Навошта саджаць часнок «бульбачкамі»

Шматлікія садоўнікі прывыклі саджаць часнок зубкамі і іншага спосабу не ўяўляюць.

Але можна ў якасці пасадачнага матэрыялу выкарыстоўваць яго «бульбачкі».

• Эканоміцца пасадачны матэрыял, калі часнок буйны і ў цыбуліне змяшчаецца 4-5 зубкоў, лепш спажыць іх у ежу, чым саджаць;
• Аздараўляецца пасадачны матэрыял, бо «бульбачкі» не сутыкаюцца з зямлёй, а значыць не пераносяць магчымыя хваробы;
• Амаладжэнне: пры кругавароце пасяўнога матэрыялу, праз 4-5 гадоў у часнаку назапашваюцца хваробы, а «бульбачкі» ўтвараюцца на кветаложы, там дзе павінна утварацца насенне і з’яўляюцца чыстымі ад хвароб, якія перадаюцца вегетатыўна.

«Бульбачкі» атрымліваюць, пакідаючы выспяваць стрэлкі на раслінах часнаку. Для гэтага дастаткова пакінуць усяго 2-3 стрэлкі. Збіраць іх трэба, калі стрэлка цалкам выпрасталася і абалонка трэснула.

Высейваюць «бульбачкі» ў другой палове верасня, для таго каб яны паспелі ўтварыць карэньчыкі для паспяховай зімоўкі, але не пачалі расці.

Сеюць «бульбачкі» па схеме: паміж радамі 20 см, у радзе — 3-4 см, глыбіня пасадкі 2-3 см.

У канцы наступнага года можна выкопваць «бульбачкі» і высаджваць як паўнавартасныя зубкі, а можна пакінуць расці на другі год, тады неабходна павялічыць адлегласць пры сеянні.

Ірына ТАМКОВІЧ