Мітрапаліт Веніямін: Адзін з самых вострых крызісаў сёння — крызіс сям’і

Міжнародны форум славянскіх сем'яў пройдзе ў Мінску 23 верасня. Яго мэта — садзейнічаць захаванню традыцыйных духоўна-маральных каштоўнасцяў, арыентаваных на моцную сям'ю, нараджэнне дзяцей, пераемнасць пакаленняў. У мерапрыемстве возьмуць удзел прадстаўнікі Рускай і Беларускай праваслаўнай царквы, Міністэрства працы і сацыяльнай абароны, Міністэрства адукацыі, Міністэрства аховы здароўя і Міністэрства інфармацыі. Таксама сярод запрошаных будзе і мэтавая аўдыторыя — моладзь з ліку студэнтаў і навучэнцаў, маладых спецыялістаў.

Як адзначыў Мітрапаліт Мінскі і Заслаўскі Веніямін, Патрыяршы Экзарх усяе Беларусі, у сучасных умовах правядзенне падобнага форуму набывае асаблівую значнасць.

— Агульнапрызнана, што мы жывём у няпросты час — эпоху эканамічных, сацыяльных, палітычных, духоўных крызісаў. І адзін з самых вострых — крызіс сям'і. І ў яго шмат прычын самага рознага характару. Але, аналізуючы іх, немагчыма не прызнаць, што найважнейшай з'яўляецца менавіта скажэнне каштоўнасных арыенціраў, прынятых у грамадстве, — адзначыў Уладыка. — Напрыклад, матэрыяльнае становішча, несумненна, можа паўплываць на рашэнне маладой сям'і адмовіцца на доўгі час ад нараджэння дзіцяці. А з іншага боку, мы бачым, што менавіта краіны з высокім дабрабытам часта сутыкаюцца з дэмаграфічным крызісам.

Мітрапаліт канстатаваў, што ў сучасным свеце мы часта назіраем стаўленне да шлюбу як да нечага састарэлага, неабавязковага. Маладыя людзі часта прытрымліваюцца лжывага ўяўлення аб тым, што сям'я можа перашкодзіць рэалізацыі чалавека як асобы, прафесіянала і члена грамадства. Таму многія адкладваюць яе стварэнне да пэўнага часу, калі гэта зрабіць бывае значна складаней.

— Нядаўнія даследаванні паказваюць, што людзі па ўсім свеце пачынаюць усведамляць, што падобныя адносіны да сям'і прыводзяць да глыбокага крызісу, прычым не толькі ў духоўна-маральнай сферы. Відавочна, што грамадства, дзе эгаістычныя каштоўнасці пераважаюць над сямейнымі, а дзеці ўспрымаюцца як абуза, непазбежна сутыкнецца з цяжкім сацыяльна-эканамічнымі праблемамі, — адзначыў мітрапаліт.

Яшчэ адным довадам супраць уступлення ў шлюб з'яўляецца ўяўленне аб тым, што сямейнае жыццё накладвае няпростыя абавязацельствы. Аднак такі погляд — відавочная прыкмета таго, што чалавек не пасталеў.

— Дарослы чалавек пастаянна прымае на сябе абавязацельствы, нясе адказнасць не толькі за сябе, але і за іншых. І сям'я тут не выключэнне. Пры правільна пабудаваных сямейных адносінах сям'я становіцца крыніцай натхнення, падштурхоўвае чалавека да здзяйсненняў на твочым, прафесійным і іншым полі дзейнасці. Мне неаднойчы прыходзілася сутыкацца з такой сітуацыяй, калі людзі, якія сапраўды дасягнулі па чалавечых мерках многага ў грамадстве, сведчылі, што гэта дзякуючы таму, што маюць добрую сямейную абстаноўку і, вяртаючыся з работы пасля цяжкай працы і перажыванняў, могуць дома адпачыць, аднавіць сілы і настроіцца на іншы лад, — дадаў мітрапаліт. — У сям'і важна бачыць не проста сацыяльны інстытут і тым больш не фактар, які абмяжоўвае свабоду, а рэальнасць, якая дорыць чалавеку радасць, гармонію і паўнату жыцця.

Намеснік міністра працы і сацыяльнай абароны Валерый Кавалькоў падкрэсліў, што сям'я заўсёды знаходзіцца ў цэнтры ўвагі дзяржавы. Гэта, у прыватнасці, дапамога ў вырашэнні жыллёвага пытання — сёння сем'і з трыма дзецьмі амаль бясплатна яго вырашаюць.

Маладыя людзі нярэдка імкнуцца адкласці нараджэнне дзяцей, бо на першае месца выходзіць кар'ера. Таму ў Працоўны кодэкс сёння ўнесены такія паняцці, як няпоўны працоўны дзень, дыстанцыйная работа. Маці з малым да трох гадоў можа працаваць і адначасова атрымліваць дапамогу. Нядаўна ўведзены і бацькоўскі адпачынак, які наймальнік дае на два тыдні пры нараджэнні дзіця.

Валерый Кавалькоў адзначыў што нярэдка да нас пранікаюць чужыя «каштоўнасці» — быццам бы сям'і не патрэбна дзіця. Будучы форум паспрабуе змяніць такія стэрэатыпы. Падчас яго пройдуць круглыя сталы, дзе спецыялісты раскажуць пра аспекты развіцця сямейных адносін і нагадаюць пра традыцыйныя для нашай культуры каштоўнасці.

Алена КРАВЕЦ