Вы тут

Капліцу святога князя Аляксандра Неўскага адкрылі ў Гомелі


На ўзвядзенне збудавання культавага прызначэння пайшло каля года. Цікава, што гэта цалкам адноўлены праект Аляксандраўскай капліцы 1880-х гадоў. Яна знаходзілася насупраць Гомельскага Петра-Паўлаўскага кафедральнага сабора, каля тэрыторыі цяперашняй плошчы імя Леніна. Месцам для ўзвядзення сучаснай капліцы ў імя святога князя Аляксандра Неўскага абрана тэрыторыя на перакрыжаванні цэнтральных вуліц Савецкай і Кірава. Як вядома, побач цяпер працягваецца будаўніцтва новага Свята-Троіцкага храма. Разам з капліцай яны створаць адзіны архітэктурны комплекс.


— Унутры ўстаноўлены тры кіёты. У цэнтры — з іконай святога дабравернага князя Аляксандра Неўскага. Лявей — з іконай свяціцеля Іаана Златавуста, у дзень памяці якога быў вызвалены Гомель. Правы кіёт — з вобразам святога велікамучаніка Георгія Перамаганосца як сімвал заканчэння Вялікай Айчыннай вайны і перамогі нашага народа, — звярнуў увагу архіепіскап Гомельскі і Жлобінскі Стэфан.

Як было адзначана, у капліцы будуць захоўвацца 990 капсул з зямлёй з брацкіх магіл і воінскіх пахаванняў з усіх раёнаў Гомельскай вобласці, а таксама дзве капсулы з зямлёй з мемарыяльнага комплексу «Азарыцкі лагер смерці» Калінкавіцкага раёна і мемарыяла «Помнік дзецям — ахвярам Вялікай Айчыннай вайны» ў Чырвоным Беразе на Жлобіншчыне.

— У Беларусі свята шануюць герояў, якія аддалі свае жыцці за мірнае неба, незалежнасць і суверэнітэт дзяржавы. Толькі ў нашым рэгіёне 1200 воінскіх пахаванняў. Імёны і подзвігі салдат, якія загінулі за свабоду і незалежнасць Радзімы, назаўжды захаваюцца ў нашых сэрцах, — падкрэсліў старшыня Гомельскага аблвыканкама Іван Крупко, які прыняў удзел у цырымоніі адкрыцця капліцы ў памяць аб воінах-вызваліцелях. — Праваслаўная царква ва ўсе часы моліцца аб спачыне загінулых за веру і Айчыну воінаў. Дзякуючы ініцыятыве Гомельскай епархіі, зараз кожны жыхар ці госць горада можа гэта зрабіць і ў капліцы ў памяць усіх воінаў-вызваліцеляў, — падкрэсліў кіраўнік рэгіёну.

Капліцу ў імя святога князя Аляксандра Неўскага асвяціў мітрапаліт Мінскі і Заслаўскі Веніямін. Патрыяршы экзарх усяе Беларусі падзякаваў кіраўніцтву Гомельскай епархіі, Гомельскай вобласці і абласнога цэнтра, а таксама ўсім, хто дапамагаў у аднаўленні капліцы: 

— Гэта яшчэ адзін добры знак у Год гістарычнай памяці: успомніць мінулае, няпростую гісторыю, зрабіць высновы, каб выбудоўваць сучаснае жыццё, планаваць будучыню, выхоўваць дзяцей і ўнукаў у міры і спакоі. У капліцы будуць маліцца не толькі аб спачылых воінах, але і за тое, каб Гасподзь захоўваў мірнае неба над нашай краінай.

Наталля КАПРЫЛЕНКА

Фота: БелТА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».