Кожная беларуская вёска — гэта маленькі Сусвет, дзе ёсць адметныя героі, цікавыя традыцыі і дзівосныя краявіды... Гэта дапамагае ўсвядоміць такая акцыя, як свята вёскі — добрая падстава абуджэння гістарычнай памяці і гонару за сваю малую радзіму. Вёска Шыпкі, што на Вілейшчыне, не проста зладзіла свята — а сапраўдны фестываль літаратуры і мастацтва пад назвай «Шыпкоўскія плёсы». Падстава для маштабу ёсць: у Шыпкоўскай школе пасля філфака некалькі гадоў працаваў вядомы паэт Мікола Шабовіч, тут пабраўся шлюбам з выпускніцай філфака Кацярынай. У Шыпках прайшло дзяцінства і юнацтва паэткі Іны Фраловай. У імпрэзе ўзяў удзел і Выдавецкі дом «Звязда» — усе, хто прысутнічаў на свяце, змаглі набыць кнігі выдавецтва. А ўсе выступоўцы атрымалі «звяздоўскія» падарункі.
— Аб прыгажосці Шыпкоў і Міколам Шабовічам, і Інай Фраловай напісана нямала вершаў. Мне хацелася самому паглядзець на рачныя плёсы, на лес, на сады, на людзей, якія давалі натхненне паэтам. І наогул я люблю бываць у тых мясцінах, дзе нарадзіліся мае сябры па пяру, — прызнаўся намеснік дырэктара выдавецтва «Мастацкая літаратура» — галоўны рэдактар часопіса «Полымя» паэт Віктар Шніп.
Месцам для святкавання стала сядзіба мясцовага жыхара Алега Дзіка, з аднаго боку якой рэчка, з другога прыгожая азярына, а навокал лес. Першымі выступілі старшыня Хаценчыцкага сельскага савета Дзіяна Грабянёк і настаяцель храма Святога Прарока Ільі протаіерэй Сергій Вачугаў. Потым да мікрафона падыходзілі былыя настаўнікі Шыпкоўскай школы— Ванда Сівая, Кацярына Шабовіч, Мікалай Мажуль і Кацярына Мажуль. Прагучалі вершы Міколы Шабовіча ў выкананні ўдзельнікаў паэтычнага тэатра «Рытмы сэрца» пры БДУІР. Цікава было паслухаць краязнаўцаў Аляксандра Плавінскага і Аляксандра Раткевіча. Падвысіла добры настрой артыстка філармоніі Надзея Тулінава, якая выканала некалькі песень, і адна, і з бацькам, пісьменнікам Уладзімірам Тулінавым. Выступіў і народны калектыў аўтарскай песні «Элегія» Вілейскага Цэнтра эстэтычнага выхавання.
У свяце прынялі ўдзел паэты Іна Фралова, Юрась Нераток, Уладзімір Цанунін, Вікторыя Піліпенка. Ірына Карнаухава каля стэнда «Звязды» правяла прэзентацыю сваёй новай дзіцячай кніжкі, якая пабачыла свет у выдавецтве. А Іне Фраловай, якая была вядоўцай і аўтарам сцэнарыя свята, быў урачыста ўручаны медаль Максіма Магдановіча Мінскага гарадскога аддзялення Саюза пісьменнікаў Беларусі.
Людміла ІВАНОВА
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.