У ВД «Звязда» выходзіць кніга «Муры, Том і дырыжаблік»

Днямі ў Выдавецкім доме «Звязда» выходзіць новая кніга — казачная аповесць Маргарыты Латышкевіч «Муры, Том і дырыжаблік». 

Пра што расказваецца ў кнізе, выпуск якой ажыццяўляецца па заказе Міністэрства інфармацыі Рэспублікі Беларусь? ... Над чароўным горадам Котсвілем плывуць планёры і дырыжаблі! А жыхары горада рыхтуюцца да Вялікай выставы. Маленькія кацяняты Муры і Том чакаюць дамоў свайго тату, капітана самага цудоўнага з усіх дырыжабляў. Але тата, на вялікі жаль, затрымліваецца! Што ж на самай справе здарылася з камандай самага цудоўнага паветранага судна? І якое дачыненне да гэтага надзвычайнага здарэння мае Егіпецкая зала вялікай выставы? Каб разабрацца ва ўсім гэтым і разам з аўтарам правесці сваё дэтэктыўна-казачнае расследаванне, далучыцеся да Коткінсаў, якія быццам тыя Шэрлакхомсы, справу сваю ведаюць, — і вы сутыкнецеся са старажытнымі чарамі з самых далёкіх краін. 

Займальнае, напоўненае прыгод казачнае падарожжа падаецца даволі ілюстратыўным, здольным развіць багатыя ўяўленні, яшчэ і таму, што ў кнігі, акрамя добра вядомай пісьменніцы Маргарыты Латышкевіч, ёсць вопытны сааўтар — кніжны графік Дар’я Чарняўская. Майстар сваёй справы, яна пераканаўча ўводзіць чытача кнігі «Муры, Том і дырыжаблік» у самыя глыбінныя таямніцы даследвання. І хаця аповяд у кнізе завяршаецца на ціхай, спакойнай ноце («Мая сям’я стамілася і перахвалявалася, дый камандзе патрэбны адпачынак пасля вашых чараў. Усе мы заслужылі трохі спакою!» — гаворыць тата Коткінс), узнікае зразумелае чытацкае жаданне атрымаць працяг гэтай цудоўнай казкі, разлічанай не толькі на маленькіх чытачоў. Будзем спадзявацца, што Маргарыта Латышкевіч гэта пачуе — і неўзабаве ў яе народзіцца новая кніга. А яе паплечнікам у стварэнні працягу стане ізноў мастачка Дар’я Чарняўская. 

Кастусь ЛЕШНІЦА