Ідэя ўзнікла пасля наведвання Прэзідэнтам мясцовай пякарні ў чэрвені мінулага года. Аляксандр Лукашэнка высока ацаніў смак свіслацкага хлеба, асабліва — здобнай пляцёнкі — «са смакам дзяцінства». Гэта надало штуршок для «раскруткі» плеценай булкі, якая ў хуткім часе атрымала афіцыйную назву «Бацькава». А сёлета ў гонар папулярнай здобы ў Свіслачы зладзілі фестываль.
Рыхтаваў свята спецыяльна створаны аргкамітэт пры Гродзенскім абласным упраўленні культуры. Асноўную праграму распрацаваў Свіслацкі цэнтр культуры і народнай творчасці. На конкурсе «Бацькаўшчына», напрыклад, прафесійныя пекары прадставілі ў выпечцы гістарычныя аб’екты Беларусі. Тут знайшлі адлюстраванне і Белавежская пушча, і гродзенскія замкі, і старажытныя сядзібы...
Госці фестывалю маглі дэгуставаць духмяную выпечку, а таксама ўзяць удзел у майстар-класах: сплесці ўласную «Бацькаву булку», зрабіць сухарную кветку альбо ўпрыгожыць пернік...
Цікавым стаў конкурс «Матулін каравай». У ім маглі ўдзельнічаць усе ахвотныя, у тым ліку аматары і хатнія гаспадыні. Сваё майстэрства ў кулінарным спаборніцтве яны дэманстравалі ў дзвюх намінацыях: «Традыцыйны каравай» і «Сучасны каравай».
«Традыцыйны» — згатаваныя ў хатніх умовах па традыцыйным рэцэпце пірог, каравай ці булка. Віталася, калі выраб мае сямейную гісторыю. У намінацыі «Сучасны каравай» спаборнічалі тэматычныя кампазіцыі. Гэта мог быць пірог ці торт, у тым ліку з гатовых інгрэдыентаў, напрыклад, пернікавы ці зефірны. Тут кожны мог прыкласці ўсю сваю фантазію і здольнасці. Усе вырабы мелі назвы.
Але мала толькі смачна прыгатаваць. Яшчэ трэба цікава прэзентаваць, расказаць пра тэхналогію, рэцэптуру, гісторыю, чаму менавіта такі рэцэпт стаў у сям’і традыцыйным, у чым яго адметнасць.
Пераможцы атрымалі ўзнагароды і грашовыя прэміі. Адзначаны канкурсанты і ў спецыяльных намінацыях: «Кулінарная спадчына», «Смак дзяцінства», «Самы вялікі каравай», «Арыгінальная прэзентацыя», «Незвычайнае спалучэнне інгрэдыентаў», «Арыгінальнае афармленне».
Асобны конкурс прайшоў для прафесійных пекараў і кандытараў. Яны таксама прадставілі вялікі асартымент вырабаў, якія трапляюць да спажыўцоў не толькі вобласці, але і ўсёй краіны.
Падчас фэсту працаваў шэраг цікавых лакацый. Напрыклад, лаўнж-зона для адпачынку, дзе булка-гадалка ў жартоўнай форме прадказвала кожнаму наведвальніку яго лёс.
Экскурсія з майстар-класам паведаміла аб шляху збожжа да хлеба. Тут адбылася дэманстрацыя старажытных сельскагаспадарчых прылад. А на старых млынавых жорнах можна было памалоць зярняты.
Усе конкурсы так ці іначай звязаныя з «хлебнай» тэмай. Напрыклад, у эстафетным конкурсе «Бацькава міля» каманды на хуткасць перавозілі на тачцы мяшкі са збожжам. У конкурсе «Каравай, каравай, каго хочаш — выбірай» кожная пара ўдзельнікаў з завязанымі вачамі адной рукой упакоўвала булку.
Такі фэст тут праводзіцца ўпершыню. Ініцыятарам яго стаў старшыня Свіслацкага райвыканкама Аляксандр Вярсоцкі. Спачатку свята задумвалася як мясцовае, але падчас падрыхтоўкі яно набыло размах і перарасло ў рэспубліканскае.
Дарэчы, на Слонімшчыне захавалася традыцыя выпечкі так званых паўлаўскіх караваяў, якія ўваходзяць у Спіс нематэрыяльнай культурнай спадчыны Беларусі. Захоўваюць унікальную тэхналогію ўдзельніцы народнага аб’яднання «Чараўніцы-каравайніцы» з Навасёлкаўскага цэнтра культуры. На Слонімшчыне фестываль стаў брэндавым. А самы прыгожы трохпавярховы каравай паўлаўскія каравайніцы двойчы ўручалі Прэзідэнту краіны.
Маргарыта УШКЕВІЧ
Фота БелТА
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.