«Кліч Палесся» сабраў амаль 40 тыс. удзельнікаў і гасцей

Частаваў прысмакамі, захапляў рамёствамі, кружыў у танцавальнай віхуры... Самы малады фестываль Гомельскай вобласці «Кліч Палесся» ў сёмы раз сабраў на Петрыкаўшчыне амаль 40 тысяч удзельнікаў і гасцей не толькі з розных куткоў Беларусі, але і расійскіх рэгіёнаў.

Фестывальная вёска міжнароднага этнакультурнага мерапрыемства сёлета ўмясціла больш як паўтары тысячы толькі гаспадароў падворкаў. Імправізаваныя сядзібы рознакаляровым багаццем расквецілі ўзбярэжжа Прыпяці. Дажджлівы настрой прыроды не перашкодзіў палешукам з імпэтам здзіўляць і «запальваць». Свае падворкі прадставілі восем раёнаў Гомельшчыны і пяць — Брэсцкай вобласці. Сустракалі гасцей домікі пчаляра, каваля, рыбака, ткача, разьбяра, бондара... Іх гаспадары запрашалі пазнаёміцца з разнастайнымі вырабамі і прадметамі ўжытку палешукоў.

«Палеская зямля — унікальны куток Беларусі са сваёй самабытнай культурай, старажытнымі звычаямі і гісторыяй. Фестываль сёлета збірае аматараў фальклору, каб яшчэ больш напоўніць нас любоўю да роднага краю і ўразіць незвычайнымі талентамі», — словы падтрымкі ўдзельнікам і гасцям фестывалю адрасаваў Прэзідэнт Беларусі Аляксандр Лукашэнка. Прывітальны адрас ад кіраўніка дзяржавы з галоўнай фестывальнай сцэны зачытаў намеснік прэм'ер-міністра Беларусі Ігар Петрышэнка.

Віцэ-прэм'ер па традыцыі агучыў імёны пераможцаў конкурсу «Ганаровы паляшук». Сёлета такое званне атрымалі генеральны дырэктар прадпрыемства «Мазырсоль» Уладзімір Дворнік, заслужаны дзеяч культуры Рэспублікі Беларусь Дзям'ян Лемяшэўскі і старшыня Пінскага гарвыканкама Валерый Рабкавец.

Пачэснымі гасцямі фестывалю сталі старшыня Гомельскага аблвыканкама Іван Крупко, кіраўнік Брэсцкай вобласці Юрый Шулейка.

— Поспех свята вызначылі тры складнікі — унікальная прырода, найбагацейшая гісторыка-культурная спадчына і аўтэнтычныя народныя абрады і рамёствы, — перакананы Іван Крупко. — Самабытны Палескі край, дзе з асаблівай павагай захоўваецца бесперапыннасць культурна-бытавых традыцый, выклікае ўсё большую цікавасць у гісторыкаў, этнографаў і культуролагаў.

І сапраўды аўтэнтычныя рамёствы — ганчарства, лозапляценне, выцінанка, роспіс па дрэве і шмат іншых — шырока прадстаўленыя на радах «Рамеснай слабады», якія расцягнуліся не на адзін кіламетр.

Прадстаўнікі раённых цэнтраў арыгінальна падавалі свае падворкі. «У мядзведзя ў бары» — такі падворак у лясным стылі аформілі майстры, прадпрыемствы і арганізацыі Петрыкаўскага раёна. Разнастайную сувенірную прадукцыю рэкламавалі майстрыхі Валянціна Фалеева, Вікторыя Стацэнка і Ганна Туравец. Цэнтральнае месца на падворку адвялі «Траўніцы» — гаспадыні, цалкам «сатканай» з траў, што растуць на Петрыкаўшчыне. Ідэю ўвасобіла народны майстар Валянціна Фалеева:

— Працавала над ёй звыш двух тыдняў. Пасля фестывалю разбіраць рука не падымецца, установім яе ў выставачнай зале нашага Дома рамёстваў як памяць у гонар сёлетняга «Клічу Палесся», — кажа майстрыха.

Кіраўнік народнага тэатральнага калектыву «Маска» Наталля Тарасенка на падворку Нараўлянскага раёна сустракае гасцей разам са сваімі выхаванцамі.

— Мы — гарбузікі, і вось наша мама Гарбузіха, — смяюцца нараўлянскія школьнікі — удзельнікі калектыву.

— Доўга рэпеціравалі з дзецьмі наша прадстаўленне, самі шылі касцюмы. Апошнія два тыдні з раніцы да дзвюх ночы, — падзялілася Наталля Тарасенка.

— Побач Хойніцкі раённы Дом рамёстваў запрашае гасцей на падворак «Суп з сямі круп». Удзельнічалі ў яго падрыхтоўцы ўсім раёнам, — кажуць загадчыца Хойніцкага раённага Дома рамёстваў Людміла Смольская і майстар народных мастацкіх рамёстваў Вольга Шляхценка.

— У нас багаты падворак, бо з рога ўсяго многа, — пераконваюць заўзятыя ўдзельніцы фестывалю «Кліч Палесся». — Мы падрыхтавалі чайны пакой, краму арэхаў і сухафруктаў, лаўку з абярэгамі і нават выставу старых самавараў, якую збіралі па ўсім раёне.

Сёлета ўпершыню на фестывалі былі прадстаўлены Іванаўскі раён і Пінск.

— Абавязкова трэба зведаць, што такое мотальскія прысмакі, — пераконвае пазнаёміцца бліжэй з сапраўдным брэндам Іванаўскага раёна Брэсцкай вобласці ўдзельнік калектыву «Лабуры» Яўген Юхнік.

На Столінскім падворку давялося пагутарыць з Таццянай Нагар, Васілём і Алай Ільінскімі, якія прыехалі на «Кліч Палесся» з аграгарадка Рамель. Удзельнікі са Століншчыны падкрэсліваюць: кожны раз едуць сюды зарадзіцца атмасферай свята.

— Прывезлі дзіцячы танцавальны ўзорны калектыў і вакальную групу. Выступаем з даволі вялікай танцавальная праграмай і аркестравымі нумарамі. Заўжды цікавімся афармленнем падворкаў, касцюмамі. Вельмі падабаецца, як з кожным разам усё больш развіваецца інфраструктура фестывалю, вельмі зручна для ўдзельнікаў і гасцей, — дзякуе Ала Ільінская.

Удзельнікі і госці фестывалю з задавальненнем адзначылі арганізацыю святочнай праграмы для дзяцей. Тэрыторыю дзяцінства «Палеская вясёлка» з конкурсамі, флэшмобамі, інтэрактыўнымі выставамі сваімі сіламі падрыхтавалі педагогі з Петрыкаўскага, Акцябрскага, Лельчыцкага, Мазырскага, Жыткавіцкага і Калінкавіцкага раёнаў, а таксама спецыялісты Гомельскага абласнога Палаца творчасці дзяцей і моладзі.

Традыцыйна ў межах фестывалю прайшоў конкурс «Палеская прыгажуня — 2022». Самай прыгожай дзяўчынай беларускага Палесся была прызнана Валерыя Яраш з Мазыра. Тытул першай віцэ-міс заваявала жыхарка Петрыкава Паліна Бычкоўская, другой віцэ-міс стала Карына Маліноўская з Нароўлі.

Упершыню ў праграме свята былі прадстаўлены этназаафэст, рыцарскі бугурт-фэст і інтэрактыўная пляцоўка «Партызанскі край», прысвечаная Году гістарычнай памяці ў Беларусі.

Наталля КАПРЫЛЕНКА

Фота Лізаветы ГОЛАД

Петрыкаўскі раён.