Тэлефонныя аферысты выманілі ў беларусаў больш за $4 млн

Аб гэтым расказаў намеснік начальніка галоўнага ўпраўлення крымінальнага вышуку МУС Дзмітрый Бурдзюк.

Раскрывальнасць злачынстваў у адносінах да пажылых людзей, якія ўчыняюцца пад маркай аказання дапамогі сваякам, якія нібыта трапілі ў ДТЗ, складае амаль 80 працэнтаў. Сёлета першае паведамленне аб такім відзе махлярства было зафіксавана ў Барысаве ў сярэдзіне сакавіка. Потым яны сталі рэгістравацца ва ўсіх рэгіёнах краіны. Пік злачыннай актыўнасці прыпаў на май і чэрвень. Але дзякуючы шырока арганізаванай інфармацыйна-прафілактычнай рабоце, а таксама ўстанаўленню і затрыманню кур'ераў, хвалю махлярстваў удалося збіць. На сёння следчыя распачалі ўжо 592 крымінальныя справы, з якіх у 463 выпадках падазроныя ўстаноўлены. Пры гэтым агульная сума нанесенага ўрону грамадзянам перасягнула $4 млн.

Па словах Дзмітрыя Бурдзюка, на хітрыкі аферыстаў часцей за ўсё трапляюцца жанчыны ва ўзросце ад 60 гадоў. Адзначаецца, што ў сталіцы з больш як 400 пацярпелых толькі 43 ахвяры тэлефонных ашуканцаў з'яўляюцца мужчынамі. Што да кур'ераў, то імі часцей за ўсё становяцца людзі ва ўзросце ад 18 да 35 гадоў без пэўнага роду заняткаў.

Усе кур'еры былі дасведчаныя аб крымінальным характары сваёй дзейнасці. За выкананне яны атрымлівалі ад 5 да 15 працэнтаў ад сумы. Аб'явы з такімі прапановамі знаходзяць у тэматычных тэлеграм-каналах, якія прысвечаны пошуку пастаяннай працы або падпрацоўкі.

Пасля затрымання кур'еры, як правіла, аказваюць садзейнічанне праваахоўным органам, аднак іх дасведчанасць не распаўсюджваецца далей за імя (нікнэйм) вярбоўшчыка і куратара ў месенджары. У сярэднім кур'ер да яго затрымання ажыццяўляе не больш за тры ці чатыры перадачы. Арганізатары злачыннай схемы ўсведамляюць высокую ступень верагоднасці іх затрымання. Таму імкнуцца, каб грошы на руках у кур'ера знаходзіліся мінімальна магчымы час. Для забеспячэння ананімнасці і захаванасці наяўныя грошы пераводзяцца ў крыптавалюце. Пошукам асобы, якая здольна аказаць паслугі па канвертацыі, займаюцца непасрэдна арганізатары злачынства. Кур'ер пры наяўнасці валюты робіць яе абмен на беларускія рублі, а пасля з выкарыстаннем розных прылад банкаўскага самаабслугоўвання пераводзіць грошы на рахунак, рэквізіты якога атрымлівае ад куратара. Для вываду грашовых сродкаў за межы Беларусі злачынцы аддаюць перавагу Bіtcoіn.

«На жаль, у большасці выпадкаў кур'еры паспяваюць перавесці грошы арганізатарам. Гэта адбываецца таму, што пацярпелыя звяртаюцца ў міліцыю толькі праз некаторы час (ад 3-4 гадзін да сутак), калі ўжо пра здарэнне даведаюцца родныя», — адзначыў Дзмітрый Бурдзюк. У сувязі з гэтым у МУС нагадваюць аб неабходнасці давядзення прафілактычнай інфармацыі да пажылых сваякоў. «Растлумачце, што следчы або міліцыянер ніколі не будзе тэлефанаваць і прасіць перадаць грашовыя сродкі. Няхай таксама звяртаюць увагу на нумар тэлефона, з якога паступае званок, — як правіла, размова ідзе аб замежных нумарах», — падкрэсліў намеснік начальніка ГУУР МУС. — «Не варта падтрымліваць дыялог, трэба перапыніць званок і самому ператэлефанаваць сваяку. Аб тым, што здарылася, неабходна неадкладна паведаміць у міліцыю».

Пётр ДУНЬКО

Прэв’ю: БелТА