Вы тут

Што робіцца для добраўпарадкавання сталічных двароў


Амаль 50 тысяч кустоў і звыш дзевяці тысяч дрэў павінны з'явіцца сёлета ў сталічных дварах. З пачатку года ўжо было высаджана больш чым пяць тысяч дрэў і 24 тысячы кустоў, адрамантавана звыш 33 гектараў газонаў. Мяркуецца, што за 2022 год прывабны выгляд атрымаюць 814 дваравых тэрыторый Мінска, шэсць будуць капітальна адрамантаваны, а ў 142 дварах зробяць комплексны бягучы рамонт. Што мяняецца ў дварах і як жыхарам паўдзельнічаць у добраўпарадкаванні тэрыторый каля сваіх дамоў, расказала спецыяліст жыллёва-камунальнай гаспадаркі.


А ты пасадзіў дрэва?

Мерапрыемствы па бягучым і капітальным рамонце элементаў добраўпарадкавання, якія змешчаны на прыдамавых тэрыторыях шматкватэрнай жылой забудовы, а таксама догляд, аднаўленне і абнаўленне драўнінна-хмызняковай расліннасці, праводзяцца ў сталіцы штогод. Гэта робіцца для паляпшэння ўзроўню добраўпарадкавання двароў, удасканальвання іх знешняга выгляду, стварэння бяспечных і камфортных умоў для пражывання, расказала Вольга ЯГОРАВА, начальнік аддзела па добраўпарадкаванні і санітарным утрыманні жыллёвага фонду Мінскай гарадской жыллёвай гаспадаркі:

— Адрамантавана больш як 200 тысяч м2 пакрыццяў дваравых праездаў (па плане — 207,5 тысячы м2), амаль 84 тысячы м2 пакрыццяў пешаходных сувязяў (па плане — 98,5 тысячы м2), 75 вонкавых лесвіц, звыш 3500 кантэйнерных пляцовак. Даведзена да ладу больш за 30 тысяч адзінак малых архітэктурных формаў (лаўкі, сметніцы і іншае), 4720 такіх адзінак устаноўлена замест дэманціраваных раней. Адрамантавана таксама 17 адзінак дзіцячага гульнявага і спартыўнага абсталявання, 416 — пастаўлена ўзамен дэманціраванага раней.

Работы па бягучым рамонце выконваюцца згодна з планамі, якія фарміруюцца па выніках восеньскага агляду жыллёвага фонду. А таксама з улікам заяў і зваротаў ад грамадзян, нагадала спецыяліст і падкрэсліла, што беларусы заўжды актыўна ўдзельнічаюць у месячніках па добраўпарадкаванні і азеляненні тэрыторый. Гэтаму садзейнічае ў тым ліку праект «Зялёны двор разам!». У сталіцы, дарэчы, размешчана 78 банераў «А ты пасадзіў дрэва?», з дапамогай якіх камунальнікі спадзяюцца далучыць да ўдзелу ў добраўпарадкаванні двароў яшчэ больш жыхароў.

Правілы пасадак, афарбоўкі і гульні

Беларусы таксама выступаюць з уласнымі ініцыятывамі, робяць кветнікі, фінансава ўдзельнічаюць у набыцці абсталявання для двароў і ўладкаванні велагаражоў. Пры гэтым сумясціць грошы людзей і бюджэту, каб сумесна купіць для двара прадметы, не прадугледжанае планам, нельга. Калі жыхары хочуць нешта пазапланавае, яны мусяць рабіць гэта цалкам за свой кошт.

А яшчэ штогод камунальнікі летам праводзяць аглядны конкурс на найлепшае кветкавае афармленне агародчыкаў і балконаў.

— Жыхары выкарыстоўваюць для ўпрыгожвання тэрыторый усёмагчымыя сарты кветак, прыродныя матэрыялы накшталт камянёў і драўніны. Шыны і мяккія цацкі — неадназначны варыянт для ўпрыгожвання. Мала таго, што гэта гаручыя матэрыялы, дык шыны — гэта яшчэ і адходы, і ў сталічным двары прымяняць іх, пэўна, не вельмі эстэтычна, — адзначыла прадстаўніца ЖКГ. — Тым не менш, калі гэта ў разумных межах, то чапаць такія «кветнікі» не будуць. Аднак у недапушчальных выпадках выдаюцца прадпісанні на ўстараненне падобных звалак.

Найлепшы двор і найлепшы пад'езд — конкурс для жыллёва-камунальных службаў, дадала Вольга Ягорава. Аднак у дварах і пад'ездах-пераможцах заўжды ёсць не толькі капрамонт, але і, відаць, удзел жыхароў. Зробленыя імі ўпрыгожванні становяцца тымі разыначкамі, дзякуючы якім двары і пад'езды набываюць індывідуальнасць.

Пры азеляненні і ўпрыгожванні двароў трэба памятаць, што існуе пералік работ, якія трэба ўзгадняць у службах ЖКГ. Гэта, напрыклад, пасадка дрэў і кустоў на пэўнай адлегласці ад фасада дома, праезнай і пешаходнай часткі, падземных камунікацый. А таксама ўстаноўка малых архітэктурных форм і дзіцячага гульнявага абсталявання і іх афарбоўка. Існуюць нормы аддаленасці абсталявання адно ад аднаго (трэба ўлічваць месца для зоны падзення і зоны прызямлення), а афарбоўка па прынцыпе «як каму падабаецца» можа зрабіць двор безгустоўным, таму колер таксама лепш узгадніць з жыллёвымі службамі, параіла спецыяліст.

На кожнай дзіцячай пляцоўцы сёння ёсць інфармацыйныя шыльды ці налепкі з правіламі карыстання пляцоўкай, дзе напісана, як і каму можна ёй карыстацца (дзеці да 14 гадоў вагой да 70 кілаграмаў), а таксама ўказаны нумары службаў экстраннай дапамогі і арганізацый, якія абслугоўваюць пляцоўку.

Капітальны і прамежкавы варыянты

Штогод у сталіцы рэалізоўваецца праграма і па капітальным рамонце дваровых тэрыторый. Сёлета такі рамонт будзе зроблены на шасці аб'ектах — 14 прыдамавых тэрыторыях. На 22 аб'екты — 87 прыдамавых тэрыторый — будзе зроблена праектна-каштарысная дакументацыя. Капрамонт найперш прадугледжаны для тых двароў, у дамах якіх ужо адбыўся капітальны рамонт.

— На чатырох аб'ектах (васьмі прыдамавых тэрыторыях) ужо завершаны будаўніча-мантажныя работы. Яшчэ па двух аб'ектах яны завершацца ў найбліжэйшы час, — падзялілася Вольга Ягорава. — Асноўныя віды работ, якія выконваюцца падчас капрамонту, гэта замена існуючых пакрыццяў дваравых праездаў і пешаходных сцяжынак, дзіцячага гульнявога абсталявання, малых архітэктурных формаў, капітальны рамонт лесвіц, устаноўка агароджаў каля дзіцячых пляцовак, уладкаванне месцаў для збору і захоўвання адходаў, тратуараў уздоўж дамоў. У старой жыллёвай забудове тратуараў часцей за ўсё няма, таму работы робяцца толькі пры капрамонце, бо на гэта трэба распрацоўваць праектную дакументацыю. Тратуары могуць пакласці таксама ў месцах, пратаптаных жыхарамі.

Каб заахвочваць жыхароў да спартыўна-аздараўленчых мерапрыемстваў, у дварах пры капрамонце можна ставіць таксама велагаражы. Сёлета ў мінскіх дварах з'явіліся тры гаражы на 76 веламесцаў.

Капітальны капрамонт двароў, аднак, не паспявае за капрамонтам дамоў, таму з 2021 года камунальнікі прымяняюць такі падыход, як комплексны бягучы рамонт прыдамавых тэрыторый, дзе капрамонт дамоў адбыўся ў апошнія пяць гадоў. Калі двор у выніку гэтага набывае добраўпарадкаваны выгляд, то і капрамонт як такі яму ў прынцыпе пазней не спатрэбіцца.

— Гэта своеасаблівы прамежкавы варыянт паміж кропкавым рамонтам ці заменай нейкіх асобных адзінак і поўным абнаўленнем прыдамавой тэрыторыі ў межах бягучага рамонту, — патлумачыла начальнік аддзела. — Пры такіх работах мяняюць, напрыклад, пліткавае пакрыццё на пешаходных сцежках, дзіцячае ці спартыўнае абсталяванне, малыя архітэктурныя формы, робяць азеляненне і іншыя віды работ, на якія не трэба распрацоўваць праектную дакументацыю. Такім чынам тэрыторыя прыводзіцца ў належны стан, набывае эстэтычны і сучасны выгляд.

У тэму

Камунальнікі сталічнай вобласці абслугоўваюць больш за 4,5 тысячы прыдамавых тэрыторый плошчай звыш 70 мільёнаў м2. Добраўпарадкаваць сёлета яны мяркуюць 91 двор. У дварах Міншчыны знаходзіцца 1990 дзіцячых гульнявых спартыўных пляцовак, дзе ўстаноўлена больш як восем тысяч адзінак абсталявання. Ужо адрамантавана 188 адзінак дзіцячага гульнявога абсталявання, 450 м2 пешаходных сцежак і амаль тры тысячы м2 дарожнага пакрыцця двароў, у больш як 330 пясочніцах заменены пясок, адрамантаваны чатыры дваравыя прыбіральні, устаноўлены дадатковыя кантэйнеры (144) для раздзельнага збору адходаў.

Ірына СІДАРОК

Фота аўтара

Выбар рэдакцыі

Грамадства

Як выхоўваць дзяўчынку і як хлопчыка? У чым розніца? Адказвае псіхолаг

Як выхоўваць дзяўчынку і як хлопчыка? У чым розніца? Адказвае псіхолаг

Менавіта бацькі фарміруюць будучыню свайго дзіцяці.