«Беларуская навука» знаёміць з жыццём... беларусаў у Кітаі

Гісторыя і сучаснасць сыйшліся на прасторах адной знакавай для сённяшняга дня тэмы: у выдавецтве «Беларуская навука» пабачыла свет кніга кандыдата гістарычных навук Дар’і Зубко «Беларусы ў Кітаі». 

Грунтоўнае даследванне, якое прысвечана этнакультурнай адаптацыі беларусаў у Кітайскай Народнай Рэспубліцы, напісана гісторыкам, этнолагам, якая з’яўляецца прадстаўніком беларускага асяроддзя ў Кітаі з 2016 года. Прадстаўляючы аўтара кнігі, доктар гістарычных навук Аляксандр Віктаравіч ГУРКО (ён — і аўтар ідэі і навуковы рэдактар серыі «Свет вачыма этнолага») зазначае: «Свой вопыт адаптацыі да ўмоў жыцця ў Кітайскай Народнай Рэспубліцы яна пачала ў якасьці выкладчыка рускай і беларускай моў у Другім Пекінскім інстытуце замежных моў. З’яўляючыся лінгвістам і педагогам па сваёй базавай адукацыі (закончыла ў 2010 г. навучанне на філалагічным факультэце Беларускага дзяржаўнага педагагічнага ўніверсітэта імя М. Танка). Яна з цікавасцю пачала вывучэнне кітайскай мовы, традыцый кітайскага народа.

Пасля зацвярджэння ў 2017 г. у Цэнтры даследванняў беларускай культуры, мовы і літаратуры НАН Беларусі тэмы яе кандыдацкай дысертацыі пачала комплекснае даследванне заканамернасцяў працэсаў адпатацыі беларусаў да жыцця ў Кітаі. Усталявала кантакты болей чым з 200 нашымі суайчыннікамі ў гэтай краіне, правяла апытанні і інтэрв’ю. Сістэматызацыя і абагульненне сабраных матэрыялаў дазволілі Д. Г. Зубко надрукаваць каля 20 артыкулаў і ў 2021 г. абараніць дысертацыю на суісканне вучонай ступені кандыдата гістарычных навук па тэме «Этнакультурная адаптацыя беларусаў у Кітайскай Народнай Рэспубліцы (1990-я — 2010-я гг.)».

І яшчэ: «Разуменне таго, як нашы суайчыннікі прыстасоўваюць сваё жыццё да прыродных, эканамічных, культурных умоў, якія радыкальна адрозніваюцца ад тых, да якіх беларусы прызвычаіліся з дзяцінства, безумоўна, дапаможа не толькі ацаніць шматаблічча шляхоў развіцця чалавецтва, але і ўявіць сябе самога ў ролі першаадкрывальніка, а таксама знайсці іншыя, болей эфектыўныя падыходы, шляхі, стратэгіі разумення і засваення іншай, не падобнай на родную, але вельмі прыцягальнай этнакультурнай прасторы. А некага, магчыма, гэтая кніга пакліча ў дарогу, і тады назіранні аўтара, выяўленыя ім заканамернасці дапамогуць у адаптацыі да жыцця і работы ў Кітаі». 

Кніга Дар’і Зубок складаецца з наступных раздзелаў — «Беларусы ў Кітаі: гісторыя з’яўлення, рассяленне і сацыяльна-дэмаграфічныя характарыстыкі»; «Матэрыяльная культура ў кантэксце захавання этнічных асаблівасцяў беларусаў у Кітаі»; «Адлюстраванне працэса адаптацыі беларусаў у Кітаі ў галіне духоўнай культуры»; «Асаблівасці працэса адаптацыі беларусаў у Кітаі ў галіне сацыяльнай культуры». 

Выданне багата ілюстравана. Манаграфія адрасавана гісторыкам, студэнтам ВНУ, усім, хто цікавіцца этнакультурнымі працэсамі беларусаў за межамі Рэспублікі Беларусь, усім, хто цікавіцца беларуска-кітайскімі гістарычнымі, палітычнымі, гуманітарнымі і культурнымі сувязямі паміж Кітаем і Беларуссю. 

Кастусь ЛЕШНІЦА