У Мінску прайшла цырымонія развітання з былым кіраўніком БССР Мікалаем Слюньковым

У Мінску прайшла цырымонія развітання з былым кіраўніком БССР Мікалаем Слюньковым, які пайшоў з жыцця 9 жніўня ў 93-гадовым узросце, паведамляе БелТА.

На цырымонію развітання ў Цэнтральным доме афіцэраў прыйшлі вядомыя палітычныя дзеячы. Спачуванні родным і блізкім выказаў і беларускі ўрад. «Пайшоў з жыцця чалавек нязломнай волі і высокай асабістай мужнасці, усё жыццё якой было яркім прыкладам служэння Радзіме, народу, вернасці высокім ідэалам і грамадзянскім каштоўнасцям. Савет Міністраў глыбока смуткуе ў сувязі са смерцю чалавека з вялікай літары, якім ганарыцца наша краіна», — адзначыў кіраўнік Апарата Саўміна Канстанцін Бурак.

Член Пастаяннай камісіі па адукацыі, культуры і навуцы Палаты прадстаўнікоў Сяргей Клішэвіч нагадаў аб заслугах Мікалая Слюнькова перад краінай. У час яго кіраўніцтва Мінскім трактарным заводам былі распрацаваны новыя мадэлі тэхнікі, прадпрыемства паказала значны рост. Менавіта ён у 1984 годзе адкрываў Мінскі метрапалітэн. «Для мяне, як гісторыка, які вывучае гісторыю Беларусі, гэта значная фігура. Ён чалавек сумлення, чалавек справы і сваіх ідэалаў, прынцыповы і жорсткі. Добрая і светлая памяць пра яго застанецца і ў канкрэтных справах, якія сёння прыносяць карысць людзям. Яго спадчына і сёння служыць Беларусі. Гэта чалавек, які не здрадзіў ні сваім ідэям, ні сваёй краіне», — падкрэсліў дэпутат.

Аддаць даніну памяці прыехала і адміністрацыя Мінскага трактарнага завода на чале з генеральным дырэктарам Віталём Ваўком.

Пахаванне адбылося на Усходніх могілках Мінска.

Мікалай Слюнькоў быў дырэктарам Мінскага трактарнага завода. Пазней займаў пасаду першага сакратара Мінскага гаркама Кампартыі БССР, Дзяржаўнага планавага камітэта Савета Міністраў СССР, першага сакратара Цэнтральнага камітэта Камуністычнай партыі Беларусі, сакратара ЦК КПСС.

Фота: БелТА