі. Для марынаду: 350 г вады, 1 ст. л. солі (без горкі), 2 ст. л. цукру, 1 ст. л. 9 %-га воцату.

Гарошак папярэдне адварыць 15-20 хвілін. Агуркі замачыць загадзя ў халоднай вадзе на ноч. У падрыхтаваны слоік пакласці спецыі і кроп, потым агуркі і зверху гарошак.

Двойчы заліць кіпенем, трэці раз марынадам, закруціць. Перавярнуць слоікі дном уверх, ухутаць і пакінуць да поўнага астывання.

Кансерваваная кукуруза

• Спатрэбіцца: маладая кукуруза. Для марынаду на 4 паўлітровыя слоічкі: вада — 1 л; цукар — 2 ст. л.; соль — 30 г; лімонная кіслата — 0,5 ч. л.

Кукурузу чысцім ад лісця, прамываем і складваем у рондаль.

Маладая кукуруза варыцца хвілін 15—20, старая — ад адной да 1,5 гадзіны.

Звараныя пачаткі перакладваем у халодную ваду — гэта дапаможа лёгка і хутка аддзяліць зерне. Засыпаем яго ў паўлітровыя слоічкі.

Варым марынад, змяшаўшы ўсе інгрэдыенты, даводзім да кіпення і праз пару хвілін выключаем агонь. Заліваем марынад у слоічкі і закручваем, пераварочваем, ухутваем і пакідаем да астывання.

Марынаваныя памідоры

• Спатрэбіцца на трохлітровы слоік: памідоры — 2 кг, салодкі перац — 1 шт., цыбуля рэпчатая — 1 шт., часнок — 5 сярэдніх зубкоў, сельдэрэй ліставы — 2-3 галінкі, чорны перац гарошкам — 10 шт.; соль — 1 ст. л.; цукар — 2 ст. л., воцат 9 % — 2 ст. л.

У чыстыя сухія слоікі складваем гародніну і вострыя прыправы. На дно — чорны перац гарошкам, палову балгарскага перцу, часнок, палову цыбуліны (нарэзаць кольцамі). Пасля напаўняем слоікі памідорамі. Калі палова будзе запоўненая, зноў кладзём цыбулю і салодкі перац, а потым зноў — памідоры.

Заліваем кіпенем і пакідаем на 30 хвілін. Пасля таго зліваем ваду і зноў даводзім да кіпення, дадаём соль, цукар і воцат. Заліваем слоікі кіпячым марынадам і закручваем.

Слоікі з памідорамі абавязкова трэба перавярнуць і ўхутаць, у такім выглядзе пакінуць да поўнага астывання.

• Калі страве трэба надаць лёгкія часночныя ноткі, але вы пабойваецеся перабраць з пахам, натрыце посуд зубком часнаку, перш чым пакласці туды ежу.
• Дасведчаныя гаспадыні знойдуць дастойнае ўжыванне піву: гэты напой з соевым соусам стане цудоўным марынадам для мяса, а невялікая колькасць цёмнага піва, дададзенага пры тушэнні гародніны, зробіць страву больш вытанчанай на смак.

Фартух з мужчынскай кашулі

Каб пашыць фартух з мужчынскай кашулі , яе трэба спачатку распароць. Дарэчы, калі кашуля цэлая або з малаважнымі пашкоджаннямі, з яе выйдуць адразу два поўнапамерныя фартухі, нават з нагруднікамі. З рукавоў неабходна зрабіць паясы і шыйныя завязкі, са спінкі — пярэднюю частку.

Яе можна выкраіць цалкам, адно палатно ад падола да верху нагрудніка, а можна зрабіць адразную па лініі таліі. З перадам паступіце гэтак жа, як са спінкай, толькі папярэдне выдаліце гузікі і злучыце дзве паловы пераду швом па лініі зашпількі. Застанецца толькі падшыць зрэзы, і фартухі гатовыя!

Прэв'ю: pixabay.com