На вернасць Радзіме 26 жніўня прысягнулі курсанты-першакурснікі Акадэміі МУС. Урачыстае мерапрыемства адбылося на плошчы Дзяржаўнага сцяга ў Мінску.
Асаблівасцю сёлетняй уступнай кампаніі быў агульны конкурс па ўсіх спецыяльнасцях. Пры падачы заявы абітурыент паведамляў, якія спецыяльнасці ён разглядае, размяркоўваючы іх у парадку прыярытэту. Па гэтай прычыне многія імкнуліся пазначыць максімальную колькасць спецыяльнасцяў, каб дакладна паступіць у Акадэмію МУС.
Па словах міністра ўнутраных спраў Івана Кубракова, сёлета конкурс быў самы высокі за апошнія пяць гадоў. Паводле інфармацыі прэс-службы Акадэміі МУС, на 440 бюджэтных месцаў дзённай формы навучання прэтэндавалі 734 абітурыенты. Больш за тое, пасля курса маладога байца адток курсантаў быў мінімальны.
Таксама Іван Кубракоў падкрэсліў, што ведамства робіць усё магчымае для таго, каб працэс навучання курсантаў-першакурснікаў быў цікавы, актуальны і карысны:
— Яны будуць займацца спортам, навукай па кірунках службовай дзейнасці. Таксама адмысловая ўвага аддадзена навучанню кібербяспецы, развіццю высокіх тэхналогій.
Трэба адзначыць, што сёлета дысцыпліна «Процідзеянне кіберзлачынствам і камп'ютарная разведка» будзе вывучацца на ўсіх факультэтах незалежна ад спецыяльнасці.
Падчас прысягі ў стройных радах курсантаў можна было заўважыць і дзяўчат. У гэтым годзе для іх было адведзена 13 месцаў (10 — на крымінальна-выканаўчы факультэт і 3 — на следча-экспертны).
Спадзяёмся, што курсанты на ўсё жыццё запомняць словы прысягі і застануцца ім вернымі.
Лізавета ГОЛАД
Фота аўтара
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
