Абноўленае паштовае аддзяленне адкрылі ў Добрушы

Аддзяленне паштовай сувязі № 4 Добрушскага ўчастка паштовай сувязі пасля правядзення маштабнай мадэрнізацыі гатова прымаць наведвальнікаў. У райцэнтры прайшло ўрачыстае адкрыццё сацыяльна значнага аб’екта — падарунка не толькі для добрушскіх паштавікоў, але і ўсіх жыхароў і гасцей горада напярэдадні Дня беларускага пісьменства.

— Будаваць, рамантаваць, мадэрнізаваць — заўсёды правільна. Гэта паказчык руху і развіцця, — адзначыў старшыня Добрушскага райвыканкама Аляксандр Матарас. — Дзякуючы Году гістарычнай памяці, Дню беларускага пісьменства, які пройдзе ў Добрушы, мы пераўтвараем горад. «Белпошта» не застаецца ад гэтага працэсу ў баку і прыклала ўсе ўмовы, каб здзівіць сваіх кліентаў.

Удзел у адкрыцці абноўленага аддзялення сувязі прынялі намеснік генеральнага дырэктара РУП «Белпошта» Алена Драздовіч і намеснік дырэктара Гомельскага філіяла РУП «Белпошта» Марына Перагуда. 

У прасторнай зале абноўленага аддзялення арганізаваны сістэмы электроннай чаргі, аўдыёзапісу і відэаназірання, што забяспечвае камфортныя ўмовы і дадатковую бяспеку пры абслугоўванні кліентаў. Наведвальнікі могуць скарыстацца поўным спектрам паштовых паслуг. Для якаснага абслугоўвання кліентаў у аддзяленні паштовай сувязі арганізавана тры працоўныя месцы спецыялістаў па паштовай дзейнасці, працоўнае месца для абслугоўвання карпаратыўных кліентаў, а таксама зона самаабслугоўвання пошта-маркет — працоўнае месца па рэалізацыі тавараў спажывецкага попыту. Аддзяленнем абслугоўваецца сем даставачных участкаў, дзе пражываюць каля 9 тысяч жыхароў.

Між тым святочнай нагодай для паштавікоў Добрушчыны гэты дзень стаў і ў сувязі з выпускам ў абарачэнне Міністэрствам сувязі і інфарматызацыі паштовай маркі з гербам Добруша з серыі «Гербы гарадоў Беларусі». Дызайн паштовай маркі, спецштэмпеля і канверта «Першы дзень» Святланы Цырулік. Герб горада Добруша Гомельскай вобласці ўяўляе сабой французскі шчыт, у зялёным полі якога намаляваны тры бухты каната сярэбранага колеру з чорнымі швамі. У дзень выпуску паштовай маркі ў абарачэнне ў абноўленым аддзяленні паштовай сувязі № 4 Добруша правялі спецыяльнае гашэнне на канверце «Першы дзень».

Наталля КАПРЫЛЕНКА

фота Гомельскі філіял РУП «Белпошта»