Пагасціць у майстэрнях мастакоў змогуць усе

Беларускі саюз мастакоў днямі прэзентаваў старт новага навучальнага праекта, які дазволіць усім жадаючым зазірнуць у госці да творцаў гэтага аб’яднання. У суботу, 1 кастрычніка на Мастацкім камбінаце (вул. Някрасава 11) наведвальнікі пазнаёмяцца і пранікнуцца атмасферай творчых арт-прастор, убачаць мастакоў за працай (і змогуць нават паспрабаваць сябе ў якасці аўтараў) у іх майстэрнях. 

— Ідэя нашага праекта ў тым, каб раз на год ладзіць дзень адчыненых дзвярэй. Геалакацыю мы пакуль вызначаем на Някрасава, 11 і на Сурганава, 44, дзе знаходзіцца найбольшы збор нашых мастакоў. Сёння Мастацкі камбінат прасціраецца на 6 тысяч квадратных метраў, з якіх 2,5 тысячы займаюць мастакі саюза. Тут сканцэнтравана шмат майстэрняў, і вельмі цікавую гісторыю мае сам будынак. Раней на гэтым месцы была ўскраіна горада. На месцы скверу, які размяшчаецца побач, былі могілкі. У адной з майстэрняў захаваўся фундамент каталіцкай капліцы, яго таксама можна будзе ўбачыць, — распавёў старшыня ГА «Беларускі саюз мастакоў» Глеб Отчык. — А будынак, у якім зараз мы знаходзімся (Някрасава,11), быў першай майстэрняй народнага мастака Георгія Паплаўскага. Яна будавалася пасля вайны з верхнім святлом, па французскай тэхналогіі. І ўсе майстэрні, якія сёння знаходзяцца тут, унікальныя. У іх можна адчуць непаўторны мікраклімат, дзе мастакі ствараюць свае працы штодня. Таму, думаю, людзям будзе цікава зазірнуць у гэтыя памяшканні і адчуць усё ўжывую, а таксама пазнаёміцца з майстрамі сваёй справы. І, магчыма, гэта дасць імпульс і далейшай камунікацыі і развіццю.

Па задуме арганізатараў мерапрыемства, праводзіць такую сустрэчу збіраюцца кожны год у першую суботу кастрычніка. З часам пашырыцца спіс адрасоў, куды людзі змогуць прыходзіць, каб спазнаць «закуліссе» мастацкага працэсу. Бо майстэрні мастакоў размяшчаюцца па ўсім горадзе. Непасрэдна 1 кастрычніка дзверы майстэрняў будуць адчынены з 14 да 18 гадзін. Напярэдадні мерапрыемства наведвальнікам прадаставяць поўную інфармацыю адносна лакацый, дзе будуць чакаць аматараў выяўленчага мастацтва. 

— Такія праграмы вельмі важныя, таму што дазваляюць паказаць, хто такі мастак у сучасным грамадстве, дапамагаюць зразумець яго свет, — адзначыў скульптар Аляксандр Шапо. — Кожны творца і яго майстэрня непаўторныя. Мастакам заўсёды ёсць пра што распавесці. На такіх сустрэчах можа прысутнічаць публіка розных узростаў. І маючы магчымасць наведацца ў закрытую прастору творчага працэсу, варта ёю скарыстацца, таму што гэта дасць новыя ўражанні, эмоцыі, і даведацца штосьці новае.

Дадзены праект, можна сказаць, не зусім проба пяра, паколькі саюз мастакоў мае вопыт правядзення невялікіх экскурсій сумесна з Міністэрствам спорту і турызму для гідаў і экскурсаводаў сталіцы. Фармат такога ўзаемадзеяння апраўдаў сябе, і таму зараз яго хочуць зрабіць даступным для больш шырокіх колаў. Як адзначыў Глеб Отчык, калі ідэя знойдзе водгук, то можна будзе падумаць і пра іншую перыядычнасць сустрэч. Акрамя гэтага, ёсць у планах грамадскага аб’яднання і правядзенне сустрэч з элементамі майстар-класаў у школах, каб распавядаць дзецям пра мастакоў і іх працу. Дарэчы, добрую форму далучэння дзяцей да мастацтва рэалізоўваюць у адной са сталічных школ, дзе мастак вядзе гурток выхаднога дня. І старшыня саюза мастакоў выказаў думку, што было б добра распрацаваць сумесна з Міністэрствам адукацыі праграму, якая б давала магчымасць знаёміць дзяцей з галерэямі, музеямі, тэатрамі і праз сустрэчы з людзьмі, якія там працуюць.

Алена ДРАПКО

Фота аўтара