Вы тут

Беларуская дэлегацыя адпраўляецца на фестываль «Моладзь — за Саюзную дзяржаву»


Беларуская дэлегацыя 14 верасня адправіцца на XV фестываль «Моладзь — за Саюзную дзяржаву», які адбудзецца з 14 па 19 верасня 2022 года на тэрыторыі Смаленскай вобласці (Расійская Федэрацыя). Пра гэта паведамілі ў Пастаянным камітэце Саюзнай дзяржавы.


Цырымонія ўрачыстай адпраўкі і канцэпт-прэзентацыя ўдзельнікаў дэлегацыі дадуць старт удзелу беларускіх юнакоў і дзяўчат у маштабным творчым форуме Саюзнай дзяржавы.

У дзень адпраўкі (14 верасня 2022 года) перад удзельнікамі дэлегацыі гасцінна расчыніць свае дзверы Маладзёжны тэатр эстрады, дзе ўжо на ўваходзе ўсіх творчым флэш-мобам будуць сустракаць удзельнікі Ансамбля кафедры харэаграфіі Беларускага дзяржаўнага універсітэта культуры і мастацтваў. У рэпертуары ансамбля — харэаграфічныя кампазіцыі ў пастаноўцы выкладчыкаў і студэнтаў кафедры, створаныя на матэрыяле народна-сцэнічнага танца, сучаснай харэаграфіі і беларускага фальклору, большасць з якіх адзначаны прызамі на рэспубліканскіх і міжнародных творчых конкурсах. Ансамбль з’яўляецца лаўрэатам і двойчы ўладальнікам Гранд-прэміі спецыяльнага фонду Прэзідэнта Беларусі па падтрымцы таленавітай моладзі, лаўрэатам міжнародных харэаграфічных конкурсаў.

У фае тэатра разгорнецца канцэпт-прэзентацыя ўдзельнікаў беларускай дэлегацыі, дзе маладыя людзі змогуць адразу пазнаёміцца і акунуцца ў атмасферу творчасці і сяброўства.

Сваім музычным прывітаннем падзеляцца ўдзельнікі народнага цымбальнага аркестра «Ліра» Мінскага дзяржаўнага каледжамастацтваў. У складзе аркестра такія інструменты як беларускія цымбалы, баяны, акардэоны, ударныя і беларускія драўляныя духавыя інструменты. Аркестр прымае ўдзел у маладзёжных грамадска-культурных акцыях краіны.

Атмасферу прыгажосці і грацыі створаць удзельнікі подыум-школы «FashionStyleModels» Нацыянальнага цэнтра мастацкай творчасці дзяцей і моладзі Міністэрства адукацыі Беларусі. У рэпертуары калектыву-шматлікія паказы лепшых дасягненняў маладых дызайнераў Беларусі, а таксама флагманаў Беллегпрама, яркія творчыя нумары.

У склад дэлегацыі таксама ўключаны шоу-балет «Сенсацыя». За 25 гадоў існавання калектыў неаднаразова быў удастоены звання лаўрэата і дыпламанта прэстыжных міжнародных харэаграфічных конкурсаў, і фестываляў. Шоу-балет працуе ў розных напрамках сучаснай харэаграфіі — джаз, фанк, мадэрн, хіп-хоп, вар’етэ, а таксама народна-сцэнічны танец.

Беларусь на конкурсе маладзёжнай песні фестывалю «Моладзь — за Саюзную дзяржаву» прадставяць 8 выканаўцаў – Вольга Булай, Аліна Бурачэўская, Лізавета Галеева, Мікіта Залеўскі, Андрэй Кот, Ілля Пракаповіч, Карына Ромыш і Маргарыта Шыбаева. Сёння яны прэзентуюць свае візітныя карткі.

Фестываль «Моладзь — за Саюзную дзяржаву» адбудзецца па ініцыятыве Парламенцкага сходу Саюза Беларусі і Расіі. Гэта маштабны творчы і адукацыйны форум, накіраваны на стварэнне адзінай культурнай прасторы Саюзнай дзяржавы, умацаванне дружбы моладзі Расіі і Беларусі, прапаганду лепшых ідэй у галіне сучаснага маладзёжнага руху і наладжванне супрацоўніцтва паміж маладзёжнымі аб’яднаннямі дзвюх краін, а таксама выяўленне і падтрымку таленавітай моладзі.

Папярэдні, XIV фестываль «Моладзь — за Саюзную дзяржаву», прайшоў у 2019 годзе ў Растове-на-Доне. У сувязі са змякчэннем дзеючых каранавирусных абмежаванняў дэпутаты Парламенцкага сходу прынялі рашэнне аднавіць у 2022 годзе правядзенне маштабнага маладзёжнага форуму.

Беларускі рэспубліканскі саюз моладзі сфармаваў склад дэлегацыі ад Рэспублікі Беларусь. Гэта 100 прадстаўнікоў усіх рэгіёнаў Беларусі — студэнты, навучэнцы, маладыя работнікі розных арганізацый і прадпрыемстваў, аб’яднаныя імкненнем да творчасці і сяброўства паміж моладдзю Расіі і Беларусі.

Па інфармацыі мастацкага кіраўніка — каардынатара удзельнікаў фестывалю ад Беларусі Аляксандра Далжэўскага, праграма форуму абяцае быць насычанай і цікавай.

На працягу фестывальнага тыдня пройдуць конкурс выканаўцаў маладзёжнай песні, канцэртная эстафета Саюзнай дзяржавы «Калі мы адзіныя — мы непераможныя» па гарадах Смаленскай вобласці, канцэрт для ветэранаў вайны і працы, патрыятычная акцыя «Свечка памяці», музычны вечар, прысвечаны нацыянальным традыцыям рэгіёнаў Беларусі і Расіі «Спяваем і славім край родны», шоу-квіз, прысвечаны Году народнага мастацтва і нематэрыяльнай культурнай спадчыны, спартыўны марафон моладзі, вечар-конкурс «Міс фестываль – 15 прычын быць шчаслівай», гала-канцэрт лаўрэатаў конкурсу выканаўцаў маладзёжнай песні і мастацкіх калектываў, артыстаў эстрады Беларусі і Расіі, а таксама развітальная белая ноч удзельнікаў фестывалю «Да пабачэння, фестываль!».

Выбар рэдакцыі

Рэгіёны

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Як мы бярозавік куплялі на гандлёвай пляцоўцы лясгаса і ў лясніцтве

Культура

Анатоль Ярмоленка: Нас натхняе беларуская паэтычная класіка

Анатоль Ярмоленка: Нас натхняе беларуская паэтычная класіка

Творчая вечарына народнага артыста Беларусі прайшла ў адной з мінскіх гімназій.