Вы тут

Катаракта і глаўкома здаюцца ўрачам


Найбольш частымі прычынамі зніжэння вастрыні зроку з'яўляюцца глаўкома, катаракта, захворванні сятчаткі, прыроджаныя паталогіі і траўмы. Самае небяспечнае захворванне, якое часта вядзе да інваліднасці, — глаўкома, а самая распаўсюджаная аперацыя — хірургія катаракты. У нашай краіне выконваюцца абсалютна ўсе сучасныя аперацыі, якія ёсць у свеце.


Высокаспецыялізаваная афтальмалагічная дапамога аказваецца ў Рэспубліканскім афтальмалагічным цэнтры на базе 10-й клінічнай бальніцы, у 4-й дзіцячай клінічнай бальніцы, РНПЦ «Маці і дзіця», РНПЦ анкалогіі і медыцынскай радыялогіі імя М. М. Аляксандрава, РНПЦ радыяцыйнай медыцыны і экалогіі чалавека ў Гомелі.

— Афтальмалогія ў нашай краіне адрозніваецца сацыяльнай арыентаванасцю і дзяржаўнай падтрымкай у медыкаментозным, хірургічным, лазерным лячэнні і выкарыстанні донарскіх тканак. Беларусь з'яўляецца ўнікальнай краінай не толькі на постсавецкай прасторы, але і ў Еўропе і свеце, дзе медыкаментознае лячэнне глаўкомы ажыццяўляецца цалкам бясплатна, — кажа галоўны пазаштатны афтальмолаг Міністэрства аховы здароўя загадчык кафедры афтальмалогіі БелМАПА Таццяна ІМШАНЕЦКАЯ.

Паводле яе слоў, цяпер актыўна прымяняюцца айчынныя імпартазамяшчальныя лекі. Прычым гэта датычыцца не толькі монапрэпаратаў, але і фіксаваных камбінацый, якія ў шэрагу выпадкаў зручныя для пацыентаў.

У лячэнні глаўкомы часта прымяняюцца лазерныя метады. З іх дапамогай лечаць і самую складаную форму — рэфрактарную глаўкому, устойлівую да іншых метадаў. Прымяняюцца лазерныя аперацыі і ў пацыентаў з высокімі зрокавымі функцыямі на пачатковых стадыях захворвання. У такіх выпадках выкарыстоўваецца новы метад, які нядаўна з'явіўся ў дзяржаўнай клініцы, — мікраімпульсная трансклеральная цыклафотакаагуляцыя.

— Лячэнне асабліва ўскладненых форм глаўкомы, раней неаднаразова аперыраваных, устойлівых да медыкаментозных і лазерных метадаў, ажыццяўляецца ў нашай краіне на бясплатнай аснове, — падкрэсліла Таццяна Імшанецкая.

Самая распаўсюджаная аперацыя на органах зроку ў беларусаў — хірургія катаракты. Гэта сучасная мікраінвазіўная методыка, з мінімальнымі разрэзамі, якая дазваляе хутка рэабілітавацца, скараціць час знаходжання ў стацыянары і знізіць рызыку пасляаперацыйных ускладненняў.

У Рэспубліканскім афтальмалагічным цэнтры функцыянуе сучасны аперацыйны блок з шасцю аперацыйнымі, з іх тры з ламінарнымі плынямі, з асабліва чыстым паветрам, з устаноўкамі для хірургіі катаракты, камбінаванай вітрэальнай хірургіі, фемтасекундным лазерам для хірургіі рагавіцы і апаратам для крослінкінгу (метад сшывання рагавіцы).

Гэта дазваляе праводзіць усе віды камбінаваных аперацый на шклопадобным целе і сятчатцы з аднамомантным выдаленнем хрусталіка пры траўмах і захворваннях, а таксама крослінкінг рагавіцы і пластычныя аперацыі.

— У Беларусі актыўна праводзіцца трансплантацыя тканак у афтальмалогіі. Актыўна выкарыстоўваецца трансплантацыя амніятычнай мембраны, рагавіцы і склеры. Гэта лячэнне асабліва цяжкіх форм глаўкомы, рэканструктыўныя аперацыі, лячэнне дэфектаў кан'юктывы і склеры. Кератапластыка праводзіцца з выкарыстаннем фемтасекунднага лазера. Ён функцыянуе ў нас ужо больш за 10 гадоў, — расказвае галоўны афтальмолаг.

Што датычыцца злаякасных пухлін вока, то ў апошнія гады ўкараняюцца органазахавальныя метады лячэння, таму адбылося зніжэнне колькасці такіх інвалідызуючых аперацый, як выдаленне вочнага яблыка. Пры меланоме выкарыстоўваюцца сучасныя метады: камбінаванае лячэнне, гама-нож. З дапамогай апошняга пралечана ўжо 80 пацыентаў. Гэта амаль удвая больш, чым у Расіі.

Як адзначыла Таццяна Імшанецкая, за апошнія гады назапашаны ўнікальны вопыт аказання неадкладнай афтальмалагічнай дапамогі пацыентам з каранавіруснай інфекцыяй. Для гэтага быў арганізаваны аперацыйны блок, аснашчаны ўсім неабходным абсталяваннем для выканання як складаных, так і высокатэхналагічных аперацый па неадкладных паказаннях: траўма, нездаровая катаракта, адслойка сятчаткі. Запатрабаванымі ў гэты перыяд аказаліся лазерныя метады лячэння, калі пацыент з закрытавугольнай глаўкомай, разрывамі сятчаткі мог атрымліваць лячэнне, знаходзячыся ў інфекцыйным аддзяленні.


У тэму

Як выратаваць дзіця ад блізарукасці?

На праблему пагаршэння зроку ў дзяцей з-за выкарыстання гаджэтаў звярнуў увагу загадчык аддзялення лазернай мікрахірургіі вока 10-й гарадской клінічнай бальніцы Мінска Ігар ЗАБАРОЎСКІ:

— Вока чалавека задумана такім чынам, каб бачыць удалечыню. З дзіцячага ўзросту зрокавая нагрузка зблізку ўзрастае з кожным годам. Адаптуючыся пад яе, вока праходзіць мікраэвалюцыю і становіцца блізарукім. На сёння не менш за палову сярод дзяцей і падлеткаў да 18 гадоў маюць зрокавыя адхіленні, якія звязаны пераважна з нагрузкай зблізку. І гэта лічба штогод узрастае. У азіяцкім рэгіёне яна ўжо 90 %. Таму важна засцерагчы дзяцей ад гаджэтаў у дашкольным узросце. Анатомія вока не церпіць такога гвалту. Менавіта таму ў рэкамендацыях любога афтальмолага першым пунктам стаіць захаванне рэжыму зрокавых нагрузак.

Алена КРАВЕЦ

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.