Вы тут

«Беларусы не павінны нічога адчуць». Як эканоміка пераадольвае санкцыі


У аўторак Прэзідэнт Беларусі Аляксандр Лукашэнка фактычна сам правёў пасяджэнне Савета Міністраў, якое было прысвечана функцыянаванню эканомікі ва ўмовах санкцый і мерам па іх пераадоленні. Больш за тры гадзіны спецыялісты з розных бакоў разглядалі аспекты эканамічнай устойлівасці: імпартазамяшчэнне, нарошчванне экспарту, дзейнасць на знешніх рынках, выкананне сацыяльных абавязкаў перад насельніцтвам. Мы пацікавіліся ў спецыялістаў, якія прысутнічалі на Саўміне, як будуць вырашацца актуальныя эканамічныя праблемы.


Міністр антыманапольнага рэгулявання і гандлю Аляксей Багданаў расказаў, як ідзе кантроль за цэнаўтварэннем на ўнутраным рынку. «У нас ёсць спецыяльная пастанова, якая рэгулюе спажывецкія тавары на ўнутраным рынку, іх цэнаўтварэнне. І там ёсць два механізмы: больш жорсткі і менш жорсткі, дзе мы на сацыяльна значныя групы тавараў устанаўліваем вельмі жорсткае цэнаўтварэнне і павышаць яго можна на гэтыя групы тавараў толькі на 1,2 працэнта ў месяц. Па больш шырокай групе тавараў мы вызначылі для вытворцаў максімальна дапушчальны ўзровень рэнтабельнасці, а для пастаўшчыкоў, імпарцёраў і гандлю ў тым ліку максімальныя гандлёвыя аптовыя надбаўкі. І такім чынам тавары рэгулююцца. Гэта вельмі шырокі пералік тавараў. Сёння больш за 50 % тавараў у нашай краіне рэгулюецца і не дапускаецца лавінападобнага росту цэн», — расказаў Аляксей Багданаў. Міністр падкрэсліў, што інфляцыя — гэта негатыўны фактар, які ўплывае на ўсё ў нашай краіне. Але большая частка гэтай інфляцыі — праблемы знешняга свету, таму што ў краіну па-ранейшаму працягваюць завозіць па імпарце сыравіну і тавары. «Прынята праграма сумесных дзеянняў урада і Камітэта дзяржкантролю па стабілізацыі цэн, і там закладзены механізмы па дадатковым кантролі менавіта імпартных цэн, удасканалення сістэмы вытворчасці айчынных тавараў з пункту гледжання распрацоўкі мер па зніжэнні сабекошту і шэраг іншых пазіцый», — дапоўніў Аляксей Багданаў.

Пры гэтым міністр антыманапольнага рэгулявання і гандлю звярнуў увагу, што аб'ём рэалізацыі айчыннай прадукцыі ў гандлі складае 77 працэнтаў. Прычым большая частка ўласнай вытворчасці — 80—90 працэнтаў — харчовыя тавары. Па нехарчовых таварах крыху меншы працэнт, паколькі мы даволі шмат імпартуем складанай бытавой тэхнікі.

«Прэзідэнтам пастаўлена задача забяспечыць насельніцтва ў шырокім асартыменце прадукцыяй як айчыннай, так і імпартнай вытворчасці. Беларусы не павінны нічога адчуць. Такая задача стаіць, мы яе выконваем і трымаем на пастаянным кантролі, ствараючы ўмовы для імпартазамяшчэння, увозу імпартных тавараў, у тым ліку абнуленне мытных пошлін на тавары крытычнага імпарту. Таму гэта пытанне не менш важнае, як і нарошчванне экспарту», — падкрэсліў Аляксей Багданаў.

Відаць станоўчая дынаміка

Міністр прамысловасці Пётр Пархомчык расказаў, што яго галіна практычна выканала ўсе даведзеныя паказчыкі па выніках работы за 6 месяцаў. «І ўжо дакладна відаць, што станоўчая дынаміка росту аб'ёмаў вытворчасці, росту экспарту захоўваецца і па выніках 7 месяцаў. З упэўненасцю можна сказаць, што мы захаваем гэтыя тэмпы на ўзроўні дзевяці месяцаў», — сказаў міністр. Па яго словах, складанасці, вядома, ёсць, але гэта ўсё вырашальна. У пытаннях імпартазамяшчэння наладжваецца супрацоўніцтва з Кітайскай Народнай Рэспублікай. Так, па словах Пятра Пархомчыка, да канца года 9,7 тысячы машынакамплектаў паступіць з Кітая на «БЕЛДЖЫ». «Гэта міжнародная кампанія, у яе вялікія актывы знаходзяцца ў Еўропе, Амерыцы. Як ні дзіўна, але ў гэтым аўтамабілі вельмі шмат камплектуючых, якія пастаўляюцца з еўрапейскіх краін. Гэта значыць, міжнародная кааперацыя ў вытворчасці аўтамабіляў Geely мае месца. Таму, зразумела, ёсць пэўны націск еўрапейскіх краін, Амерыкі для таго, каб гэтыя камплектуючыя не пастаўляліся ў Расійскую Федэрацыю, Рэспубліку Беларусь. Вельмі шчыльна ішлі перагаворы, нават даводзілася падключаць Прэзідэнта для вырашэння гэтага пытання», — расказаў Пётр Пархомчык. Аднак, па яго словах, прадпрыемства не паспее выйсці на лічбы мінулага года. «Мы занадта шмат патрацілі часу для таго, каб знайсці спосабы і метады, якім чынам гэтыя машынакамплекты будуць пастаўлены ў Рэспубліку Беларусь. Але, пачынаючы з верасня, па 2500—2600 аўтамабіляў будзем вырабляць на «БЕЛДЖЫ», — запэўніў ён.

Генеральны дырэктар ААТ «Нафтан» Андрэй Сойка расказаў, што, нягледзячы на праблемы, звязаныя са знешнепалітычнымі праблемамі, прадпрыемства развіваецца. Яго прадукцыю адпраўляюць па ўсім свеце: гэта і Афрыка, і Азія, усе рэгіёны далёкай дугі. «Украінскі рынак для нас быў вельмі важны, асноўныя аб'ёмы прадукцыі сыходзілі туды. Сітуацыя прывяла да таго, што з сакавіка мы змушаныя былі зніжаць аб'ёмы рэалізацыі прадукцыі на экспарт. За другі квартал нам прыйшлося прыкласці намаганні, каб выбудаваць новыя лагістычныя ланцужкі паставак. З ліпеня мы атрымалі станоўчы вынік. Галоўнае, што пачалі зніжаць рэшткі гатовай прадукцыі, вяртаць назапашаныя замарожаныя абаротныя сродкі назад у абарот прадпрыемства. У першае паўгоддзе мы спрацавалі стратна, а зараз выходзім на прыбытковую работу. З улікам прыбытковай работы і зніжэння астаткаў у нас з'явяцца перадумовы ў чацвёртым квартале пачынаць павелічэнне аб'ёмаў перапрацоўкі нафты, як гэта было даручана Прэзідэнтам», — расказаў Андрэй Сойка.

Валерыя СЦЯЦКО

Фота: БелТА

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

АВЕН. У аўторак падзеі будуць развівацца спрыяльна для вас, нечакана могуць узнікнуць новыя перспектывы для кар'еры. 

Калейдаскоп

5 важных рэчаў, якім бацькі абавязаны навучыць сваіх дзяцей

5 важных рэчаў, якім бацькі абавязаны навучыць сваіх дзяцей

Быць бацькамі — вялікая адказнасць. Кожны з нас хоча выхаваць дзіця ўпэўненым, добрым і шчырым. І самае галоўнае — шчаслівым.